Read luo 2 Weche mag Ndalo 36 Bible Online

2 Weche mag Ndalo 36 - luo bible

2 Weche mag Ndalo 36

¹Ji duto noketo Jehoahaz ruoth e Jerusalem kar josia wuon mare.

²Ne en jahigni piero ariyo gadek kane odoko ruoth, morito piny kuom dueche adek, kodak Jerusalem.

³Bang’e Neko ruodh Misri nogole e tich ruoth, modare Jerusalem, kendo noketo ni piny Juda osuru moromo kilo piero adek mag dhahabu.

⁴ Eka noketo Eliakim owadgi Jehoahaz ruodh Juda gi Jerusalem, kendo noloko nyinge ni Jehoyakim. Jehoahaz to notero Misri.

⁵ Jehoyakim ne jahigni piero ariyo gabich kane odoko ruoth, morito piny kuom higni apar gachiel, kodak Jerusalem. Timbene ne richo e nyim Ruoth Nyasaye ma Nyasache.

⁶ Nebukadnezar ruodh Babulon nomonje, motueye gi ratege kendo notere Babulon.

⁷Nebukadnezar nokawo bende bath gik moko mag Od Ruoth Nyasaye, motero Babulon e ode.

⁸Timbe moko mag Jehoyakim gi gik makuero ma notimo, kod ketho maling’ling’ ma nofweny kuome, ondiki e Kitap Ndalo mag ruodhi mag Israel gi Juda. Jehoyachin wuode nodoko ruoth kare.

⁹Jehoyachin ne jahigni aboro kane odoko ruoth, morito piny kuom dueche adek gi ndalo apar kodak Jerusalem. Timbene ne richo e nyim Ruoth Nyasaye.

¹⁰ E ndalo oro ruoth Nebukadnezar nooro joote mokelo Jehoyachin Babulon kaachiel gi mwandu mag Od Ruoth Nyasaye, mi Nebukadnezar noketo Zedekia owadgi Jehoyachin ruodh Juda gi Jerusalem.

¹¹ Zedekia ne jahigni piero ariyo gabich kane odoko ruoth, morito piny kuom higni apar gachiel kodak Jerusalem.

¹²Timbene ne richo e nyim Ruoth Nyasaye ma Nyasache. Notamore winjo weche Jeremia jadolo, mane Ruoth Nyasaye ooro ire.

¹³ Bende ruoth Nebukadnezar nosemiyo okuong’ore e nying Nyasaye ni nobed e bwo lochne, to kata kamano nopiem kode, motamore duogo kuom Ruoth Nyasaye ma Nyasach Israel.

¹⁴Jodolo madongo duto bende kaachiel gi ji, noweyo Ruoth Nyasaye chuth, ka giluwo timbe makuero mag jopinje mamoko. Ne gidwanyo Od Ruoth Nyasaye, mane oseguedho mondo obed mare e Jerusalem.

¹⁵Ruoth Nyasaye ma Nyasach kweregi notimo kinda kooronigi jootene pile nikech nokecho joge, kendo nohero kar dakne.

¹⁶To ne gimedo charo joote Nyasaye, ka gichayo wachne, kendo ginyiero jonabi mage, nyaka Ruoth Nyasaye nokecho kodgi, ma koro ne ok ginyal konyo.

¹⁷ Emomiyo nokelonigi ruodh jo-Babulon, monego yawuotgi e Hekalu, kendo ne ok okecho wuowi kata nyako, ng’at motegno kata jaduong’ moti. Ruoth Nyasaye nochiwogi duto e lwete,

¹⁸mi nokawo gik moko duto mitiyogo e Od Ruoth Nyasaye, madongo gi matindo, kod mwandu mag Od Ruoth Nyasaye, gi mag od ruoth, kod mag ut jodonge, motero Babulon.

¹⁹ Ne giwang’o Od Nyasaye, mi gimuko ohinga mar Jerusalem. Ne giwang’o ut ruoth duto, kendo ne giketho gik moko duto ma nengogi tek man Jerusalem.

²⁰Jogo mane ok onegi, ruoth notero Babulon, kuma ne gidokoe wasumbe, kendo wasumb yawuote, nyaka nochopo ndalo mane jo-Persia okawoe loch.

²¹ Mano notimore mondo wach Ruoth Nyasaye mane omiyo Jeremia owacho, ochopi. Jeremia nosewacho niya, “Pinyni nonind ma ok opur kuom higni piero abiriyo, mondo ochulgo ndalo mag Sabato mane osekadho, ka jopiny ok orito.”

²²E higa mokwongo mar loch Kuros, ruodh Persia, Ruoth Nyasaye nomiyo wachne, mane Jeremia okoro, ochopo kare. Nomiyo Kuros ogoyo milome e pinye duto, kendo olando wach gi barupe,

²³ ni Kuros ruodh Persia, owacho kama: “Ruoth Nyasaye ma Nyasach polo osemiya loch kuom pinje duto, kendo osechika mondo agerne ot Jerusalem, manie piny Juda. Ng’ato ang’ata kuomu ma en achiel kuom joge nyalo dhi, kendo Ruoth Nyasaye ma Nyasache mondo obed kode.”