Read luo 2 Weche mag Ndalo 7 Bible Online

2 Weche mag Ndalo 7 - luo bible

2 Weche mag Ndalo 7

¹ Kane Solomon osetieko lemo, mach noa e polo motieko misango miwang’o kod misengni mamoko, kendo duong’ maler mar Ruoth Nyasaye nopong’o Hekalu.

²Jodongo ne ok nyal donjo e Hekalu nikech duong’ mar Ruoth Nyasaye nopong’e.

³ Kane jo-Isarel duto oneno mach kalor piny kod duong’ mar Ruoth Nyasaye ka nie Hekalu, ne gikulore piny e laru. Ne gilamo Nyasaye kendo gigoyone erokamano ka giwacho niya, “Ruoth Nyasaye ber, herane mosiko ochwere.”

⁴Eka ruoth kod ji duto notimo misengni ni Ruoth Nyasaye.

⁵Ruoth Solomon notimo misango gi ruedhi alufu piero ariyo gariyo, kod rombe alufu mia achiel gi piero ariyo. Mano e kaka ruoth kod ji duto noyango Hekalu ni Ruoth Nyasaye.

⁶Jodolo nochung’ kargi, kendo jo-Lawi nopako Ruoth Nyasaye gi wende mane Daudi ochuogo ka giwer niya, “Herane mosiko ochwere.” Ne gigoyo thumbe mane Daudi oloso mondo odendgo Ruoth Nyasaye. Jodolo bende nogoyo tung’ ka ochung’ momanyore gi jo-Lawi.

⁷Solomon noyango ni Ruoth Nyasaye dier laru mane nie nyim Hekalu, nimar kanyo ema notimoe misengni miwang’o kendo owang’oe boche mag misengni mag sawo, nikech kendo-mar-misango mar mula ma noseloso ne tin, mane ok nyal timie misengnigo duto.

⁸E ndalogo Solomon kaachiel gi jo-Israel duto notimo sawo kuom ndalo abiriyo. Ne en chokruok maduong’ ahinya moa piny Israel duto, chakre yo nyandwat, kama idonjogo Hamath nyaka aora man yo milambo e kind pinygi gi piny Misri.

⁹Chieng’ mar aboro ne gitimo sawo maduong’, nimar pwodho kendo-mar-misango notieko ndalo abiriyo, kendo sawo bende ndalo abiriyo.

¹⁰Due piero ariyo gadek due mar abiriyo Solomon nomiyo ji thuolo modok miechgi ka mor ahinya nikech gik mabeyo duto mane Ruoth Nyasaye osetimo ni Daudi gi Solomon, kendo ni joge Israel.

¹¹Solomon notieko Od Ruoth Nyasaye, gi ode owuon. Bende gik moko duto mane ochano mondo otim e Od Ruoth Nyasaye gi ode owuon, notieko maber.

¹²Ruoth Nyasaye nofwenyore gotieno, mowachone niya, “Asewinjo lemoni, kendo aseyiero Hekaluni mondo obed kama itimonae misango.

¹³Ka aloro polo ni kik koth chue, kata kakelo bonyo mondo ocham piny, kata kaoro dera mar tho marach,

¹⁴to ka joga miluongo gi nyinga obolore ka lama kendo dwara, ka giweyo yoregi maricho, eka nawinj e polo, mi nawenigi richogi kendo nares pinygi.

¹⁵Ka gilemo e Hekaluni, anaranggi gi wang’a kendo nawinjgi gi ita.

¹⁶Aseyiero Hekaluni, kendo asewale obed maler, mondo nyinga obedie, kendo arange gi chunya duto nyaka chieng’.

¹⁷To in, kiwuotho e nyima kitimo duto masechiki, kendo kimako chikena gi buchena kaka Daudi wuoru notimoo,

¹⁸ eka anagur loch mar nyikwayi, mana kaka nasingora ni Daudi wuoru, kawachone niya, ‘Ndalo duto nyikwayi nobed ruodhi mag Israel.’

¹⁹To kulokoru, mi ok umako wechena gi chikena ma naketo e nyimu, mudhi tiyo ni nyiseche mamoko kendo lamogi,

²⁰napudh jo-Israel ka buya, mi nagolgi e piny ma namiyogi, kendoo Hekalu ma asegwedho mondo nyinga oyudgo duong’ni, naketh mondo olal e wang’a, mi naloke ka ngero, kendo gima ji duto jaro.

²¹Ji duto makadho but Hekalu, ma koro duong’ kamani, nowuor ka gipenjo niya, ‘Ang’o momiyo Ruoth Nyasaye osetimo gima kama ni pinyni kendo ni hekaluni?’

²²Eka nodwokgi niya, ‘Ne giweyo Ruoth Nyasaye ma Nyasach kweregi ma noresogi ka gologi e piny Misri, mi ne gilamo nyiseche ma moko kendo gitiyonigi. Emomiyo Nyasaye osekelo masichegi duto kuomgi.’ ”