Read luo 2 Weche mag Ndalo 9 Bible Online

2 Weche mag Ndalo 9 - luo bible

2 Weche mag Ndalo 9

¹ Kane ruoth madhako mar Sheba owinjo humb Solomon, nobiro Jerusalem mondo oteme gi penj matek. Nobiro gi oganda maduong’ ahinya kod ngamia moting’o gik mang’ue ng’ar gi dhahabu mogundho kod kite mabeyo ma nengogi tek. Kane obiro ir Solomon nopenjo weche duto mane nie chunye.

²To Solomon nodwoko wechene duto, ma onge moro mane otame dwoko.

³Kane ruoth madhako mar Sheba oseneno riekone, gi ot ma nosegero,

⁴gi chiemb ode, gi kuonde dak jodonge, gi kit tich mag jotichne, gi rwakruokgi, gi jolos divai mage gi rwakruokgi, kod misengni ma notimo e Od Ruoth Nyasaye, dhoge nomoko.

⁵Nowacho ni Ruoth niya, “Kara humb timbeni gi riekoni ma nawinjo e pinya en adier!

⁶Kane pok abiro mi anenogi gi wang’a, ne ok anyal yie ni gin adier. To koro aneno ni nonyisa mana dir wach mar riekoni maduong’. Giloyo huma ma nawinjo.

⁷Mondi kod jotichni johawi, mawinjo riekoni ndalo duto.

⁸Apako Ruoth Nyasaye ma Nyasachi moheri kendo oketi e kom duong’ne, mondo ibedne ruodh Israel. Ruoth Nyasaye ohero jo-Israel kendo odwaro mondo gigurre motegno nyaka chieng’, emomiyo oseketi ruodhgi, mondo ing’ad bura kare.”

⁹Eka nomiyo ruoth Solomon dhahabu moromo kilo alufu abiriyo, gi gik mang’ue ng’ar mogundho kod kite mabeyo ma nengogi tek. Solomon ne ok ochako oyudo gik mang’ue ng’ar machal gi mago mane ruoth madhako mar Sheba omiye.

¹⁰To bende jotich Hiram gi jotich Solomon mane odhi Ofir omo dhahabu ne kelo yiend algum gi kite mabeyo ma nengogi tek.

¹¹Yien-go ruoth nolosogo raidhi mag Od Ruoth Nyasaye gi mag ode owuon kod thumbe nyatiti gi nyigwerni ma ne jower wergo e Hekalu. Yien machal kamago ne pok one e piny Juda nyaka nene.

¹²Ruoth Solomon nomiyo ruoth madhako mar Sheba gimoro amora ma nokwayo kaachiel gi gik moromo mich ma nokelo. Eka ruodh Sheba nodok e pinye kaachiel gi jotichne.

¹³Pek mar dhahabu mane ikelo ni Solomon higa ka higa ne romo kilo alufu piero ariyo gadek,

¹⁴ka ok okwan mago mag osuch johala gi johono; kendo ruodhi duto mag piny Arabia kod jorit piny Solomon ne kelone fedha gi dhahabu.

¹⁵Ruoth Solomon nochuogo kuodi mia ariyo, ma kuot ka kuot nobaw gi dhahabu moromo kilo abiriyo.

¹⁶Kendo nochuogo okumbini mia adek, ma okumba ka okumba nogaw gi dhahabu moromo kilo adek gi nus. Magi duto ruoth noketo e Od Bungu mar Lebanon.

¹⁷Bende Ruoth noloso kom duong’ mang’ongo mar lakliech, mi nobawo gi dhahabu maler.

¹⁸Kom duong’no ne nigi raidhi man gi kuonde minyono auchiel gi raten tielo mar dhahabu momakore gi kom. To sibuoche ariyo mag dhahabu nochung’ e bath bede kom koni gi koni.

¹⁹Kende sibuoche apar gariyo moko nochung’ moro ka moro e dir raidhi koni gi koni. Onge piny moro ma nolosie kom ruoth machal gi mano.

²⁰Kikombe Solomon duto nolos gi dhahabu, kendo gik moko duto mikonyruokgo e Od Bungu mar Lebanon bende nolos gi dhahabu maler. Fedha ne ok kwan ka gimoro e ndalo mag Solomon,

²¹nimar yiedhi mage ne dhi Tarshish gi jotich Hiram, kendo bang’ higni adek ne gikelo dhahabu gi fedha gi lak liech gi ong’eche kod bimbe.

²²Kamano ruoth Solomon noloyo ruodhi duto mag piny gi mwandu kendo gi rieko.

²³Ruodhi duto mag piny ne biro ir Solomon mondo owinj rieko mane Nyasaye omiye.

²⁴Higa ka higa, ng’ato ka ng’ato ne kelone chiwo mag gik molos gi fedha gi dhahabu kaachiel gi lewni kod gilweny gi gik mang’ue ng’ar gi farese kod nyumbu.

²⁵ Solomon ne nigi udi alufu ang’wen mag farese gi mag geche, kod joidh farese alufu apar gariyo. Moko kuomgi noketo e miech geche, to moko ne en go Jerusalem.

²⁶ Ruodhi duto ne nie bwo loch Solomon chakre aora Yufrate nyaka piny Filistia gi tong’ piny Misri,

²⁷Ruoth nomiyo fedha obedo mang’eny ka kuoyo e Jerusalem, kendo yiend sida bende ne ng’eny ka ng’owo mae pap.

²⁸ Solomon ne omo farese Misri kod pinje moko duto mane giyudoree.

²⁹Weche moko mag Solomon a chakruokgi nyaka gikogi ondik e Kitap Nathan janabi, kendo e kitabu moting’o weche mane Ahija ja-Shilo okoro, kendo e kitap Iddo janen mondikie fwenyruok ma noneno kuom Jeroboam wuod Nebat.

³⁰Solomon nobedo ruodh Israel duto kuom higni piero ang’wen kodak Jerusalem.

³¹Notho moyike e dala Daudi wuon mare. Rehoboam wuode nodoko ruoth kare.