Read luo Ezra 6 Bible Online

Ezra 6 - luo bible

Ezra 6

¹Kuom mano, ruoth Darius nogolo chik mi ne omany od kitepe man Babulon kuma nokanie mwandu, to ne ok oyudo.

²To kitabu moro noyud Ekbatana, dala ruoth manie piny Media, mondikie niya:

³Ruoth Kuros nogolo chik kuom Od Nyasaye man Jerusalem e higa mokwongo mar lochne, kowacho niya, “Hekaluno mondo ochak oger, mondo obed kama itimoe misengni, kendo ichiwoe mich miwang’o. Borne nyaka bed mita piero adek, to lachne bende mita piero adek.

⁴Onego bedie kiepe adek mag kite madongo moluwore gi kiew achiel mar bao. Pesa migerego to biro wuok kuom mwandu ruoth.

⁵To bende nyaka dwok gik moko mag dhahabu gi mag fedha mitiyogo e Od Nyasaye, mane Nebukadnezar ogolo e Hekalu man Jerusalem, mokelo Babulon. Nyaka dwokgi duto e Hekalu man Jerusalem, mondo moro ka moro oket kare e Od Nyasaye.”

⁶Kane ruoth Darius osesomo wechego, nogolo chik kama: “Koro in Tatenai ma ruodh piny man loka Yufrate gi Shethar-bozenai kod joweteu ma jotend pinyno, auru kuno,

⁷kendo uwe ni jatend jo-Yahudi gi jodonggi thuolo mondo oger Od Ruoth Nyasayeno. To mondo gigere e wang’e machon.

⁸To bende achiko kaka onego utim ni jodong jo-Yahudigo, mondo Od Nyasayeno oger. Kaw pesa moko moa kuom osuch piny man loka Yufrate, ochulgo gik moko duto ma jogo konyorego, mondo kik tich chung’.

⁹Odiechieng’ kodiechieng’ gimoro amora ma gidwaro nyaka migi, bed ni gin nyiruedhi, kata imbe, kata nyirombe mitimogoo misengni miwang’o pep ni Nyasach polo, kata ngano kata chumbi kata divai kata mo, mana kaka jonabi man Jerusalem dwaro.

¹⁰Kamano mondo gitim misengni mang’we ng’ar ni Nyasach polo, kendo gilam ni ruoth gi yawuote, mondo obed mangima.

¹¹To bende aketo chik ni, ka ng’ato oketho chikno, to nyaka gol yiend tat ode, mi gur piny, kendo chwade, kotueye e yienno. Ode bende nyaka lokre pidh owuoyo nikech kethoneno.

¹²Nyasaye moseyiero Jerusalem, mondo nyinge obedie, oriemb ruoth moro amora kata oganda maparo ketho wachni, kata maparo muko Od Nyasaye man Jerusalem. An Darius asegolo chik, kendo nyaka time mak orem.”

¹³Tetenai ruodh piny man loka Yufrate, gi Shethar-bozenai kod jowetegi, notimo mana kaka ruoth Darius nochiko.

¹⁴ Mi jodong jo-Yahudi nodhi nyime gi gedo. Weche mane Hagai janabi kod Zekaria nyakwar Iddo jokoro, nojiwogi, omiyo ne gitieko gedo kaka Nyasach Israel nochiko, kendo moluwore gi chike mag Kuros kod mag Darius.

¹⁵Gedo norumo tarik piero ariyo gadek mar due Adar e higa mar auchiel mar loch ruoth Darius.

¹⁶Bang’e jo-Israel duto, ma jodolo kod jo-Lawi gi ji duto mane oa e tuech, norwako Od Nyasaye gi mor maduong’.

¹⁷Kane girwakogo, ne gitimo misango gi ruedhi mia achiel gi imbe mia ariyo ko nyirombe mia ang’wen, to bende ne gichiwo nyuogi apar gariyo, maromre gi kar romb dhout Israel, mi gitimogo misango mar golo richo ni oganda Israel duto.

¹⁸Bang’e ne giketo jodolo gi jo-Lawi e migepegi mag tich Nyasaye e Jerusalem, kaka nondiki e kitap Musa.

¹⁹ Tarik apar gang’wen mar due mokwongo, joma noa e tuech notimo Sap Pasaka.

²⁰Noyudo ka jodolo gi jo-Lawi duto osepwodhore, omiyo ne ginego nyirombe mag pasaka ni ji duto ma noa e tuech, kaachiel gi jowetegi ma jodolo, kendo ni gin giwegi.

²¹Joma nochamo Pasakano ne gin jo-Isarel mane oa e tuech, kaachiel gi jogo duto mane koro lamo Ruoth Nyasaye ma Nyasach Israel, bang’ weyo timbe dondruok mag ogendni ma koro nodak e pinyno.

²²Ne gitimo Sap Makati ma ok Ketie Thowi kuom ndalo abiriyo ka gimor, nimar Ruoth Nyasaye nosemiyo gibedo mamor, koloko chuny ruodh Asuria mondo ohergi kendo ojiwgi e tich gero Od Nyasaye, ma Nyasach Israel.