Read luo 2 Weche mag Ndalo 13 Bible Online

2 Weche mag Ndalo 13 - luo bible

2 Weche mag Ndalo 13

¹E higa mar apar gaboro mar loch Jeroboam, Abija nodoko ruodh Juda.

²Norito piny kuom higni adek kodak Jerusalem. Min mare ne nyinge Mikaya nyar Uriel ja-Gibea. Ne nitie lweny e kind Abija gi Jeroboam.

³Abija nowuok gi oganda jolweny moyier marateke alufu mia ang’wen, kendo Jeroboam nochano jolweny moyier marateke alufu mia aboro momanyore kod jo-Abija.

⁴Abija nodhi mochung’ ewi got Zemaraim manie piny gode mag Efraim, mokok niya, “Winjuru in Jeroboam gi jo-Israel duto!

⁵Donge ung’eyo ni Ruoth Nyasaye ma Nyasach Israel nomiyo Daudi gi nyikwaye loch Israel nyaka chieng’ kotimo kodgi singruok ma ok kethre?

⁶To kata obedo kamano Jeroboam wuod Nebat jatich Solomon wuod Daudi nopiem gi ruodhe.

⁷Kendo jomahundu manono noriwore kode mokwedo Rehoboam wuod Solomon ka ne pod en rawera ma chunye yom, kendo ma ok nyal sirogi.

⁸“To koro uparo ni unyalo dagi loch ma Ruoth Nyasaye nomiyo nyikwa Daudi mana nikech ung’eny, kendo un gi nyiroye mag dhahabu mane Jeroboam omiyou mondo obed nyisecheu?

⁹Donge useriembo jodolo mag Ruoth Nyasaye ma nyikwa Harun kod jo-Lawi, muketo jodolou kaka jopinje mamoko timo? Ng’ato ang’ata mobiro koyiedhore gi nyarwath kata gi imbe abiriyo nyalo doko jadolo ni gik ma ok Nyasaye.

¹⁰Wan to Ruoth Nyasaye e Nyasachwa, kendo ok waseweye. Wan gi jodolo ma nyikwa Harun kod jo-Lawi ma konyogi.

¹¹Giwang’o ni Ruoth Nyasaye misengni kod ubani mang’we ng’ar okinyi godhiambo kendo giketo makati e nyime e mesa mar dhahabu maler, kendo girito sis taya gi techene mondo oliel otieno kotieno. Kamano waritoo chik Ruoth Nyasaye ma Nyasachwa, to un useweye.

¹²Neuru kaka Nyasaye ni kodwa, kotelonwa. Neuru kaka jodolone ting’o tungegi mag lweny ma gibiro goyo mondo warad kodu. Un jo-Israel kik uked gii Ruoth Nyasaye ma Nyasach kwereu, nimar ok unyal loye.”

¹³Jeroboam nosepando jolweny moko mondo opo jo-Juda gi yo ka ng’egi. Kamano ogandane mar jolweny ne nie nyim jo-Juda, to joma opondo ne ni kang’e gi.

¹⁴Kane jo-Juda ong’icho, ne gipo ka gineno jolweny koni gi koni, mi giywak ni Ruoth Nyasaye, kendo jodolo nogoyo tung’.

¹⁵Eka jo-Juda nogiyo, kendo kane gigiyo kamano, Nyasaye nokeyo Jeroboam kod jo-Israel duto e nyim Abija gi jo-Juda.

¹⁶Jo-Israel noringo jo-Juda, mi Nyasaye nochiwogi e lwet jo-Juda.

¹⁷Abija kod joge ne onegogi malich ahinya, mi jo-Israel marateke moyier alufu mia abich notho.

¹⁸Kamano ne olo jo-Israel chieng’no. Jo-Juda to ne olocho nimar ne gigeno kuom Ruoth Nyasaye ma Nyasach kweregi.

¹⁹Abija nolawo Jeroboam, mokawo mieche moko, kaka Bethel gi Jeshana gi Efron kod mier mokiewo kodgi.

²⁰Loch Jeroboam ne ok ochako obedo motegno kendo e ndalo mag Abija. Bang’e Ruoth Nyasaye nochwade motho.

²¹To loch Abija nomedo gurore motegno. Nokendo mon apar gang’wen, monywolo yawuowi piero ariyo gariyo, gi nyiri apar gauchiel.

²²Koro weche moko mag Abija gi timbene duto ondiki e kitap Iddo janabi.