Read luo 2 Weche mag Ndalo 3 Bible Online

2 Weche mag Ndalo 3 - luo bible

2 Weche mag Ndalo 3

¹ Solomon nochako gero Od Ruoth Nyasaye Jerusalem e laru mar Ornan ja-Jebus, mane nie got Moria. Daudi wuon mare ema noyiero laruno nikech Ruoth Nyassye nofwenyorene kanyo.

²Nochako gedo e due mar ariyo e higa mar ang’wen mar lochne.

³Hekalu mane Solomon dwaro gero ni Ruoth Nyasaye ne romo kama: Borne ne mita piero adek, to lachne ne mita apar.

⁴Bor mar agola mane nie nyim Hekalu ne romo mita apar, maromre gi lach mar Hekalu, kendo borne modhi malo ne mita apar. Nobawo iye gi dhahabu maler.

⁵Hekalu to nochwado iye gi saipras, kendo obawo gi dhahabu maler, mogoroe othidhe gi thiwni.

⁶Nolicho Hekalu gi kite mamil ma nengogi tek.

⁷Dhahabu mane ogolo Parvein ema nobawogo Hekalu duto, koda ka sirni, gi pewe dhoudi, gi kor ot, kod dhoudi, kendo nogoro kido maket gi malaika miluongo ni kerubi e kor ot.

⁸ Kama Ler Moloyo, to nogero kama: Borne ne romo mita apar, maromre gi lach mar Hekalu duto, to lachne bende mita apar. Nobawe gi dhahabu ma pekne oromo mita piero ariyo.

⁹Pek dhahabu mar musmal mane otiyogo noromo nus kilo. Nobawo udi mamalo bende gi dhahabu.

¹⁰ Kama Ler Moloyo nolosoe kerubi ariyo kod bao, mobao gi dhahabu.

¹¹Bor mar bwombe kerubigo ne romo mita apar, nikech bor bwom ka bwom ne mita ariyo gi nus.

¹²Bwom achiel mar kerubi ka kerubi nogik e kor ot. To bwombege modong’ noromo e dier ot.

¹³Bwombegi noyarore mi borgi duto ne romo mita apar. Kerubigo nochung’ komanyo Kama Ler.

¹⁴ Noloso pasia gi law mambulu, gi maralik, gi makwar, kod law katana maber, motwang’ie kido mag Kerubi.

¹⁵Noloso sirni ariyo ma borgi ne romo mita ochiko, moketo e nyim Hekalu. Noumo wi siro ka siro gi gima chal gi agulu maduong’ ma borne romo mita ariyo gi nus.

¹⁶Noloso thiwni machal gi tik ng’ut motueyo kuom agulinigo. Bang’e noloso gik mong’inore ong’inore mag mula mia achiel, mi oliero e thiwnigo.

¹⁷Nochungo sirnigo e nyim Hekalu, koketo achiel korachwich, to machielo koracham. Mano mane oketo korachwich nochako ni Jakin, to ma koracham nochako ni Boaz.