Read luo 2 Weche mag Ndalo 26 Bible Online

2 Weche mag Ndalo 26 - luo bible

2 Weche mag Ndalo 26

¹Jo-Juda duto noketo Uzia ruoth kar Amazia wuon mare, ka en jahigni apar gauchiel.

²Kane wuon mare osetho, nokawo dala mar Elath modwoko ni jo-Juda, eka nochiele gi ohinga.

³Uzia ne jahigni apar gauchiel kane odoko ruoth, morito piny kuom higni piero abich gariyo, kodak Jerusalem. Min mare ne nyinge Jekolia nyar Jerusalem.

⁴Timbe Uzia ne long’o e nyim Ruoth Nyasaye mana kaka timbe Amazia wuon mare.

⁵Noketo chunye kuom luwo Nyasaye e ndalo Zekaria, jal mane opuonje luoro Nyasaye, kendo ndalo duto mane oluwoe Ruoth Nyasaye, noyudo gueth.

⁶Uzia nodhi kedo gi jo-Filistia, momuko ohinga mar Gath gi mar Jabne kod mar Ashdod. Nogero mier e gweng’ Ashdod kod kuonde moko e piny Filistia.

⁷Nyasaye nokonye loyo jo-Filistia, gi jo-Arabu mane odak Gur-baal, kod jo-Meun.

⁸Uzia noketo ni jo-Amon osuru, kendo humbe nolak nyaka mbap Misri, nimar nosedoko ruoth maduong’ ahinya.

⁹Nogero kuonde maboyo mag ng’icho e Jerusalem e dhorangach kama ohinga ogomogo, gi e dhoranga Hoho, kod e giko ohinga, moketoe gilweny.

¹⁰E thim bende nogeroe kuonde maboyo mag siro lweny, kendo nokunyo yewni mang’eny, nimar ne en gi jamni mathoth e piny gode kendo e piny pap, bende ne en gi jopur gi jopith mzabibu mane tiyone e gode kod kuonde momew, nikech nohero pur.

¹¹Uzia ne nigi joma oikore ni lweny, mopog e migepe kaka Jeyel jagoro gi Maaseya jatelo nosechano. Achiel kuom jotend lweny mag ruoth ma nyinge Hanania ema noritogi.

¹²Kar romb jodong dhoudi mane thuondi mager wuokie ne alufu ariyo gii mia auchiel.

¹³Ne gin jotend jolweny marateke alufu mia adek gabiriyo gi mia abich (307,500) ma dikony ruoth kedo gi wasike.

¹⁴Uzia noiko ni jolweny kuodi gi tong’ gi ogute kod akor mag chuma, gi atunge gi kite midiro gorujre.

¹⁵Noloso masinde midirogo aserni gi kite madongo mane joma riek ofwenyo, moketo kuonde maboyo mag ng’icho, kod kuonde ma ohinga ogomogo e Jerusalem. Humbe nolak malach ahinya, kendo nodoko motegno nikech Ruoth Nyasaye nokonye miwuoro.

¹⁶Kane Uzia osedoko motegno kamano, nobedo jasunga mi okethore. Nochayo Ruoth Nyasaye ma Nyasache, modonjo ei Hekalu mar Ruoth Nyasaye mondo owang’ ubani e kendo-mar-ubani.

¹⁷To Azaria jadolo, kaachiel gi jodolo mamoko mag Ruoth Nyasaye piero aboro ma jochir noluwe mondo okwere,

¹⁸ ka giwachone niya, “Wang’o ubani ni Ruoth Nyasaye ok en tiji, Uzia, to en tich jodolo ma nyikwa Harun, mowal ni tijno. Aye Kama Ler! Iketho! Ruoth Nyasaye nyalo kumi nikech wachni.”

¹⁹To Uzia nokecho. Noyudo ka en gi tap mach e lwete, mondo owang’ie ubani. To kane mirima omake gi jodolo kamano, dhoho notuch e lela wang’e e nyim jodolo e Od Ruoth Nyasaye but kendo-mar-ubani.

²⁰Kane Azaria jadolo maduong’ gi jodolo duto orange, ne gineno dhoho e lela wang’e, mi gigole oko mapiyo. To en bende noreto mondo owuogi, nimar Ruoth Nyasaye nosechwade.

²¹Ruoth Uzia nobedo jadhoho nyaka chieng’ thone, emomiyo nodak e ot kar kende, kendo ne ok oyiene donjo e Od Ruoth Nyasaye. Jotham wuode nobedo jatend od ruoth, kendo norito piny.

²²Chakruok weche Uzia nyaka gikogi, Isaya janabi wuod Amoz ema nondiko.

²³ Uzia notho, moyike but kwerene e paw liete ruodhi, to ok e lietegi hie, nimar ne en jadhoho. Jotham wuode nodoko ruoth kare.