Read luo 2 Weche mag Ndalo 29 Bible Online

2 Weche mag Ndalo 29 - luo bible

2 Weche mag Ndalo 29

¹Hezekia ne jahigni piero ariyo gabich kane odoko ruoth, morito piny kuom higni piero ariyo gochiko, kodak Jerusalem. Min mare ne nyinge Abija nyar Zekaria.

²Timbe Hezekia ne long’o e nyim Ruoth Nyasaye, kaka timbe Daudi kwar mare.

³E due mokwongo mar higa mane ochakoe lochne, noyawo dhout Hekalu mar Ruothh Nyasaye, moloso.

⁴Noluongo jodolo gi jo-Lawi, mochoko e laru ma yo wuokchieng’,

⁵mi nowachonigi niya, “Winjuru un jo-Lawi! Pwodhreuru, kendo upwodh Od Ruoth Nyasaye ma Nyasach kwereu, kugolo chilo man Kama Ler.

⁶Kwerewa noweyo Ruoth Nyasaye ma Nyasachwa kane gitimo timbe maricho e nyime. Ne giweye, mi gilokone ng’egi, kendo kata mana kar dakne, ne ok gidwar neno.

⁷Bende ne ginego teyni, mi giloro dhout agola, kendo ne giweyo wang’o ubani kata timo misengni miwang’o pep ni Nyasach Israel e Hekalu.

⁸Emomiyo Ruoth Nyasaye nokecho, moloko jo-Juda gi Jerusalem gima lich miwuoro, mabwogo ji, kendo michicho, kaka uneno uwegi.

⁹Mano emomiyo wuonewa notho e lweny, kendo yawuotwa gi nyiwa kod mondwa oseter kuma bor e tuech.

¹⁰Koro adwaro singora ni Ruoth Nyasaye ma Nyasach Israel ni wanamak chikne, mondo chunye olend kuom mirima mager ma en go kodwa.

¹¹Un nyithinda, kik koro umalru, nimar Ruoth Nyasaye oseyierou mondo uti e nyime ka jodolone, kutimone misengni.”

¹²Eka Mahath wuod Amasai gi Joel wuod Azaria ma joka Kohath, kod Kish wuod Abdi gi Azaria wuod Jahalel ma joka Merari, kod Joa wuod Zima gi Eden wuod Joa ma joka Gershon,

¹³kod Shimri gi Jeuel ma joka Elizafan, kod Zekaria gi Matania ma joka Asaf,

¹⁴kod Jehuel gi Shimei ma joka Heman, kod Shemaya gi Uziel ma joka Jeduthun, ma duto jo-Lawi,

¹⁵nochoko jowetegi kaachiel. Ne gipwodhore giduto, eka ne gidonjo e Od Ruoth Nyasaye, mi gilose kaka ruoth nochikogi e nying Ruoth Nyasaye.

¹⁶Jodolo nodonjo e ot maiye mar Hekalu mondo gilosi. Ne gigolo chilo duto mane giyudo e Od Ruoth Nyasaye, mi giketo e laru mar Hekalu, eka jo-Lawi nokawo chilono, motero e aora Kidron.

¹⁷Ne gichako tich loso hekalu chieng’ mokwongo mar due mokwongo, mi ne gichopo e agoch Hekalu chieng’ mar aboro mar dueno. Eka ne giloso Od Ruoth Nyasaye kuom ndalo aboro moko, mi ne gitieko tich chieng’ mar apar gauchiel mar due mokwongono.

¹⁸Bang’e ne gidhi ir ruoth Hezekia e ode, mi giwachone niya, “Waseloso Od Ruoth Nyasaye duto, kaachiel gi kendo-mar-misango, kod mesa mar makati miketo e nyim Ruoth Nyasaye pile, kaachiel gi gik lemo duto.

¹⁹Bende gik moko duto mane ruoth Ahaz owito e ndalo lochne kane oweyo Ruoth Nyasaye, waseiko mwapwodho, kendo koro waseketogi e nyim kendo-mar-misango mar Ryuoth Nyasaye.”

