Read luo 2 Weche mag Ndalo 33 Bible Online

2 Weche mag Ndalo 33 - luo bible

2 Weche mag Ndalo 33

¹Manase ne jahigni apar gariyo ka nodoko ruoth, kendo norito piny kuom higni piero abich gabich kodak Jerusalem.

² Timbene ne richo e nyim Ruoth Nyasaye kaka timbe makuero mag ogendini mane Ruoth Nyasaye oriembo mondo owe thuolo ni jo-Israel.

³Nochako oloso hembko man kuonde moting’ore mane Hezekia wuon mare oseketho, kendo nogero kuonde liswa ni Baal. Nochungo sirni milamo, kendo nolamo sulue duto kotiyonigi.

⁴ Nogero kende-mag-liswa ei Hekalu, mane Ruoth Nyasaye osewuoyo kuome niya, “Jerusalem ema nyinga nobedie nyaka chieng’.”

⁵Nogero kende mag liswa ni sulue duto e laru ariyo mag Od Ruoth Nyasaye.

⁶Nowang’o yawuote bende ka liswa e holo mar wuod Hinom. Noyie gi jokor wach gi jonyakalondo kod ajuoke. Timbene maricho ne ng’eny e nyim Ruoth Nyasaye, omiyo Ruoth Nyasaye nokecho kode.

⁷ Kido mar nyasaye manono ma noseloso, noketo ei Hekalu. To Nyasaye nosewuoyo kuom Hekaluno, kowacho ni Daudi gi Solomon wuod daudi niya, “Aseyiero Hekaluni gi Jerusalem kuom dhoudi duto mag Israel mondo nyinga obedie nyaka chieng’.

⁸Ka jo-Israel orito kendo otimo gik moko duto ma nachikogi, kendo oluwo buche gi chike duto mane Musa onyisogi, to ok nariembgi e piny mane amiyo kweregi.”

⁹Manase nosemo jo-Juda gi jo-Jerusalem, mi ne gimedo timo richo e nyim Ruoth Nyasaye moloyo ogendini mane Ruoth Nyasaye otieko mondo owe thuolo ni jo-Israel.

¹⁰Ruoth Nyasaye nowuoyoo gi Manase kod joge, to ne ok gidewe.

¹¹Emomiyo Ruoth Nyasaye nomiyo jotend jolweny mag ruodh Asuria odhi kedo kodgi. Ne gimako Manase gi olowu, kendo ne gitueye gi ratege mag mula, mi gitere Babulon.

¹²Koro kane ene thagruok, nohombo Ruoth Nyasaye ma Nyasache mondo ong’wonne.

¹³Nokwayo Nyasach kwerene kobolore ahinya, mi Nyasaye nowinjo ywakne mokonye, kendo nodwoke Jerusalem e lochne. Koro manase nong’eyo ni Ruoth Nyasaye e Nyasaye.

¹⁴Bang’e nogero ohinga moro e holo gi yo ka oko mar dala Daudi kor podho chieng’ mar Gihon. Ohingano nochopo e Dhoranga Rech, mi odhogo got Ofel kendo nodhi malo mabor ahinya. Bende noketo jotend jolweny e miech Juda duto mochiel gohinga.

¹⁵Nogolo nyiseche manono kaachiel gi kido mar nyasaye manono mane nie Od Ruoth Nyasaye, kendo nomuko kende mag liswa duto ma noseloso e god hekalu kendo Jerusalem, mi nowitogi oko.

¹⁶Bende nochako oloso kendo-mar-misango mar Ruoth Nyasaye, mi notimoe misengni mag sawo kod mag erokamano, kendo nochiko jo-Juda mondo oti ni Ruoth Nyasaye ma Nyasach Israel.

¹⁷Kata kamano ji ne pod timo misengni e hembko man kuonde moting’ore, to mana ni Ruoth Nyasaye ma Nyasachgi.

¹⁸Weche moko mag Manase, gi lemo mane okwayogo Nyasache, kod weche mane jonen owachone e nying Ruoth Nyasaye ma Nyasach Israel, ondiki e Kitap weche mag Ndalo mag Ruodhii mag Israel.

¹⁹To lemone, kendo kaka Nyasaye nowinjo kwayone, kaachiel gi kethone gi richone duto, kod kuonde mane ogeroe hembko moketoe sirni milamo gi kido mag nyiseche manono, kane pok chunye olokore modembore kuom Ruoth Nyasaye, ondiki e Kitap Weche mag Ndalo mag Jonen.

²⁰Manase notho moluwo kwerene, moyike e ode. Amon wuode nodoko ruoth kare.

²¹Amon ne jahigni piero ariyo gariyo kane odoko ruoth, morito piny kuom higni ariyo, kodak Jerusalem.

²²Timbene ne richo e nyim Ruoth Nyasaye mana kaka timbe Manase wuon mare. Notimo liswa ni kido manono duto mane Manase wuon mare oloso, kendo notiyonigi.

²³Amon achielni ne ok obolore e nyim Ruoth Nyasaye kaka Manase wuon mare nobolore, to nomedo ketho moloyo.

²⁴Jodonge nojame, monege e ode.

²⁵To jo-Juda nonego jogo duto mane ojame, kendo ne giketo Josia wuode mondo obed ruoth kare.