Read luo 2 Weche mag Ndalo 8 Bible Online

2 Weche mag Ndalo 8 - luo bible

2 Weche mag Ndalo 8

¹Kane higni piero ariyo mane Solomon ogeroe Od Ruoth Nyasaye gi ode owuon oserumo,

²noloso mier mane Hiram omiye, moketoe jo-Isarel.

³Koro Solomon nodhi Hamath-Zoba mokawo dalano.

⁴Noloso Tadmor mane nie thim, kaachiel gi mier mag keno duto ma nosegero Hamath.

⁵Bende nogero Beth-horon mamalo gi Beth-horon mamwalo mochielo gi ohinga moketonigi rang’eye miloro motegno gi lodi.

⁶Nogero Baalath gi mier duto mag keno, kaachiel gi mier duto ma nokanoe gechene mag lweny gi miech joge ma joidh farese. Kendo Solomon nogero udi duto Jerusalem kod Lebanon kendo e pinye duto kaka nodwaro.

⁷Ji duto ma nodong’ e piny Israel kuom jo-Hiti gi jo-Amor gi jo-Perizi gi jo-Hivi kod jo-Jebus, ma ok jo-Israel,

⁸Solomon noloko wasumbni michuno mondo oti gi thwon, kaka obet nyaka chil kawuono. Ne gin joma notamo jo-Israel tieko.

⁹Solomon ne ok oloko jo-Israel wasumbni, to noketogi jolweny kod jotend jolweny gi jotend joidh faresene.

¹⁰Ne en gi jotelo madongo mia ariyo gi piero abich mane rito ji.

¹¹Solomon nogolo nyar Farao e dala Daudi mokete e ot ma nogerone, nimar nowacho niya, “Chiega ok nyal dak e od Daudi ruodh Israel, nikech kuonde duto ma Sanduk osebedoe oyang ni Ruoth Nyasaye.”

¹²Solomon notimo ni Ruoth Nyasaye misengini miwang’o pep, kod misengini mag sawo e kendo-mar-misango mar Ruoth Nyasaye ma noseketo e nyim agola.

¹³ Odiechieng’ kodiechieng’ notimo misengni koluwo chik Musa. Notimogi chieng’ ma due opor, kendo e ndalo sewni adek mag higa, ma gin Sap Makati ma ok ketie Thowi, gi Sap Jumbe, kod Sap Kiche.

¹⁴Solomon norito chik mane Daudi wuon mare ma ng’at Nyasaye oketo. Nochan jodolo e tich dolo mopogore opogore, kendo nomiyo jo-Lawi tich wer kod konyo jodolo kaka ne dwarore odiechieng’ kodiechieng’, kendo nopogo jorit rangeye tich rito rangach ka rangach.

¹⁵Kuom weche duto mane ruoth omiyo jodolo gi jo-Lawi ne onge moro amora mane giweyo kata mana wach keno.

¹⁶Kamano Solomon notieko tich duto chakre chieng’ keto mise mar Od Ruoth Nyasaye nyaka rumone.

¹⁷Solomon nodhi Ezion-Geber gi Eloth manie dhonam e piny Edom.

¹⁸Mi Hiram nooro jotichne motero ni Solomon yiedhi kaachiel gi jokwang’ molony kuom tich nam. Ne gidhi Ofir kaachiel gi jotich Solomon, kuma ne giomoe dhahabu moromo kilo alufu apar gauchiel, mi ne gikelo ni Ruoth Solomon.