Read luo 2 Weche mag Ndalo 30 Bible Online

2 Weche mag Ndalo 30 - luo bible

2 Weche mag Ndalo 30

¹ Hezekia nooro joote ir jo-Israel gi jo-Juda duto, kendo nondiko barupe bende ni jo-Efraim gi jo-Manase koluongogi ni mondo gibi Jerusalem e Od Ruoth Nyasaye mondo gitim Sap Pasaka ni Ruoth Nyasaye ma Nyasach Israel.

²Ruoth noseporo wach gi jodonge kod jobura duto man Jerusalem ni mondo gitim Pasaka e due mar ariyo.

³Ne ok ginyal time e ndalo monego timee, nimar jodolo ne pok opwodhore mang’eny moromo, to ji bende ne pok ochokore Jerusalem.

⁴Wachni ne ber ni ruoth kod jobura duto.

⁵Kamano ne ging’ado bura mondo ogo milome e Israel duto, chakre Beer-sheba, yo milambo nyaka Dan, yo nyandwat, mondo ji obi Jerusalem otim Pasaka ni Ruoth Nyasaye ma Nyasach Israel, nikech ji ne pok otime mang’eny kaka chik dwaro.

⁶Omiyo joote nodhi e piny Israel gi Juda duto, kaka ruoth nochiko, ka gitero barupe moa kuom ruoth gi jodonge, mondikie niya, “Un jo-Israel mosetony e lwet ruodhi mag Asuria, koro duoguru ir Ruoth Nyasaye ma Nyasach Ibrahim gi Isaka kod Israel, mondo en bende oduog iru.

⁷Kik uchal gi kwereu kod oweteu mane oweyo ruoth Nyasaye ma Nyasach kweregi, momiyo noweyogi ma gikethore chuth kaka uneno.

⁸Koro kik utim wichteko kaka kwereu notimo, to chiwreuru ni Ruoth Nyasaye, kendo udonj e Hekalu, ma Ruoth Nyasaye oseguedho mondo obed mare nyakachieng’. Tiuru ni Ruoth Nyasaye ma Nyasachu, mondo chunye olend kuom mirima mager ma en go kodu.

⁹Kuduogo kuom Ruoth Nyasaye, eka oweteu gi nyithindu noyud ng’wono kuom joma nomakogi, mi giniduogi e pinyni, nimar Ruoth Nyasaye ma Nyasachu ng’won, kendo jamiwafu, omiyo ka uduogo kuome, to ok noloknu ng’eye.”

¹⁰Kamano joote nodhi e dala ka dala e piny Efraim gi Manase duto nyaka Zebulun, to ji nonyierogi anyiera ka charogi.

¹¹Mak mana jomoko manok ma chunygi muol ema noa Asher gi Manase kod Zebulun, mobiro Jerusalem.

¹²To piny Juda ema ne Nyasaye otiyoe gi teko, momiyogi chuny achiel mar winjo wachne kaka ruoth gi jodonge nochikogi.

¹³Omiyo ji mang’eny nochokore Jerusalem e due mar ariyo, mondo gitim Sap Makati maduong’ miwuoro.

¹⁴Ne gigolo kende-mag-liswa duto mane ni Jerusalem, kaachiel gi kende miwang’oe ubani, mi giwito e holo Kidron.

¹⁵Ne ginego nyarombo mar Pasaka chieng’ due apar gang’wen mar due mar ariyo. Jodolo gi jo-Lawi noyudo wichkuot, omiyo ne gipwodhore mi gikelo misengni miwang’o pep e Od Ruoth Nyasaye.

¹⁶Ne gikawo keregi e tich, kaluwore gi chik Musa ng’at Nyasaye, kendo jodolo nokiro remo mane jo-Lawi ogamonigi.

¹⁷Ne nitie ji mang’eny e chokruok mane pok opwodhore, omiyo jo-Lawi nonego nyarombo mar Pasaka ni ng’ato ka ng’ato mane ok ler, mondo opwodhe ni Ruoth Nyasaye.

¹⁸Adieri, ji mathoth, ma ng’enygi noa Efraim gi Manase gi Isakar kod Zebulun, ne pok opwodhore, to kata kamano ne gichamo Pasaka, ka ok giluwo chik. To Hezekia nokwayonigi kawacho niya, “Ruoth Nyasaye mang’won, ma Nyasach kwerewa, mondo ong’won ni ng’ato ka ng’ato

¹⁹moketo chunye kuome, kata obedo ni ng’atno ok opwodhore kaka chik Hekalu dwaro.”

²⁰Mi Ruoth Nyasaye nowinjo kwayo Hezekia moweyo ni ji kethogi.

²¹Jo-Israel mane ni Jerusalem notimo Sap Makati ma ok ketie Thowi gi mor maduong’ kuom ndalo abiriyo, kendo jo-Lawi gi jodolo ne pako Ruoth Nyasaye odiechieng’ kodiechieng’, ka giwerne gi tekogi duto.

²²Hezekia nopako jo-Lawi duto, nimar ne gitiyo ni Ruoth Nyasaye ma Nyasach kweregi.

²³Eka joma nochokorego duto noyie ni mondo gimed timo sawo kuom ndalo abiriyo moko, mi ne gitimo kamano gi mor.

²⁴Hezekia ruodh Juda nomiyogi ruedhi alufu achiel gi rombe alufu abiriyo mondo gitimgo misango, to jodongo nochiwo ruedhi alufu achiel gi rombe alufu apar. Mi jodolo mang’eny ahinya nopwodhore.

²⁵Joma nochokore duto mane oa Juda, kod jodolo gi jo-Lawi, kaachiel gi ji mane oa Israel kod jodak manie Israel gi Juda ne jobedo gi mor maduong’.

²⁶Kamano ne nitie mor maduong’ ahinya Jerusalem, nimar chakre ndalo Solomon wuod daudi ruodh Israel, gimoro machal kamano ne pok otimore Jerusalem.

²⁷Jodolo gi jo-Lawi noguedho joma nochokore, mi Nyasaye nowinjogi, ka lemogi otundo kar dakne e polo.