Read luo 2 Weche mag Ndalo 20 Bible Online

2 Weche mag Ndalo 20 - luo bible

2 Weche mag Ndalo 20

¹Bang’ mano jo-Moab gi jo-Amon kod jo-Meun moko nobiro kedo gi Jehoshafat.

²Jomoko nonyiso Jehoshafat niya, “Oganda maduong’ moa Edom loka nam biro mondo omonji, kendo gisechopo Hazazon-tamar, miluongo bende ni Engedi.”

³Luoro nomako Jehoshafat, moketo chunye ni kwayo Ruoth Nyasaye, kendo nochiko jo-Juda duto mondo otue chiemo.

⁴Ji noa e miech Juda duto, mi ochokore kaachiel mondo okwa kony kuom Ruoth Nyasaye.

⁵Kane jo-Juda gi jo-Jerusalem osekoro e od Ruoth Nyasaye, Jehoshafat nochung’ e nyim laru manyien,

⁶mokwayo niya, “A Ruoth Nyasaye ma Nyasach kwerewa, donge in e Nyasaye manie polo? Donge in e ruoth ogendini duto? Nyalo gi teko duto nie lueti maonge ng’ato ma nyalo siri.

⁷ A Nyasachwa, donge in ema nichiwo pinyni ni nyikwa Ibrahim ma osiepni, kiriembo joma nodakie mondo owe thuolo ni jogi Israel, odagie nyaka chieng’?

⁸Mi gisedakie kendo gisegeronie Hekalu mondo nyingi obedie,

⁹ka giwacho niya, ‘Ka gima rach obiro kuomwa, kaka lweny kata sand kata dera kata kech to wanachung’ e nyim Hekalu kendo e nyimi, nimar nyingi nika. Wanaywag e nyimi nikech masichwa, kwang’eyo ni iniwinjwa kendo inireswa.’

¹⁰ Kane jo-Israel oa e piny Misri, ne ikwerogi ni kik gimonj jo-Amon gi jo-Moab gi jo-got Seir, omiyo ne giweyogi ma ok gitiekogi.

¹¹To kar goyonwa erokamano, to koro gidwaro riembowa e piny mane imiyowa mondo obed marwa.

¹²A Nyasachwa, donge ibiro kumogi? Wan waonge gi teko ma dwasirgo oganda maduong’ mabiro monjowani! Ok wang’eyo gima dwatim, to wageno mana kuomi.”

¹³Jo-Juda duto, kaachiel gi mondegi kod nyithindgi kata matindo manadi, nochung’ e nyim Ruoth Nyasaye.

¹⁴Eka Roho mar Ruoth Nyasaye nolor kuom Jahazia ja-Lawi, mane nie dier chokruok. Ne en wuod Zekaria, ma wuod Benaya, ma wuod Jeyel, ma wuod Matania, ma achiel kuom nyikwa Asaf.

¹⁵ Nowacho niya, “Un jo-Juda duto gi joma odak Jerusalem, kod ruoth Jehoshafat, winjuru gima Ruoth Nyasaye owachonu. Owacho ni kik uluor oganda maduong’ni, kendo chunyu kik parre, nimar lweny ok en maru to en mar Nyasaye.

¹⁶Kiny uwuognigi awuoga. Gibiro biro ka giluwo yor Ziz, kendo unuyudgi e giko pony, yo wuok chieng’ mar thim Jeruel.

¹⁷ To un, jo-Juda gi jo-Jerusalem, ok onego uked e lwenjni. Kuseriedo ni lweny, to uchung’ achung’a, mondo une kaka Ruoth Nyasaye biro lochonu. Kik uluor, kendo chunyu kik parre. Kiny uwuognigi awuoga, kendo Ruoth Nyasaye biro konyou.”

¹⁸Eka Jehoshafat nogoyo chonge piny, mokulo wiye nyaka e lowo, mi jo-Juda gi joma odak Jerusalem bende nogoyo chongi piny e nyim Ruoth Nyasaye ka gilame.

