Read luo 2 Weche mag Ndalo 22 Bible Online

2 Weche mag Ndalo 22 - luo bible

2 Weche mag Ndalo 22

¹Mony mabiro gi jo-Arabu e lwenjno nosenego yawuot Jehoram madongo duto. Kamano e kaka Ahazia wuod Jehoram machogo nodoko ruodh Juda.

²Ahazia ne jahigni piero ang’wen gariyo kane odoko ruoth, morito piny kuom higa achiel, kodak Jerusalem. Min mare ne nyinge Athalia nyakwar Omri.

³Ahazia bende noluwo timbe dhood Ahab nimar min mare nopuonje timbe maricho.

⁴Timbene ne richo e nyim Ruoth Nyasaye mana kaka timbe jodhood Ahab, nikech bang’ tho wuon mare, jogo nodoko jong’adne rieko marach ma ne okethe.

⁵Noyie puonjgi modhi Ramoth-gilead gi Joram wuod Ahab ma ruodh Israel mondo giked gi Hazael ruodh Aram. To jo-Aram nohinyo Joram,

⁶modok Jezreel ni mondo ochang kuom hinyruok ma noyudo Rama kokedo gi Hazael ruodh Aram. Ahazia wuod Jehoram ma ruodh Juda nodhi Jezreel mondo one Joram wuod Ahab nikech notuo.

⁷To Nyasaye nosechano ni mondo Ahazia otho kodhi limo Joram, omiyo, kane Ahazia ni kuno, nowuok gi Joram mondo girom gi Jehu wuod Nimshi, mane Ruoth Nyasaye oyiero mondo otiek od Ahab.

⁸Kane Jehu nego jodhood Ahab, noromo gi jodong Juda kod Ahazia, monegogi.

⁹Eka nochako dwaro Ahazia, monwang’e Samaria kuma noyudo opondoe. Ne gikele ir Jehu mi ginege. Ne giyike maber, nikech ne giwacho ni en nyakwar Jehoshafat mane oluwo Ruoth Nyasaye gi chunye duto. Ne onge ng’ato e od Ahazia manyalo bedo ruoth.

¹⁰Kane Athalia min Ahazia oneno ni wuode osetho, nonego jood ruodh Juda duto.

¹¹To Jehosheba, nyar ruodh Jehoram nogolo Joash wuod Ahazia ling’ling’ kuom yawuot ruoth mane idwaro nego, mi opande e od nindo kaachiel gi japite. Jehosheba nyar ruoth Jehoram ma chi Jehoyada jadolo, kendo ma nyamin Ahazia nopando Joash, mi Athalia ne ok onege.

¹²Joash nodak kodgi kuom higni auchiel, kopondo e Od Nyasaye, e kinde mar loch Athalia.