Read luo 2 Weche mag Ndalo 16 Bible Online

2 Weche mag Ndalo 16 - luo bible

2 Weche mag Ndalo 16

¹to e higa mar piero adek gauchiel mar lochne, Baasha ruodh Israel nodhi momonjo jo-Juda, kendoo nochielo Rama gi ohinga, moketoe jolweny mondo ogeng’ ni ji duto ma dhi ka Asa ruodh Juda, kata maa kuno.

²Eka Asa nokawo fedha gi dhahabu kuom mwandu mag Od Ruoth Nyasaye kod mag ode owuon. Noorogi ni Benhadad ruodh Aram ma nodak Damaski gi wach niya,

³“Winjruok mondo obed e kindwa kodi, kaka winjruok mane nie kind wuora gi wuoru. Ero, aoroni fedha gi dhahabu; yie iketh winjruok mane kindu gi Baasha ruodh Israel, mondo owe kedo koda.”

⁴Benhadad noyie kwayo mar ruoth Asa, mi nooro jotend jolweny mondo omonj miech jo-Israel. Noketho Ijon gi Dan gi Abelmaim kod miech keno duto mag Naftali.

⁵Kane Baasha owinjo gima otimore, noweyo gero ohinga mar Rama, mi tijno nochung’.

⁶Eka ruoth Asa nodhi gi jo-Juda duto mi gigolo kite gi yien duto mane Baasha gerogo ohinga mar Rama, mi nochielogo Geba gi Mizpa.

⁷E ndalogo, Hanani janen nobiro ir Asa ruodh Juda mowachone niya, “Jolweny mag ruodh Aram biro tony e lweti, nikech nigeno kuom jo-Aram, to ne ok igeno kuom Ruoth Nyasaye ma Nyasachi.

⁸Donge jo-Kush gi jo-Libia ne gin oganda maduong’ man gi geche gi joidh farese mang’eny ahinya? To Ruoth Nyasaye nochiwogi e lweti, nimar nigeno kuome,

⁹nikech wang’ Ruoth Nyasaye ng’iyo piny duto koni gi koni mondo onyis tekone mokonyogo joma chunygi odimbore e nyime. Nitimo gima ofuwo kuom wachni, omiyo chakre kawuono ibiro bedo gi lwenje.”

¹⁰Wachnoo nomiyo Asa okecho gi janen, mi otueye gi nyororo e od tuech. To bende Asa nochako sando jomoko e ndalogo.

¹¹Chakruok weche Asa nyaka gikogi ondiki e kitap Ruodhi mag Juda gi mag Israel.

¹²Kane Asa osebedo ruoth kuom higni piero adek gochiko, tuo nomako tiendene. Tuoneno nomedore ahinya, to kata kamano ne ok okwayo Ruoth Nyasaye mondo okonye, to nodhi mana kuom ajuoke.

¹³Asa notho higa mar piero ang’wen gachiel mar lochne moluwo kwerene.

¹⁴Noyike e liende ma nokunyo e dala Daudi. Ne gikete e ng’ango mopong’ gi gik mang’ue ng’ar mane joma olony e tijno oseloso, kendo ne giloso mach mang’ongo ahinya ka gimiyego duong’.