Read luo 2 Weche mag Ndalo 35 Bible Online

2 Weche mag Ndalo 35 - luo bible

2 Weche mag Ndalo 35

¹Josia notimo Pasaka ni Ruoth Nyasaye e Jerusalem kendo ne oneg nyarombo mar Pasaka chieng’ due apar gang’wen mar due mokwongo.

²Noketo jodolo e tijegi, mojiwogi mondo giti maber e Od Ruoth Nyasaye.

³Eka nowuoyo gi jo-Lawi mane owal ni tich ruoth Nyasaye, mane puonjo jo-Israel duto, kowachonigi niya, “Keturu Sanduk Maler e Hekalu mane Solomon wuod Daudi, ruodh Israel, ogero. Ok onego uting’e e goku kendo. Omiyo koro tiuru ni Ruoth Nyasaye ma Nyasachu, kendo ni joge Israel.

⁴ Chanreuru e migepe, kaluwore gi dhoutu, kaka Daudi ruodh Israel gi Solomon wuode nochiko.

⁵Chanuru tijeu e Hekalu, kaluwore gi dhout oweteu ma ok jo-Lawi, mondo dhoot ka dhoot obed gi migawo moro makonye.

⁶Neguru nyiromb Pasaka, kendo pwodhreuru mondo ukony oweteu luwo chik mane Ruoth Nyyasaye omiyo Musa ogolo.”

⁷Eka Josia nochiwo ni joma nosechokore nyirombe gi nyidiek moromo alufu piero adek, kod ruedhi alufu adek, mondo otimgo misango mar pasaka. Mago duto nochiwo kogolo kuom mwandune owuon.

⁸Jodonge bende ne mor gi kelo chiwo ni ji gi jodolo kod jo-Lawi. Hilkia gi Zekaria kod Jehiel, jotelo madongo mag Od Ruoth Nyasaye, nochiwo ni jodolo nyirombe gi nyidiek alufu ariyo gi mia auchiel, kod ruedhi mia adek, mondo otimgo misango mar Pasaka.

⁹Konania bende, kod Shemaya gi Nethanel ma owetene kod Hashabia gi jeyel kod Jozabad, ma jodong jo-Lawi, nomiyo jo-Lawi nyirombe gi nyidiek alufu abich kod ruedhi mia abich mondo otimgo misango mar Pasaka.

¹⁰Kane gik moko duto oseikore, jodolo nochung’ keregi, kendo jo-Lawi nobedo e migepegi, kaluwore gi chik ruoth.

¹¹Kane oneg nyiromb Pasaka, jo-Lawi ema noyang’ogi, to jodolo nokiro remo mane jo-Lawi gamonigi.

¹²Ne gipogo boche mag misengnii ni migepe mag dhoudi ma ok jo-Lawi, mondo owang’ ni Ruoth Nyasaye kaka ondiki e Kitap Musa. Kamano e kaka ne gitimo gi ruedhi bende.

¹³ Ne gibulo nyiromb Pasaka kaka chik nowacho, to ring misengni maler ne gitedo e agulini gi sufriache, eka ne gitero piyopiyo ni ji duto ma ok jo-Lawi.

¹⁴Bang’e ne giloso maggi giwegi kod mag jodolo, nikech jodolo ma yawuot Harun nodich gi timo misengni miwang’o pep, kod tich wang’o bor, nyaka otieno. Mano emomiyo jo-Lawi nooloso maggi giwegi kod mag jodolo ma yawuot harun.

¹⁵ Jower ma yawuot Asaf ne ni keregi, kaluwore gi chik Daudi, gi mar Asaf, gi mar Heman, kod mar Jeduthun janen mar ruoth. Jorit dhorangeye bende ne rito dhorangeye duto. Onge ng’ama nonego a e tije mondo odhi olos chiemo, nikech owetegi ma jo-Lawi nosetedonigi.

¹⁶Kamano tich Ruoth Nyasaye duto mar Pasaka kod mar timo misengni miwang’o pep e kendo-mar-misango mar Ruoth Nyasaye notim chieng’ono, kaka ruoth Josia nochiko.

¹⁷ E ndalono jo-Israel mane osechokore notimo Pasaka kod Sap Makati ma ok ketie thowi kuom ndalo abiriyo.

¹⁸Pasaka machal kamano ne pok otimie Israel chakre ndalo mag Samuel janabi. Onge ruodh israel moro amora ma nosetimo Pasaka machal gi mano mane Josia kaachiel gi jodolo gi jo-Lawi gi jo-Jerusalem kod ji duto ma noa Juda gi Israel otimo.

¹⁹Ne en higa mar apar gaboro mar loch Josia mane otimie Pasakano.

²⁰Bang’e kane Josia osetieko loso Hekalu, noyudo ka Neko ruodh Misri odhi kedo Karkemish man but aora Yufrate mi Josia nodhi mondo orad kode.

²¹To Neko noorone joote gi wach niya, “Walar ang’o kodi, ruodh Juda? In ok ema abiro monji kawuono, to abiro mana monjo dhoot ma an go gi lweny, kendo Nyasaye osechika mondo atim piyo. Kik ipeam gi Nyasaye man kora, nono to abiro tieki.”

²²Kata kamano Josia ne ok nyal weye, to noramo arama ni nyaka oked kode. Ne ok odewo wach mane Nyasaye omiyo Neko owacho, too nodhi adhiya mi girado e paw Megido.

²³Jodir asere nochielo ruoth Josia, mi nowacho ni jotichne niya, “Golauru oko nimar asehinyora malich.”

²⁴Omiyo jotichne nogole e gache mi gitere Jerusalem ka giting’e e gache machielo. Notho kuno, mi ne giyike but kwerene, kendo jo-Juda gi jo-Jerusalem duto noywage.

²⁵Jeremia bende nochuogo wend ywak ni Josia, kendo jower duto, machwo gi mamon, pod wero wendno nyaka chil kawuono. Gino oselokore tim jo-Israel kendo wendno ondik e Kitap Wende Ywak.

²⁶Weche moko mag Josia, a chakruokgi nyaka gikogi, gi timbene mabeyo moluwore gi chik Ruoth Nyasaye,

²⁷ondiki e Kitap Ruodhi mag Israel gi Juda.