Read luo 2 Weche mag Ndalo 28 Bible Online

2 Weche mag Ndalo 28 - luo bible

2 Weche mag Ndalo 28

¹Ahaz ne jahigni piero ariyo kane odoko ruoth, morito piny kuom higni apar gauchiel, kodak Jerusalem. To timbene ne ok long’o e nyim Ruoth Nyasaye kaka timbe Daudi kwar mare ne long’o.

²Noluwo timbe maricho mag ruodhi mag Israel, mothedho koda ka kido mag Baal.

³Nowang’o ubani e holo mar Ben-hirom, kendo nowang’o yawuote ka misango, koluwo timbe makuero mag ogendini mane Ruoth Nyasaye oriembo mondo owe thuolo ni jo-Israel.

⁴Bende notimo misengni, kendo nowang’o ubani e hembko, gi ewi gode, kod e tiend yath moro amora motimo otiep.

⁵ Emomiyo Ruoth Nyasaye ma Nyasache ne ochiwe e lwet ruodh Aram, mi oloye, kendo omako joge mang’eny, motero Damaski. Bang’e Ruoth Nyasaye nochiwe e lwet ruodh Israel ma bende noloye, monego joge oyokre.

⁶Odiechieng’no, Peka wuod Ramalia nonego jo-Juda ma thuondi mia achiel gi piero ariyo. Ne ologi nikech ne giseweyo Ruoth Nyasaye ma Nyasach kweregi.

⁷Zikri thwon Efraim nonego Maaseya wuod ruoth, gi Azkiram jaduong’ od ruoth, kod Elkana jalup ruoth.

⁸Jo-Israel nomako owetegi alufu mia ariyo, (200,000) kaachiel gi mondgi gii nyithindgi machwo kod manyiri. Bende ne giyako mwandugi mang’eny ma gitero Samaria.

⁹To noyudo ka janabi mar Ruoth Nyasaye ni kuno ma nyinge Oded. Nodhi romo ni jolweny mane dok Samaria, mowachonigi niya, “Ruoth Nyasaye ma Nyasach kwereu nochiwo jo-Juda e lwetu nimar nokecho kodgi, to un koro usenegogi achadha marach, mi wachno osetundo e polo.

¹⁰To eka pod udwaro ni mondo jo-Juda gi jo-Jerusalem machwo gi mamon obed wasumbni mau! Un uwegi donge un gi ketho e nyim Ruoth Nyasaye ma Nyasachu?

¹¹Koro winjuru! Weuru oweteu mane umako odhi, nimar Ruoth Nyasaye chiegni kecho kodu.”

¹²Azaria wuod Johanan gi Berekia wuod Meshilemoth gi Jehizkia wuod Shalum kod Amasa wuod Hadlai ma jodong Efraim bende nodhi romo ni joma ne a e lweny,

¹³mokwerogi, kawachonigi niya, “Ok unyal kelo joma omaki kaeni, nimar kutimo kamano, to ubiro miyo waketho e nyim Ruoth Nyasaye, kwamedo richo ewi mago mane wasetimo. Kethowa osebedo mang’eny ahinya, omiyo Ruoth Nyasaye okecho malich gi jo-Israel.”

¹⁴Kane jolweny owinjo wechego, ne gigonyo joma omaki, kendo ne gidwoko gik mane oyaki, ka jodongo gi joma nochokore neno.

¹⁵Mi joma nyinggi oseluongigo nokonyo joma omaki, kamiyo joma ne ni duge nengni mogol kuom gik moyaki. Ne gichiwonigi lewni kod wuoche, kendo ne gimiyogi chiemo, bende ne giwirogi gi mo. Ne giting’o jogo duto moyomno gi kenje, ka giterogi kuom jowetegi Jeriko, dala mar othidhe. Bang’e ne gidok Samaria.

¹⁶E kindeno ruoth Ahaz nokwayo ruodh Asuria mondo okonye,

¹⁷nikech jo-Edom noseduogo momonjo jo-Juda, mi oloyo, kendo omako ji mang’eny.

¹⁸Jo-Filistia bende nosemonjo miech Juda manie piny pap kod manie thim. Ne gikawo Beth-shemesh gi Aijalon gi Gederoth kod Soko gi Timna gi Gimzo kod mier mokiewo kodgi, mi gidakie.

¹⁹Ruoth Nyasaye nothiro jo-Juda nikech Ahaz ruodhgi notimo timbe machach e Juda, koweyo Ruoth Nyasaye.

²⁰Tiglath-pileser ruodh Asuria nobiro ir Ahaz, to kar konye, to nomonje.

²¹Emomiyo Ahaz nokawo gik moko e Od Ruoth Nyasaye gi od ruoth kod ut jodongo, momiyo ruodh Asuria kaka osuru, to mano ne ok okonye.

²²To Ahaz achielni nomedo ketho ni Ruoth Nyasaye e ndalo mar chandruokne,

²³nikech notimo liswa ni nyiseche mag jo-Damaski mane oyudo oseloye. Nowacho niya, “Abiro golo liswa ni nyiseche mag ruodhi Aram, mondo okonya kaka ne gikonyo ruodh Aram.” To ne gimiyo othirno kaachiel gi jo-Juda duto.

²⁴Bende Ahaz nochoko gik lemo mag Od Nyasaye, mong’ado ong’ado. Noloro dhout Hekalu mar Ruoth Nyasaye, kendo nogero kende-mag-liswa kuonde duto e Jerusalem.

²⁵Noloso hembko e mier duto mag Juda mondo owang’ie ubani ni nyiseche manono, kokwinyogo Ruoth Nyasaye ma Nyasach kwerene.

²⁶Chakruok weche Ahaz nyaka gikogi, kaachiel gi timbene duto, ondiki e Kitap Ruodhi mag Juda gi Israel.

²⁷ Ahaz notho, moluwo kwerene, mi noyike Jerusalem, to ok e liete ruodhi Israel. Hezekia wuode nodoko ruoth kare.