Read luo 2 Weche mag Ndalo 14 Bible Online

2 Weche mag Ndalo 14 - luo bible

2 Weche mag Ndalo 14

¹Abija notho moyiki but kwerene e dala Daudi. Asa wuode nodoko ruoth kare. Piny nokue higni apar ndalo lochne.

²Timbe Asa ne beyo kendo long’o e nyim Ruoth Nyasaye ma Nyasache.

³Nogolo kuonde liswa mag nyiseche mag jopinje mamoko. Noketho hembko mane ni kuonde moting’ore, kendo omuko sirni milamo mag kite gi mag yien.

⁴Nojiwo jo-Juda mondo oluw Ruoth Nyasaye ma Nyasach kwerene ka gimako buchene gi chikene.

⁵Noketho hembko duto mane ni kuonde moting’ore gi kende mag ubani e miech Juda duto, mi piny nokue e ndalo lochne.

⁶Noyudo thuolo mar chielo miech Juda gi ohinga, nimar piny nokue. Lweny ne onge e ndalone, nikech Nyasaye nomiye kue.

⁷Asa nowacho ni jo-Juda niya, “Wageruru miechwagi, kendo wachielgi gi ohinga man gi kuonde maboyo mag ng’icho, mi wketnigi rangeye miloro motegno gi lodi. Piny pod marwa, nimar waseluwo Ruoth Nyasaye ma Nyasachwa, mi osemiyowa kue kuonde duto.” Omiyo ne gigedo, kendo gidhi nyime maber.

⁸Asa ne nigi jolweny ma jo-Juda alufu mia adek moting’o kuodi gi tong’, kod jo-Juda alufu mia ariyo gi piero aboro (280,000) moting’o okumbni gi atunge. Jogi duto ne thuondi mager.

⁹Zera ja-Kush nomonjogi kod jolweny tara achiel, kod geche lweny mia adek, mochopo nyaka Maresha.

¹⁰Asa nodhi mondo oked kode, mi ne gichanore ni lweny e paw Zefatha but Maresha.

¹¹Asa noywak ni Ruoth Nyasaye ma Nyasache niya, “A Ruoth Nyasaye ma Nyasachwa, konywa nikech wageno kuomi, kendo wabiro rado gi ogandani mana e nyingi. A Ruoth Nyasaye, in e Nyasachwa, kik dhano adhana loyi!”

¹²Eka Ruoth Nyasaye nomiyo Asa gi jo-Juda oloyo jo-Kush, mi jo-Kush noringo.

¹³Ne gilawogi nyaka Gera, ka ginegogi oyokre, nimar Ruoth Nyasaye gi jolwenje ema notiekogi. Mi jo-Juda noyako gik mang’eny ahinya.

¹⁴Ne giketho mier duto mokiewo gi Gera, nikech luoro moa kuom Ruoth Nyasaye nomako pinyno. Ne giyako miego duto, nimar ne nitie mwandu mang’eny ma noyudo jogo oseyako.

¹⁵Ne gituro kuonde dhok, kendo ne gipeyo rombe gi ngamia mathoth. Eka ne gidok Jerusalem.