Read luo 2 Weche mag Ndalo 34 Bible Online

2 Weche mag Ndalo 34 - luo bible

2 Weche mag Ndalo 34

¹ Josia ne jahigni aboro kane odoko ruoth, morito piny kuom higni piero adek gachiel, kodak Jerusalem.

²Timbene ne long’o e nyim Ruoth Nyasaye, kendo noluwo timbe Daudi kwar mare, ma ok oweyo kata achiel.

³E higa mar aboro mar lochne, kane pod en rawera, nochako luwo Daudi kwar mare. To e higa mar apar gariyo nochako pwodho Juda gi Jerusalem, koketho hembko mane ni kuonde moting’ore, gi sirni milamo, kod kido mopa gi mothedhi.

⁴ Nogolo chik, mi ji omuko kende-mag-liswa mag Baal, kaachiel gi kende miwang’oe ubani mane ochung’ e wigi. Nomuko sirni milamo kod kido mopa gi mothedhi, eka notoyogi molokogi buru, kendo nokiro burugo e liete joma nosetimonigi liswa.

⁵ Bende nowang’o choke jodolo e kende mane gitimoe liswa, kopwodho Juda gi Jerusalem.

⁶Notimo kamano bende e miech Manase gi Efraim kod Simeon nyaka chop Naftali, komuko ute jodologo.

⁷Nomuko bende kende-mag-liswa kod sirni milamo, gi kido manono, mi otoyogi molokogi buru. Noketho kende duto miwang’oe ubani e piny Israel duto. Eka nodok Jerusalem.

⁸Koro e higa mar apar gaboro mar lochne, kane osepwodho piny kod Hekalu, nooro Shafan wuod Azalia gi wuod Joahaz jagoro mondo olos Od Ruoth Nyasaye ma Nyasache.

⁹Ne gidhi ir Hilkia jadolo maduong’, mi gimiye pesa mane osekel e Od Ruoth Nyasaye, ma jo-Lawi ma jorit dhoot nosechoko kuom jo-Manase gi jo-Efraim gi jo-Israel modong’ duto, gi jo-Juda gi jo-Benjamin duto, kendo kuom jo-Jerusalem.

¹⁰Ne giketo pesago e lwet nyipeche mane rito tich Od Ruoth Nyasaye, mi nyipechego nochiwo pesago e lwet jotich, mondo olosgo Od Ruoth Nyasaye.

¹¹Pesago jotich bao gi jogedo ne jong’iewogo kite mopa kod yiend ripo gi sirni, mondo gilosgo udi mane ruodhi mag Juda oseweyo okethore.

¹²Mi ne gitiyo tijno ka giketo chunygi. Jahath gi Obadia jo-Lawi ma joka Merari, gi Zekaria kod Meshulam ma joka Kohath, ema nobedo joritgi. Jo-Lawi duto mane olony kuom goyo thum

¹³ema ne rito joting’, kendo chiko jotich moko duto kuom tich moro amora. Jo-Lawi moko bende ne jotelo, kendo moko ne jorit dhorangeye.

¹⁴Chieng’ moro, kane oyudo gigolo pesa mosekel e Od Ruoth Nyasaye, Hilkia jadolo noyudo kitabu mondikie chik Ruoth Nyasaye mane Musa ochiwo.

¹⁵Eka Hilkia nowacho ni Shafan jagoro niya, “Aseyudo kitap chik e Od Ruoth Nyasaye.” Mi Hilkia nomiyo Shafan kitabuno.

¹⁶Shafan notere ni ruoth kendo nowachone niya, “Jotichni tiyo tich duto mane omigi.

¹⁷Gisegolo pesa mane ochoki e Od Ruoth Nyasaye kendo giseketo e lwet nyipeche kod jotich.”

¹⁸Eka nomedo wacho ni ruoth niya, “Hilkia osemiya kitabu moro.” Mi nosome ni ruoth.

¹⁹Kane ruoth owinjo weche mag chik, noyiecho lepe.

²⁰Nochiko Hilkia, gi Ahikam wuod Shafan, gi Abdon wuod Mika, gi Shafan jagoro kod Asaya jatich ruoth, kowachonigi niya,

²¹“Dhiuru upenj Ruoth Nyasaye wach ma kuoma, gi man kuom jo-Isarel gi jo-Juda modong’, kor wach weche manie kitabu mwaseyudoni. Nyaka bed ni Ruoth Nyasaye okecho kodwa malich, nikech kwerewa ne ok orito wachne, kata timo gik moko duto mondiki e kitabunii, bende ne ok gitimo.”

²²Omiyo Hilkia, gi jogo mane ruoth ooro, nodhi ir Hulda janabi madhako ma chi Shalum wuod Tikva, ma wuod Harhas, jarit lep lemo, mane odak Jerusalem e migawo mar ariyo. Ne giwuoyo kode kuom wachno,

²³mi nodwokogi niya, “Nyisuru ng’at mane oorou ira ni Ruoth Nyasaye ma Nyasach Israel owacho kama:

²⁴‘Abiro kelo masira e pinyni, kendo kuom joma odakie kaluwore gi kuong’ duto manie kitabu ma nosesom e nyim ruodh Juda.

²⁵Ne gikwinya gi timbegi, ka giweya, kendo ka giwang’o ubani ni nyiseche manono. Emomiyo akecho kodgi, kakumogi nyaka chieng’.’

²⁶To wachuru ni ruodh Juda mane oorou mondo upenjne Ruoth Nyasaye wach ni Ruoth Nyasaye owacho kama:

²⁷‘Asewinji nikech kane iwinjo wechena mane awacho kuom pinyni kod joma odakie, chunyi ne yom kendo odembore, miyiecho lepi, kendo iywak e nyima.

²⁸Noyiki e liendi gi kue, kiluwo kwereni, ma kata wang’i ok none masira ma abiro kelo kuom dalani, kendo kuom joma odakie.’ ” Kane jootego odwoko ni ruoth wach,

²⁹noluongo jodongo duto mag Juda gi Jerusalem.

³⁰Nodhi e Od Ruoth Nyasaye gi jo-Juda kod jo-Jerusalem duto, joma omew gi jochan machalre, kaachiel gi jodolo kod jo-Lawi, mi nosomonigi weche duto mane nie kitap singruok mane oyud e Od Ruoth Nyasaye.

³¹Eka ruoth nodhi kar betne, mochung’ e nyim Ruoth Nyasaye kosingore ni enoluw Ruoth Nyasaye gi chunye duto kod tekone duto, komako chikene gi wechene kod buchene, kamano mondo orit weche mag singruok mondiki e kitabuno.

³²Eka nomiyo jo-Jerusalem duto okuong’ore ni ginirit singruokno. Mi jo-Jerusalem norito singruok mar Nyasach kweregi.

³³Bang’e Josia nogolo gik makuero duto mane nie piny Israel, mi nomiyo ji duto modak e Israel otiyo ni Ruoth Nyasaye ma Nyasachgi. Ne ok giweyo luwo Ruoth Nyasaye ma Nyasach kweregi e ndalo Josia duto.