Read luo Ezra 4 Bible Online

Ezra 4 - luo bible

Ezra 4

¹Kane wasik jo-Juda gi jo-Benjamin owinjo ni joma oa e tuech koro gero Hekalu ni Ruoth Nyasaye ma Nyasach Israel,

² ne gidhi ir Zerubabel gi Jeshua kod jodong dhoudi, mi giwachonigi niya, “We wakonyu gedo, nikech Nyasachuno ema wan bende walamo, kendo wasebedo ka watimone misango, chakre ndalo loch Esarhadon ruodh Asuria, ma nokelowa ku.”

³To Zerubabel gi Jeshua kod jodong dhout Israel mamoko nodwokogi niya, “Uonge tich gi ot mwageroni Nyasachwani. Wabiro gere ni Ruoth Nyasaye ma Nyasach Israel wan kendwa, kaka Kuros, ruodh Persia, nochikowa.”

⁴Bang’e joma koro nodak e pinyno nonyoso chuny jo-Juda, ka gibwogogi ni mondo kik gigedi.

⁵Ndalo duto mane Kuros rito piny, ne gimiyo jodonge asoya mondo oketh wach jo-Juda. Mano nodhi nyime nyaka ndalo loch Darius ruodh Persia.

⁶Kane Ahasuerus ochako loch, joma koro nodak e pinyno nondiko barua kadonjoni jo-Jerusalem gi jo-Juda.

⁷E ndalo mane Artaxerxes obedo ruodh Persia, Mithredath gi Tabeel kod jowetene nondikone. Baruano nondiki gi dho Aram, kendo nosome gi dho Aram.

⁸Rehum, ma jaduong’ pinyno, kod Shimshai jagoro ne jondiko barua ni ruoth Artaxerxes, ka ketho nying Jerusalem. Baruano nochak kama:

⁹“Wan jondik baruani wan Rehum ma jaduong’ piny, gi Shimshai jagoro, kod jowetewa duto ma jong’ad bura gi jodongo gi joteko gi jotich madongo, gi jo-Erek gi jo-Babulon gi jo-Elam modak Susa,

¹⁰kod ji mamoko mane Asnapar ruoth moluor kendo mogen odaro momiyo kar dak e dala mar Samaria, kendo e piny man loka aora Yufrate.”

¹¹Baruano nodhi nyime kawacho kama: “Kuom ruoth Artaxerxes. Wan wasumbni magii modak loka Yufrate, wamosi.

¹²Ruoth, mondo ing’e ni jo-Yahudi mane owei mobiro kuondegi, osechopo Jerusalem, kendo ochako gero dala marach ma nong’anyono. Gisepime kendo koro gitieko gero ohingane.

¹³To ruoth, nyaka ing’e malong’o ni kapo ni gigero dalagino, mi gitieko ohingane, to ok ginigol osuru, kata golo chiwo, kata mana chulo gimoro amora, mi e gikone giniketh lochni.

¹⁴To wan jotichni ok owinjore waling’ kwaneno kiketho nyingi. Mano emomiyo waseoro baruani kwanyisigo wach,

¹⁵mondo onon kitepe mondikie weche ma notimore e ndalo ruodhi ma nokwongoni. Kirango kitepego, to ibiro nwang’o ni Jerusalem en dala ma jang’anyo, kendo ma jachand ruoth gi pinye. Bende jodalano osebedo ka jemo kuom higni mathoth. Mano emomiyo ne oketh dalano.

¹⁶Koro ruoth, wanyisi ni ka oger dalano, mi ohinga mare orumo, to onge piny moro loka Yufrate ma nodong’ e bwo lochni.”

¹⁷Ruoth nodwokogi kama: “To kuom Rehum ma jaduong’ piny gi Shimshai jagoro kod joweteu duto modak Samaria gi piny man loka aora Yufrate, amosou.

¹⁸Barua ma nyocha uorona, osesomna maber,

¹⁹omiyo nyocha agolo chik mondo unon kitepe, mi oseyud ni jodalano osebedo ka ng’anyo kuom kinde malach, kendo wich teko gi ng’anyo bende osebedo kosiko kanyo.

²⁰E ndalo mokadho ruodhi marateke norito Jerusalem, kendo noloyo piny duto man loka Yufraete. Ji ne goyonigi osuru mopogore opogore.

²¹Kuom mano koro goluru chik mondo jogo owe tich. Dalano kik ger nyaka agol chik.

²²Neuru ni ok ujuang’o wachni, nono to wach marach kata gima lit biro wuok, ma diketh lochwa.”

²³Kane osesom barup ruoth Artaxerxes ni Rehum gi Shimshai kod jowetegi, ne gidhi Jerusalem piyopiyo, mi gichuno jo-Yahudi mondo owe tich.

²⁴ Chakre chieng’no, tich Od Nyasaye man Jerusalem nochung’, mi nosiko kamano nyaka higa mar ariyo mar loch Darius ruodh Persia.