Read luo 2 Weche mag Ndalo 19 Bible Online

2 Weche mag Ndalo 19 - luo bible

2 Weche mag Ndalo 19

¹Jehoshafat ruodh Juda nodok dalane Jerusalem kongima.

²To Jehu wuod Hanani ma janen nodhi romone mopenje niya, “Bende itimo maber kikonyo joricho kendo ihero joma ok ohero Ruoth Nyasaye? Mirima osemako Ruoth Nyasaye kodi nikech wachni.

³Kata kamano kamoro bende iber, nimar nigolo sirni milamo e piny, kendo iketo chunyi kuom luwo Nyasaye.”

⁴Jehoshafat nodak Jerusalem, to nochako owuok kolimo joge chakre Beersheba nyaka piny gode mag Efraim, modwokogi ir Ruoth Nyasaye ma Nyasach kweregi.

⁵Noketo jong’ad bura e miech Juda duto mochiel gi ohinga,

⁶kendo nowachonigi niya, “Paruru gima utimo, nimar ok ung’ad bura e nying dhano, to ung’ado e nying Ruoth Nyasaye, nikech ok en kodu kung’ado bura.

⁷Emomiyo tiuru kuluoro Ruoth Nyasaye. Ritreuru kuom gima utimo, nimar Ruoth Nyasaye ma Nyasachwa ok oyie gi ng’ado buch amwor kata buch nyakonchiel kata chamo asoya.”

⁸Bende Jehoshafat noketo jo-Lawi gi jodolo moko kod jodong dhout Israel e Jerusalem mondo ong’ad bura e nying Ruoth Nyasaye, kendo otheg buche milaruokie. Od bura ne ni Jerusalem.

⁹Jehoshafat nochikogi kama, “Unuti tijeu gi adiera kendo gi chunyu duto kuluoro Ruoth Nyasaye.

¹⁰Kamano ka joweteu modak e mier mamoko okelo wach moro e nyimu, bed ni en wach nek kata wach ketho chik Nyasaye, kata buch piny, kata buch dini, kata chik moro amora, to nyaka upuonjgi ni kik giketh e nyim Ruoth Nyasaye, nimar dokech kodu kaachiel gi joweteugo. Kutimo kamano, ok nubed gi ketho.

¹¹Amaria jadolo maduong’ ema notelnu e weche duto mag Ruoth Nyasaye, to Zebadia wuod Ishmael ma jaduong’ dhood Juda notelnu e weche duto mag ruoth, kendo jo-Lawi nobed jogoro. Timuru chir, kendo Ruoth Nyasaye mondo okony jogo man gi adiera.”