Read luo 2 Weche mag Ndalo 23 Bible Online

2 Weche mag Ndalo 23 - luo bible

2 Weche mag Ndalo 23

¹E higa mar abiriyo, Jehoyada notimo chir motimo winjruok gi jotend ogend lweny, ma gin Azaria wuod Jehoram, gi Ishmael wuod Jehohanan, gi Azaria wuod Obed, gi Maaseya wuod Adaya, kod Elishafat wuod Zikri.

²Ne giwuotho e piny Juda duto ka gichoko jo-Lawi mane nie miech Juda duto, kod jodong dhout israel, mi gibiro Jerusalem.

³ Eka joma nochokore duto notimo singruok gi ruoth e Od Ruoth Nyasaye, kendo Jehoyada nowachonigi niya, “Neuru wuod ruoth! Waketeuru ruoth kaka Ruoth Nyasaye nowacho kuom nyikwa Daudi.

⁴Gima onego utim e ma: Un jodolo gi jo-Lawi kod jorit rangeye, pogreuru migepe adek. Migawo mokwongo mondo obi e Hekalu chieng’ Sabato. Migawo mar ariyo nyaka rit od ruoth,

⁵kendo migawo mar adek nyaka rit rangach miluongo ni Ranga Mise, to ji mamoko duto nobed e laru mar Od Ruoth Nyasaye.

⁶Jodolo gi jo-Lawi makonyogi kende ema nyalo donjo e Hekalu, nimar gin joma owal ni Ruoth Nyasaye, to ji mamoko duto kik donji kata achiel, kaluwore gi chik Ruoth Nyasaye.

⁷Jo-Lawi nyaka lwor ruoth ka girite, ka ng’ato ka ng’ato omako gilwenje e lwete. Ka ng’ato moro amora dwaro donjo e Hekalu, to negeuru. Bende kamoro amora ma ruoth dhiye, to koweuru kurite.”

⁸Jo-Lawi gi jo-Juda duto notimo gik moko duto mana kaka Jehoyada jadolo nochikogi. Ng’ato ka ng’ato kuomgi nokelo joge mane onego a e tich chieng Sabato, kaachiel gi mago mane onego ochak tich chieng’no, nimar Jehoyada jadolo ne ok omiyo migawo moro amora thuolo mara.

⁹Nopogo ni jotend askechego tonge gi kuodi kod okumbni mane mag ruoth Daudi mane okan e Od Ruoth Nyasaye.

¹⁰Nochano ji duto mondo orit ruoth, ka ng’ato ka ng’ato omako gilweny e lwete, chakre yo milambo nyaka nyandwat mar Hekalu, ka giluwo kendo-mar-misango kaachiel gi Hekalu.

¹¹Eka Jehoyada nogolo ruoth oko, mosidhone osimb duong’, kendo omiye kitap chik, mi gikete ruoth. Jehoyada gi yawuote nowire gi mo ka gikok niya, “Ruoth mondo odag aming’a!”

¹²Kane Athalia owinjo mahu mar joma ringo kendo pako ruoth, nodhi e Od Ruoth Nyasaye kama ne gintie.

¹³Noneno ruoth kochung’ e bath sich ruoth e dhoot, ka tung’ ywak kendo ji wer. Ji duto ne mor kendo ne goyo tung’, ka jower otelonigi gi thum. Athalia noyiecho lepe ka kok niya, “Ujemo! Ujemo!”

¹⁴Eka Jehoyada jadolo noluongo jatend askeche, mowachonigi niya, “Goleuru oko! Kik unege e Od Ruoth Nyasaye, kendo ka ng’at moro oluwe, to neguru ng’atno.”

¹⁵Omiyo ne gimake, kendo kane gichopo e dhoranga dala ruoth miluongo ni Ranga Farese, ne ginege kanyo.

¹⁶Eka Jehoyada, kaachiel gi ji kod ruoth bende, ne josingore ni ginibed jo-Ruoth Nyasaye.

¹⁷Mi ji duto nodhi momuko od Baal, gi kende-mag-liswa, kod kido duto mag Baal e nyim kende-mag-liswago.

¹⁸Jehoyada noketo jorit e Od Ruoth Nyasaye e bwo jodolo gi jo-Lawi. Daudi nosechano jodolo gi jo-Lawi mondo orit Od Ruoth Nyasaye, kendo omiye misengni miwang’o pep, kaka ondiki e chik Musa, ka giwero wende mor kaluwore gi chik mane en owuon ogolo.

¹⁹Jehoyada noketo jorit e dhorangeye mag Od Ruoth Nyasaye ni kik ng’ato man gi chola donjie.

²⁰Eka nodhi gi jotend askeche gi jodongo kod jotend ji kaachiel gi ji duto, kendo ne giwuok gi ruoth e Od Ruoth Nyasaye. Ne gikowe nyaka od ruoth, ka giluwo dhorangach mamalo, mi ne gikete e kom duong’ne.

²¹Kane Athalia oseneg, ji duto nobedo mamor, kendo Jerusalem nokue.