Read luo 2 Weche mag Ndalo 31 Bible Online

2 Weche mag Ndalo 31 - luo bible

2 Weche mag Ndalo 31

¹Kane mago duto oserumo, jo-Israel duto mane osechokore Jerusalem nodhi e miech Juda. Ne gimuko sirni milamo mag kite gi mag yien, gi ut lemo mag hembko, kod kende-mag-liswa e piny Juda gi Benjamin kod Efraim gi Manase, nyaka ne gitieko kethogi duto te. Eka jo-Israel duto nodok e miechgi.

²Bang’e Hezekia nopogo jodolo gi jo-Lawi e migepe mopogore opogore, kaka tichgi nobet. Moko noketo mondo otim misengni miwang’o pep, to moko misengni mag sawo, kendo moko mondo orit dhorangeye mag Od Ruoth Nyasaye, to moko mondo ogo erokamano kendo opak Ruoth Nyasaye gi wer.

³ Ruoth ne golo kuom mwandune owuon gik mitimogo misengni miwang’o pep okinyi godhiambo, kod miwang’o e ndalo mag Sabato, kendo ka due opor, kendo e ndalo mag sewni moketi, kaka ondiki e chik Ruoth Nyasaye.

⁴ Bende nochiko joma nodak Jerusalem mondo ochiw ni jodolo gi jo-Lawi pokgi, mondo gichiwre ni chopo chik Ruoth Nyasaye.

⁵Kane wachni oselandore e piny, jo-Israel nochiwo cham ma gikwongo kayo, gi divai ma gikwongo loso, gi mor zeituni mokwongo nyak, gi mor kich, kod gik moko mag puodho, kendo ji mang’eny nokelo achiel kuom apar mag gik moko duto.

⁶Jo-Juda gi jo-Israel mane odak e miech Juda nokelo achiel kuom apar mar dhok gi rombe bende, kod gik mosechiw ni Ruoth Nyasaye ma Nyasachgi, mi ne giketogi pidhe pidhe.

⁷Ne gichako dhuro pidhego e due mar adek, kendo ne gitieko dhurogi e due mar abiriyo.

⁸Kane Hezekia gi jodonge obiro moneno pidhego, ne gipako Ruoth Nyasaye gi joge Israel bende.

⁹Eka Hezekia nopenjo jodolo gi jo-Lawi wach pidhego,

¹⁰mi Azaria jadolo maduong’, ma jadhood Zadok, nodwoke niya, “Nyaka ne gichak kelo chiwo e Od Ruoth Nyasaye, wasechiemo mwayieng’, kendo chiemo mang’eny pod odong’, nimar Ruoth Nyasaye oseguedho joge. Mano emomiyo wadong’ gi chiemo mang’enygi.”

¹¹Eka Hezekia nochikogi mondo gilos kuonde keno e Od Ruoth Nyasaye. Kane gisetimo kamano,

¹²ne gikano chiwo mag achiel kuom apar, kod gik mochiw ni Ruoth Nyasaye kaka nochikgi. Konania ja-Lawi ne jarit maduong’ mar gigo, kendo Shimei omin mare nobedo jalupne,

¹³to ruoth Hezekia gi Azaria jaduong’ Hekalu noketo Jehiel gi Azazia gi Nathan gi Azahel gi Jerimoth gi Jozabad gi Eliel gi Ismakia gi Mahath kod Benaya mondo okonygi.

¹⁴Koreh wuod Imna ja-Lawi ma jarit dhorangach ma yo wuok chieng’ norito gik ma ji chiwo ni Nyasaye kuom herogi. Tichne ne en pogo ni jodolo gik mochiw ni Ruoth Nyasaye, kod chiwo maler moloyo.

¹⁵Eden gi Miniamin gi Jeshua gi Shemaya gi Amaria kod Shekania ne konyo Koreh gi Kinda, ka gidak e miech jodolo. Ne gipogo gik moko ni owetegi madongo gi matindo duto te,

¹⁶mosetieko higni adek, mak mana joma chwo ma nyinggi nosechan ema ne ok pognigi gimoro, nikech ne giyudo pokgi pile, ka gidhi e Od Ruoth Nyasaye mondo giti tichgi e migepegi.

¹⁷Jodolo nochan kaluwore gi dhoutgi, to jo-Lawi mosetieko higni piero ariyo nochan kaluwore gi tichgi.

¹⁸Jodolo nochan kaachiel gi mondgi kod nyithindgi machwo gi manyiri duto, nimar ne gitimo kinda kuom bedo joma kare e nyim Nyasaye.

¹⁹Noyier ji moko e mier mopogore opogore mondo opog gik moko ni jodolo ma nyikwa Harun mane odak oko e puothe man but miechgi madongo, kendo ni jo-Lawi duto ma nyinggi osechan.

²⁰Kamano e kaka Hezekia notimo e piny Juda duto. Timbene ne beyo e nyim Ruoth Nyasaye ma Nyasache, kendo ne ok oweye.

²¹Tije duto ma notimo e Od Nyasaye notimo koluwo chik, kendo kodwaro Nyasaye gi chunye duto, mi noyudo gueth.