Read luo 2 Weche mag Ndalo 24 Bible Online

2 Weche mag Ndalo 24 - luo bible

2 Weche mag Ndalo 24

¹Joash ne jahigni abiriyo kane odoko ruoth, morito piny kuom higni piero ang’wen, kodak Jerusalem. Min mare ne nyinge Zibia nyar Beer-sheba.

²Timbe Joash ne long’o e nyim Ruoth Nyasaye kuom ndalo duto mag Jehoyada jadolo.

³Jehoyada noyudone mon ariyo, mane onywologo yawuowi gi nyiri.

⁴Bang’ mano Joash noketo chunye mondo olos Od Ruoth Nyasaye.

⁵Nochoko jodolo gi jo-Lawi, mowachonigi niya, “Wuothuru e miech Juda, usol pesa kuom jo-Israel duto mondo ulosgo od Nyasachu higa ka higa. Neuru ni utimo piyo.” To jo-Lawi ne ok otimo kamano.

⁶ Omiyo Ruoth noluongo Jehoyada jadolo maduong’, mopenje niya, “Ang’o momiyo ok ijiw jo-Lawi mondo osol osuru kuom jo-Juda gi jo-Jerusalem? En osuru mane Musa jatich Ruoth Nyasaye oketo kuom jo-Israel mondo olosgo Hemb-Romo.

⁷Neye kaka Athalia, dhako machachno, gi yawuote, oseketho Od Nyasaye, kendo gisekawo gik moko duto mitiyogo tich Nyasaye, mi giketo ni Baal.”

⁸Bang’e ruoth nogolo chik mondo olos sanduk, oket e dhood Hekalu mar Ruoth Nyasaye gi yo ka oko,

⁹kendo ogo milome e Juda gi Jerusalem duto mondo ji ochiw ni Ruoth Nyasaye osuru mane Musa jatich Nyasaye oketo kuom jo-Israel e thim.

¹⁰Mano omiyoo jodongo gi ji duto nokelo osuru gi mor, ma giketo e sandugno nyaka ne gitieko.

¹¹E kinde ka kinde mane jo-Lawi onenoe ka pesa ng’eny e sanduk, ne gitere ni jodong ruoth. Eka jogoro mar ruoth gi jatich jadolo maduong’ ne jobiro mondo okaw sanduk. Kane gisegolo pesa, ne gidwoko sanduk kare. Kamano e kaka ne gitimo pile pile, mi ne gichoko pesa mogundho.

¹²Ruoth kod Jehoyada nomiyo nyipeche mane rito tich loso Od Ruoth Nyasaye pesago. Jogo nondiko jogedo gi jopa bao kod joma olony e tich chuma, gi mula mondo olos Od Ruoth Nyasaye.

¹³Kamano jotich ne tiyo, kendo tich nodhi nyime malong’o e lwetgi, mi ne giloso Od Nyasaye maber kendo motegno, moloyo kaka ne en chon.

¹⁴Kane gisetieko tich, ne gikelo pesa modong’ ni ruoth gi Jehoyada, mi ne gilosogo tewni mag ubani gi agulini mag dhahabu gi mag fedha mondo okonyruokgo e Od Ruoth Nyasaye kuom misengni miwang’o pep, kod tije moko mag Hekalu. Ne gitimo misengni miwang’o pep e Od Ruoth Nyasaye pile pile ndalo duto mag Jehoyada.

¹⁵Jehoyada koro noti, kendo hike oniang’, mi notho kane en jahigni mia achiel gi piero adek.

¹⁶Ne oyike e dala Daudi but liete ruodhi, nikech nosetimo maber e Israel kotiyo ni Nyasaye, kendo koloso Hekalu.

¹⁷Kane Jehoyada osetho, jodong Juda nolondho ruoth, mi noyie luwo riekogi.

¹⁸Koro ji noweyo Od Ruoth Nyasaye, mi gitiyo ni sirni milamo gi nyiseche mamoko. Kethono nomiyo Nyasaye okecho kod jo-Juda gi jo-Jerusalem.

¹⁹Kata kamano nooronigi jonabi mondo odwokgi ire. Jonabigo nosiemogi, to ne gidagi winjo.

²⁰ Roho mar Nyasaye nobiro kuom Zekaria wuod Jehoyada jadolo, mi nochung’ kama oting’ore, mowacho ni ji niya, “Nyasaye owacho kama, ‘Ang’o momiyo uketho chikna, momiyo ok unyal yudo hawi? Un useweya, omiyo an bende aseweyou.’ ”

²¹To ne giriwore ni Zekaria mi ne gigoye gi kite e laru mar Od Ruoth Nyasaye kaka ruoth nochikogi, mi otho.

²²Kamano wi ruoth Joash nowil gi ng’wonoo mane Jehoyada otimone, konegoo Zekaria wuod Jehoyada ma notho kaywak niya, “Ruoth Nyasaye mondo one, kendo ochul kuor.”

²³Bang’ higa achiel jolweny ma jo-Aram nobiro monjo Joash. Ne gibiro Juda gi Jerusalem, mi ne ginego jodongo duto mag pinyno, to mwandu duto mane gikawo kuomgi ne gioro ni ruodh Damaski.

²⁴Kata nobedo ni jo-Aram nobiro gi jolweny manok, Ruoth Nyasaye nochiwo oganda maduong’ mag jolweny e lwetgi, nimar jo-Juda noseweyo Ruoth Nyasaye ma Nyasach kweregi. Kamano jo-Aram notimo gima buch Ruoth Nyasaye noseng’ado kuom Joash.

²⁵Kane jo-Aram osea, ne giweyo Joash kohinyore malit. Eka jodonge noriwone nikech remb wuod Jehoyada jadolo, mi ne ginege e kitandane. Kamano e kaka notho, mi ne giyike e dala Daudi, to ok kar yiko ruodhi.

²⁶Joma noriwone ne gin Zabad wuod Shimeath nyar Amon, kod Jehozabad wuod Shimrith nyar Moab.

²⁷Weche mang’eny mane jonabi okoro kuome ka gisiemego, kendo kaka noloso Od Ruoth Nyasaye, kaachiel gi timbe yawuote, ondiki e kitabu monyisie weche mag Kitap Ruodhi. Amazia wuode nodoko ruoth kare.