Read luo 2 Weche mag Ndalo 5 Bible Online

2 Weche mag Ndalo 5 - luo bible

2 Weche mag Ndalo 5

¹ Kamano Solomon notieko tich duto mag Ruoth Nyasaye, eka noomo gik moko duto mane Daudi wuon mare osechiwo ni Nyasaye, mi noketogi kuonde keno mag Od Nyasaye. Ne gin fedha gi dhahabu kod gik lemo moko.

² Solomon nochoko jodong Israel duto Jerusalem mondo oom Sandug Muma mar Ruoth Nyasaye e dala Daudi miluongo ni Sayun.

³Eka jo-Israel nochokore gi ruoth chieng’ sawo ma nitimo e due mar abiriyo higa ka higa.

⁴Kane jodong Israel duto osebiro, jodolo gi jo-Lawi noting’o Sandug Muma,

⁵gi Hemb Romo, kod gik moko duto mane nie hema, mitiyogo tich Nyasaye.

⁶Ruoth Solomon gi jo-Israel duto mane ochokore kode ne ni e nyim Sanduk ka gitimo misengni gi rombe kod ruedhi mang’eny mokadho akwana.

⁷Jodolo norwako Sandug Muma mar Ruoth Nyasaye kama olosne e bwo bwombe kerubi e ot ma iye mar Hekalu, miluongo ni Kama Ler Moloyo,

⁸nimar kerubi noyaro bwombegi ewi kar Sanduk, ka giume kaachiel gi ludhe miting’ego.

⁹Ludhegi ne boyo ahinya ma wigi ne nenore oko e Kama Ler mane nie nyim ot maiye, to ne ok ginen oko mar Hekalu. Pod gin kanyo nyaka chil kawuono.

¹⁰ Ne onge gimoro ei Sanduk, mak mana kite ariyo mopa mane Musa oketoe ka ne en Horeb, kuma Ruoth Nyasaye notimoe singruok gi jo-Israel ka ne gia Misri.

¹¹ Kane jodolo owuok oa Kama Ler, bor polo nopong’o Od Ruoth Nyasaye duto. Nonwang’o ka jodolo duto osepwodhore mondo oti tijgi, ma ok gidewo ndalo mochan-gie.

¹²Jo-Lawi duto ma jower nochung’ yo wuok chieng’ mar kendo-mar-misango. Ne gin Asaf gi Heman gi Jeduthun kod yawuotgi gi jowetegi. Ne girwako lewni mag law katana maber, ka gigoyo ongeng’o gi thumbe mopogore opogore. Jodolo mia achiel gi piero ariyo bende ne goyo tung’.

¹³Joma ne goyo tung’go kaachiel gi jower, ne wer ka pako Ruoth Nyasaye, kendo goyone erokamano. Ne gigoyo tung’ gi thumbe mopogore opogore ka gipako Ruoth Nyasaye gi wer niya, “Ruoth Nyasaye ber! Herane mosiko ochwere.”

¹⁴Jodolo ne ok nyal tiyo tijgi nikech bor polono, nimar duong’ maler mar Ruoth Nyasaye nopong’o Hekalu.