Read luo 2 Weche mag Ndalo 2 Bible Online

2 Weche mag Ndalo 2 - luo bible

2 Weche mag Ndalo 2

¹Solomon ne dwaro gero Hekalu ni nying Ruoth Nyasaye kod ode mar ruoth.

²Nondiko joting’ alufu piero abiriyo gi ji alufu aboro mondo opa kite e gode, kod nyipeche alufu adek gi mia auchiel.

³Solomon nooro ni Hiram ruodh Turo wach niya, “Kaka nitimo ni Daudi wuora, kikowone yiend sida mondo ogergo ode, yie itimna kamano an bende,

⁴nimar adwaro gero ot moyang ni Ruoth Nyasaye ma Nyasacha, kama jodolo nowang’ie ubani mang’we ng’ar e nyim Ruoth Nyasaye, kendo nochiwie makati miketo e nyime pile, kendo notimie misengni miwang’o pep okinyi godhiambo, kod miwang’o e ndalo mag Sabato, kendo ka due por, kendo e ndalo sewni ma Ruoth Nyasaye oseketo ni Israel nyaka chieng’.

⁵Ot madwaro gero nobed maduong’, nimar Nyasachwa duong’ moloyo nyiseche duto.

⁶ To en ng’a ma dinyal gerone ot, ka kata polo maduong’ manade ok nyal rome dakie? An to an ng’a, ma dagerne ot modakie, mak mana kar wang’o ubani e nyime?

⁷Emomiyo yie iorna ng’ato molony kuom loso gik dhahabu, gi mag fedha, gi mag mula, kod mag nyinyo, kendo mong’eyo loso law maralik, gi makwar, kod mambulu, kendo molony kuom goro gik moko. Enoti gi jotichna molony man Juda gi man Jerusalem mane Daudi wuora oketo.

⁸Bende orna yiend sida gi saipras gi algum mag Lebanon, nimar ang’eyo ni jotichni olony kuom tong’o yiend Lebanon. Jotichna noti kaachiel gi jotichni,

⁹mondo gikna yien mogundho, nimar ot madwaro gero nobed maduong’ kendo miwuoro.

¹⁰Anami jotichni ma jotong’o gunde alufu piero ang’wen mag ngano, gi gunde alufu piero ariyo mag shairi, gi degii alufu ang’wen mag divai, kod depe alufuu ang’wen mag mo.”

¹¹Hiram ruodh Turo nodwoko Solomon gi barua mondikoe niya, “Ruoth Nyasaye ohero joge, emomiyo oseketi ruodhgi.”

¹²Eka nodhi nyime kowacho niya, “Apako Ruoth Nyasaye ma Nyasach Israel, ma jachuech polo gi piny, nimar osemiyo ruoth Daudi wuowi man gi rieko kod ng’eyo ma biro gero Hekalu ni Ruoth Nyasaye kod ot ma ruoth dakie.

¹³Koro aseoro ng’at molony kendo mariek ma nyinge Huram-abi,

¹⁴wuod ja-Turo ma min mare nyar Dan. En ng’at molony kuom tich dhahabu gi fedha gi mula gi nyinyo gi kidi kod yien, kendo ong’eyo loso law maralik kata mambulu kata makwar kod law katana maber, kendo olony kuom tich goro, kod loso kido moro amora momiye. Onyalo tiyo kod jotichni molony, kendo gi jotich Daudi wuoru.

¹⁵Emomiyo, ruodha, yie iornwa ngano gi shairi gi mo gi divai misewacho.

¹⁶Wanatong’ yien Lebanon moromo kaka idwaro, mi watuegi kanyakla kendo wakwang’gi e nam nyaka Jopa, eka iniomgi kuno kiterogi Jerusalem.”

¹⁷Solomon nokwano jodak duto mane nie piny Israel, kaka Daudi wuon mare nokwanogi. Ne giromo alufu mia achiel gi piero abich gadek kod mia auchiel (153,600.)

¹⁸Noketo ji alufu piero abiriyo kuomgi mondo obed joting’, to ji alufu piero aboro opa kite e gode kod nyipeche alufu adek gi mia auchiel ma kwayogi.