¹⁹Koro jo-Lawi ma jo-Kohath gi jo-Kora nochako wer ni Ruoth Nyasaye ma Nyasach Israel gi dwol maduong’ ahinya.

²⁰Jo-Juda ne ochiew gokinyi mang’ich mondo odhi e thim Tekoa, to kane gidhi, Jehoshafat nochung’ mowachonigi niya, “Winjuru un jo-Juda gi joma odak Jerusalem! Genuru kuom Ruoth Nyasaye ma Nyasachu, mi unukwo, kendo genuru kuom jonabi mage, mi unulo.”

²¹Kane oseporo wach gi joge, noyiero joma onego tel nyim jolweny korwako lep lemo, mondo opak Ruoth Nyasaye, ka wer kama: “Gouru erokamano ni Ruoth Nyasaye, nimar herane mosiko ochwere.”

²²Kane gichako wer kendo peko, Ruoth Nyasaye norundo jo-Amon gi jo-Moab kod jo-got Seir, mane obiro monjo jo-Juda, mi nologi.

²³Noyudo ka jo-Amon kod jo-Moab onywako ni jo-got Seir, motieko chuth, kendo kane gisetiekogi kamano, ne gichako negore kendgi giwegi.

²⁴Kane jo-Juda ochopo kama oting’ore manie thim, mondo gine wasikgi mang’enygo, ne gineno mana ringre joma otho ka opie piny, maonge ng’ama otony.

²⁵Kane Jehoshafat kod joge odhi mondo oyeki, ne giyudo dhok mathoth, gi mwandu gi lewni kod gik moko mabeyo mang’eny, mane ok ginyal ting’o duto. Ne gitieko ndalo adek ka pod giyeko, nimar gigo ne ng’eny ahinya.

²⁶To chieng’ mar ang’wen ne gichokore e holo mi gipakoe Ruoth Nyasaye. Emomiyo kanyo ne ochak ni, holo mar Pak, nying ma pod iluongego nyaka chil kawuono.

²⁷Eka jo-Juda gi jo-Jerusalem ne jodok Jerusalem, ka Jehoshafat otelonigi, ka gimor nikech Ruoth Nyasaye nomiyo giloyo wasikgi.

²⁸Ne gidhi Jerusalem, e Od Ruoth Nyasaye ka gigoyo tung’ gi thumbe mopogore opogore.

²⁹Kane ruodhi mag pinje mamoko duto owinjo kaka Ruoth Nyasaye osekedo gi wasik Israel, luoro moa kuom Ruoth Nyasaye nomakogi.

³⁰Kamano piny Jehoshafat nobet gi kue, nimar Nyasache nokelo kue e kindgi gi pinje duto mokiewo kode.

³¹Mano e kaka Jehoshafat norito Juda. Ne en jahigni piero adek gabich kane odoko ruoth, morito piny kuom higni piero ariyo gabich, kodak Jerusalem, Min mare ne nyinge Azuba nyar Shilhi.

³²Jehoshafat noluwo timbe Asa wuon mare adimba. Timbene ne long’o e nyim Ruoth Nyasaye.

³³To kata kamano, hembko mane ni kuonde moting’ore ne ok okethi, kendo ji ne pok oketo chunygi kuom Nyasach kweregi.

³⁴Chakruok weche Jehoshafat nyaka gikogi yudore e kitap Jehu wuod Hanani, ma koro ondik e Kitap Ruodhi mag Israel.

³⁵Bende Jehoshafat ruodh Juda notimo winjruok gi Ahazia ruodh Israel mane timbene richo.

³⁶Noriwore kode e tich hondho yiedhi madhi Tarshish, kendo ne gilosogi Ezion-geber.

³⁷Eka Eliezer wuod Dadavahu ma ja-Maresha nokoro wach marach kuom Jehoshafat niya, “Ruoth Nyasaye biro ketho gima useloso, nikech isetimo winjruok gi Ahazia.” Kamano yiedhi nobarore, ma ok nyal dhi Tarshish.