²⁰Kinyne Hezekia nochiew gokinyi mang’ich, moluongo jodong Jerusalem kanyakla, mi gidhi e Od Ruoth Nyasaye.

²¹Ne gikelo ruedhi abiriyo gi rombe abiriyo gi nyirombe abiriyo kod nyuogi abiriyo, mondo gitimgo misango mar go richo mag dhood joka ruoth gi mag jodolo kod mag jo-Juda duto. Nochiko jodolo ma nyikwa Harun mondo otim kodgi misango e kendo-mar-misango mar Ruoth Nyasaye.

²²Omiyo noyang’ ruedhi gi imbe kod nyirombe, kendo rembgi nomi jodolo, moolo e kendo-mar-misango.

²³Eka nokel nyuogi mag misango mar golo richo e nyim Ruoth gi joma ochokore, mi ne giketo lwetgi kuomgi.

²⁴Bang’e jodolo noyang’ogi mi gitimo misango mar golo richo kod rembgi e kendo-mar-misango mondo ochulgo richo mag jo-Israel duto. Ne gitimo kamano nikech ruoth nochiko mondo otim misango miwang’o pep, kod misango mar golo richo, mondo opwodhgo richo mag jo-Israel duto.

²⁵Hezekia noketo jo-Lawi e Od Ruoth Nyasaye, momiyogi thumbe mopogore opogore, kaluwore gi chik Daudi, gi mar Gad janen mar ruoth, kod mar Nathan janabi. Chik mane jonabi ogolono noa kuom Ruoth Nyasaye.

²⁶Kane jo-Lawi oseikore gi thumbe mane Daudi oloso, kendo jodolo bende oikore gi tungegi,

²⁷Hezekia nogolo chik mondo otim misango miwang’o pep e kendo-mar-misango. Kane jodolo ochako timo misango miwang’o pepno, jo-Lawi bende nochako wer, kendo ne gigoyo tung’ kaachiel gi thumbe mane Daudi ruodh Israel oloso.

²⁸Joma nochokore duto nolamo Nyasaye, ka jower wer, kendo jogo tung’ goyo tungegi. Mano nodhi nyime nyaka misango miwang’o pep norumo.

²⁹Eka ruoth kod ji duto mane ni kode nokulore, kalamo Ruoth Nyasaye.

³⁰Bang’e ruoth Hezekia kod jodonge nochiko jo-Lawi mondo opak Ruoth Nyasaye gi wende mane Daudi kod Asaf janen ochwogo. Ne giwer gi mor, kendo ne gikulore ka gilamo Ruoth Nyasaye.

³¹Eka Hezekia nowacho niya, “Kaka usechiworu ni Ruoth Nyasaye, koro keluru misengni mag erokamano e Od Ruoth Nyasaye.” Mi joma nochokore nokelo misengni mag erokamano.

³²Gik mane okel mondo otimgo misango miwang’o pep, ne gin ruedhi piero abiriyo, gi imbe mia achiel, kod nyirombe mia ariyo. Mago duto nochiw mondo otimgo misango miwang’o pep ni Ruoth Nyasaye.

³³To mago mane okel ni mondo otimgo misengni mag erokamano ne ruedhi mia auchiel gi rombe alufu adek.

³⁴Jodolo ne nok ahinya, mane ok nyal yang’o jamni mitimogo misengni miwang’o pep, emomiyo jowetegi ma jo-Lawi nokonyogi tich nyaka jodolo moko notieko pwodhore. Jo-Lawi ne jokinda kuom tich pwodhruokgi moloyo jodolo.

³⁵Ewi tich timo misengnigo ne nitie bende tich dolo mar wang’o bor mag misengni mag erokamano, kaachiel gi misengni miolo piny kuom misengni miwang’o pep. Kamano e kaka tich Od Ruoth Nyasaye nodwok kare,

³⁶Hezekia gi joge duto ne mor nikech gima Nyasaye nosetimonigi, nimar gino nitimore apoya.