Read luo 2 Weche mag Ndalo 32 Bible Online

2 Weche mag Ndalo 32 - luo bible

2 Weche mag Ndalo 32

¹Kata obedo ni Hezekia nosetiyo ni Nyasaye maber kamano, Senakerib ruodh Asuria, nobiro momonjo jo-Juda, kendo nolworo miechgi mochiel gi ohinga ni mondo okaw.

²Kane Hezekia oneno ni Senakerib ruodh Asuria osebiro mondo omonj Jerusalem,

³noporo wach gi joge kod joma rateke ni mondo odin sokni mane chiegni gi Jerusalem, mi ne gikonye timo kamano.

⁴Ji mang’eny nochokore, mi ne gidino sokni gi aore mane mol kanyo, ka giwacho niya, “Onge gimomiyo ruodhi Asuria onego oyud pi mang’eny kama ka gibiro ka.”

⁵Hezekia noketo chunye moloso ohinga kuonde duto momukore, kendo nomedo geroe kuonde maboyo mag ng’icho. Nogero ohinga machielo molworo mokwongono, kendo noloso Milo mane nie dala Daudi mondo obed motegno. Bende noloso gilweny kod okumbni mogundho.

⁶Noketo jodong lweny mondo otel ni ji, mi noluongogi ire e laru manie dhorangach. Eka notego chunygi kowachonigi niya,

⁷“Jiwreuru kendo timuru chir. Kik uluor ruodh Asuria, kendo oganda lweny maduong’ mobirogo kik bwogu, nimar Jal makonyowa tek moloyo jal makony.

⁸Teko mar dhano ema en go, to wan, Ruoth Nyasaye ma Nyasachwa ema konyowa, kendo kedo lwenjewa.” Kane ji owinjo weche Hezekia ruodh Juda, ne gitimo chir.

⁹Beng’ mano Senakerib ruodh Asuria mane oyudo olworo Lakish kod ogandane duto mag lweny, nooro joote Jerusalem ir Hezekia ruodh Juda gi jo-Juda duto ma nodak kuno, kowacho niya,

¹⁰“Senakerib ruodh Asuria owacho kama: Ugeno kuom ang’o momiyo uhedhoru mondo uked kodwa kwamonjo Jerusalem?

¹¹Ok upar ni Hezekia witou mondo kech gi riyo onegu kowachonu ni Ruoth Nyasaye ma Nyasachu biro resou e lwet ruodh Asuria?

¹²Donge Hezekia achielni osegolo hembko man kuonde moting’ore gi kende duto mag misango mag Ruoth Nyasaye, kochiko jo-Juda gi jo-Jerusalem niya, ‘Unulam e nyim kendo-mar-misango achiel kende, kendo wi kendono ema unuwang’ie misengini mau?’

¹³Donge ung’eyo gik mwasetimo gi kwerewa ni jopinje moko? Bende nyiseche jopinjego duto ne nyalo resogi e lweta adier?

¹⁴Kuom nyiseche duto mag ogendini mane kwerena otieko chuth, ere moro mane nyalo reso joge e lweta, momiyo ugeno ni Nyasachu dinyal resou?

¹⁵Omiyo koro kik uyie Hezekia wuondu kendo witu kamano, bende kik uyie wechene, nimar onge nyasach oganda moro kata piny moro amora mane nyalo reso joge e lweta kata e lwet kwerena. To koro ere kaka Nyasachu diresu e lweta?”

¹⁶Jootene nomedo wuoyo marach kuom Ruoth Nyasaye, kendo kuom Hezekia jatichne.

¹⁷Bende Senakerib nondiko barupe mojarogo Ruoth Nyasaye ma Nyasach Israel kowuoyo marach kuome niya, “Kaka nyiseche mag jopinjego ne ok nyal resogi e lweta, e kaka Nyasach Hezekia bende ok nores joge e lweta.”

¹⁸Jootego nowacho kamano ni jo-Jerusalem mane ni ewi ohinga, ka gikok gi duol maduong’ gi dho jo-Juda mondo obwoggi kendo omigi luoro, eka mondo gikaw dalano.

¹⁹Ne giwuoyo kuom Nyasach Jerusalem mana kaka ne giwuoyo kuom nyiseche mag jopinje mamoko molos gi lwet dhano.

²⁰Omiyo ruoth Hezekia kod Isaya janabi ma wuod Amoz nolemo ka ywak ni Nyasaye.

²¹Eka Ruoth Nyasaye nooro malaika e kambi mar ruodh Asuria, motieko thuondi gi jodongo kod jotend jolweny duto. Omiyo nodok e pinye ka en gi wichkuot. To kane odonjo e od nyasache, yawuote moko nonege kanyo.

²²Kamano Ruoth Nyasaye noreso Hezekia gi jo-Jerusalem e lwet Senakerib ruodh Asuria kendo e lwet wasike duto, mi nomiyogi kue e mbapgi duto.

²³Ji mang’eny nobiro Jerusalem, ka gikelo ni Ruoth Nyasaye mich, kendo Hezekia ruodh Juda bende ne gimiyo gik ma nengogi tek, kendo chakre kanyo ogendini duto nomiye duong’.

²⁴E ndalogo Hezekia nobedo matuo modwaro tho, mi nokwayo Ruoth Nyasaye, mowinje kendo omiye ranyisi.

²⁵To Hezekia ne ok odwoko erokamano marom gi ber mane otimne, to nodoko jasunga. Emomiyo ruoth Nyasaye nokecho kode kaachiel gi jo-Juda kod jo-Jerusalem.

²⁶To Hezekia nobolore moweyo sunga. Jo-Jerusalem bende notimo kamano. Omiyo Ruoth Nyasaye ne ok osandogi e ndalo duto mag Hezekia.

²⁷Hezekia ne nigi mwandu mang’eny kod huma maduong’. Noloso ut keno mag kano fedha gi dhahabu gi kite ma nengogi tek gi gik mang’ue ng’ar gi okumbni kod gik moko mabeyo mopogore opogore.

²⁸Nogoyo dere mag cham, kendo nochueyo degi mag divai gi mag mo, kendo nogero kunde jamni mopogore opogore kod abich rombe.

²⁹Bende nogero mier modakie, kendo nobedo gi rombe gi dhok mogundho, nimar Nyasaye nomiye mwandu mang’eny ahinya.

³⁰Hezekia nogono nogeng’o soko mar Gihon gi yo ka malo, mochiko pi, mi omol kochomo dala Daudi yo podho chieng’. Tije duto mane Hezekia ochako, notieko maber.

³¹Kamano bende e kaka notieko wach joote jodong Babulon, mane oor ire mondo onon tiend hono ma nosetimore e pinye. Chutho Nyasaye noweye kende e wachno, to mana ni mondo oteme, kendo mondo ong’ego gima nie chunye.

³²Weche modong’ mag Hezekia gi timbene mabeyo ondik e weche mag Isaya janabi wuod Amoz e Kitap Ndalo mag Ruodhi mag Juda gi Israel.

³³Hezekia notho moluwo kwerene mi ne giyike gi yo ka malo mar liete joka Daudi. Jo-Juda gi jo-Jerusalem duto ne joyike gi luor maduong’. Manase wuode nodoko ruoth kare.