Read luo Ezra 7 Bible Online

Ezra 7 - luo bible

Ezra 7

¹E ndalo loch Artaxerxes ruodh Persia, ng’at moro miluongo ni Ezra noa Babulon, modhi Jerusalem. Ne en wuod Seraya, ma wuod Azaria, wuod Hilkia,

²wuod Shalum, wuod Zadok, wuod Ahitub,

³wuod Amaria, wuod Azaria, wuod Merayoth,

⁴wuod Zerahia, wuod Uzi, wuod Biki,

⁵wuod Abishua, wuod Finehas, wuod Eleazar, ma wuod Harun jadolo maduong’.

⁶Ezrano ne japuonj chik, motiegore e chik Musa mane Ruoth Nyasaye ma Nyasach Israel omiyo joge. Ruoth Artaxerxes nomiye gik moko duto mane okwayo, nimar Ruoth Nyasaye ma Nyasache ne ni kode.

⁷Higa mar abiriyo mar loch ruoth Artaxerxes, ema Ezra kod jo-Israel moko nodhiye Jerusalem kaachiel gi jodolo gi jo-Lawi gi jower gi jorit dhorangeye kod jotich Hekalu.

⁸Ne gichopo kuno due mar abich, higa mar abiriyo mar loch ruoth.

⁹Chieng’ due achiel due mokwongo ema ne Ezra osechano mondo owuog Babulon, kendo nochopo Jerusalem chieng’ mokwongo mar due mar abich, nikech Nyasaye noseguedhe.

¹⁰Ezra noseketo chunye kuom somo chik Ruoth Nyasaye kendo rito, kopuonjo jo-Israel buchego.

¹¹Koro ma e barua mane ruoth Artaxerxes omiyo Ezra jadolo kendo japuonj chik, molony e chike kod buche mane Ruoth Nyasaye omiyo jo-Israel:

¹²“An Artaxerxes, ruodh ruodhi andiko ni Ezra, jadolo kendo japuonj chik, mong’eyo chike Nyasach polo, ka awach kama:

¹³“Koro agolo chik ni: ja-Israel moro amora manie pinya, kata bed ni en jadolo kata ja-Lawi, mochiwore mar dhi Jerusalem, nyalo dhi adhiya kodi.

¹⁴An gi jobucha abiriyo waseori mondo idhi inon ane kaka gik moko chalo e piny Juda kod Jerusalem korka chik Nyasaye moseket e lueti.

¹⁵Bende mondo iter fedha gi dhahabu ma an gi jobucha wasechiwo kuom herowa ni Nyasach Israel, ma kar dakne en Jerusalem,

¹⁶kaachiel gi fedha duto kod dhahabu ma inyalo yudo e piny Babulon duto, kanyakla gi mich ma jo-Israel gi jodolo ochiwo kuom herogi ni tich Od Nyasachgi man Jerusalem.

¹⁷To bende nyaka iti gi pesago mana kuom ng’iewo ruedhi gi imbe kod rombe gi gik mibiro timogo misango mar cham kod misango moilo piny. Gigo duto nyaka ichiw e kendo-mar-misango man e Od Nyasachu Jerusalem.

¹⁸To kapo ni fedha gi dhahabu moko odong’, to inyalo konyorigo gi joweteni kaka Nyasachu dwaro.

¹⁹Gik lemo mosemiyi mag tich Od Nyasachi, nyaka iter e nyim Nyasach Jerusalem.

²⁰To ka inyalo dwaro gimoro mondo olosgo Od Nyasachi, to inyalo ng’iewo gi pesa mar osuch pinya.

²¹“To an ruoth Artaxerxes, agolo chik ni jokeno duto mag pinya man loka aora Yufrate, ni gimoro amora ma Ezra jadolo kendo japuonj chik Nyasach polo nodwar kuomu, nyaka umiye,

²²mak mana ni ok onego umiye fedha mokalo kilo mia adek gi piero abich, kata ngano mokadho ogunde mia ariyo, gi divai degi mia achiel, gi mo bende degi mia achiel, mak mana kado ema unyalo miye kaka uneno.

²³Gimoro amora ma Nyasach polo dwaro kuom tich Ode nyaka chiw malong’o, nono to mirima biro lwar kuom pinya gi mar yawuota.

²⁴To bende wanyisou malong’o ni uonge gi teko mar keto osuru kata chudo moro kuom jodolo gi jo-Lawi gi jower gi jorit dhorangeye kod jotich Hekalu, kata kuom ji mamoko e Od Nyasaye.

²⁵“To in Ezra, kuom rieko ma Nyasachi osemiyi, yier jong’ad bura mondo oyal jogi duto man e piny man loka Yufrate, mong’eyo chik Nyasachi. To jogo ma ok ong’eyo chikego, to mondo upuonji.

²⁶Ng’ato ma ok orito chik Nyasachi, kata chikna, to mondo okume motegno, bed ni en buch tho, kata mar dare kitere kuma bor, kata mar peyo gige, kata mar tueye.”

²⁷Ezra nowacho niya, “Apako Ruoth Nyasaye ma Nyasach kwerewa, moseketo wach makama e chuny ruoth mondo omed ber mar Od Ruoth Nyasaye man Jerusalem,

²⁸kendo osemiyo ruoth gi jobuche kod jotende madongo ogena.” Kuom mano, kane aseng’eyo ni Ruoth Nyasaye oguedha, nabedo gi chir, mi choko jotend Israel moko mondo adhigo.