Read luo Ezra 8 Bible Online

Ezra 8 - luo bible

Ezra 8

¹Jodong dhoudi mane odhi koda, kawuok Babulon e ndalo loch ruoth Artaxerxes e magi:

²Kuom joka Finehas ne en Gershom; kuom joka Ithamar, ne en Daniel; kuom joka Daudi ne en Hatush

³wuod Shekania; kuom joka Parosh, ne en Zekaria mane odhi gi chwo mia achiel gi piero abich, ma nyinggi osendiki e kitabu;

⁴kuom joka Path-moab, ne en Elihoenai wuod Zerahia, ma nodhi gi chwo mia ariyo;

⁵kuom joka Zatu, ne en Shekania wuod Jahaziel mane nigi chwo mia adek;

⁶Kuom joka Adin, ne en Ebed wuod Jonathan gi chwo piero abich;

⁷kuom joka Elam, ne en Jeshaya wuod Athalia gi chwo piero abiriyo;

⁸kuom joka Shefatia, ne en Zebadia wuod Mikael gi chwo piero aboro;

⁹kuom joka Joab, ne en Obadia wuod Jehiel gi chwo mia ariyo gapar gaboro;

¹⁰kuom joka Bani, ne en Shelomith wuod Josifia gi chwo mia achiel gi piero auchiel;

¹¹kuom joka Bebai, ne en Zekaria wuod Bebai gi chwo piero ariyo gaboro;

¹²kuom joka Azgad, ne en Johanan wuod Hakatan gi chwo mia achiel gapar.

¹³To dhoot mogik ne joka Adonikam, ma nyinggi Elifelet gi Jeyel kod Shemaya, mane odhi gi chwo piero auchiel,

¹⁴kod joka Bigvai ma nyinggi Uthai gi Zabud, mane odhi gi chwo piero abiriyo.

¹⁵Nachoko jogo duto e bath aora mamol kochiko ahava, mi ne wabworo kanyo kuom ndalo adek. To kane aserango ji, kaachiel gi jodolo, nanwang’o ni onge ja-Lawi kata achiel.

¹⁶Omiyo naoro jomoko ir Iddo jatend joma odak Kasifia. Joma naorogo ne gin Eliezer gi Ariel gi Shemaya gi Elnathan gi Jarib, gi Nathan gi Zekaria kod Meshulam, duto joma dongo, kaachiel gi Joyarib kod Elnathan, mane joma ong’eyo ng’ado rieko.

¹⁷Nowachonigi mondo gidhi gikwa Iddo, kaachiel gi jowetene ma jotich Hekalu mane ni kode mondo omiwa joma nyalo tiyo e Hekalu mar Nyasaye.

¹⁸Nyasaye noguedhowa, omiyo ne gimiyowa Sherebia gi yawuote kod jowetene, duto ji apar gaboro. Sherebia ne en ng’at mariek, ma jaka Mali nyakwar Lawi ma wuod Israel.

¹⁹Bende ne gimiyowa Hashabia gi Jeshaya ma joka Merari gi jowetegi kod yawuotgi, duto ji piero ariyo,

²⁰kaachiel gi jotich Hekalu mia ariyo gi piero ariyo. (Daudi gi jodonge ema nowalo oganda mar jotich Hekalu mondo obed joma konyo jo-Lawi) Jogo duto nondik nyinggi.

²¹Bang’ mano nagolo chik mondo wari kech e dho aora Ahava kanyo, ka wabolore e nyim Ruoth Nyasaye ma Nyasachwa, kendo wakwaye mondo oritwa gi nyithindwa kod giwa duto e wuodhwa.

²²Wiya nokuot kwayo ruoth askeche gi joidh farese ma diritwa e yo kuom wasigu, nikech ne wasewachone ni Nyasaye guedho jogo duto madware, kendo timonigi maber. To mirimbe mager ni kuom jogo duto moweye.

²³Kuom mano, ne wariyo kech, kendo wakwayo Nyasachwa mondo wawuoth maber, mi nowinjo kwayowa.

²⁴Nayiero jodolo ma jotelo apar gariyo, kaachiel gi Sherebia, gi Hashabia kod jowetegi apar.

²⁵Fedha gi dhahabu kod gik lemo mane ruoth gi jobuche gi jodonge kod jo-Israel duto mane ni kanyo osechiwo ni tich Od Nyasaye, napimo, maketo e lwet jogo.

²⁶Kar romb gik ma namiyogigo ne romo fedha kilo alufu piero ariyo, gi gik lemo mag fedha mia achiel ma pek moro ka moro oromo kilo piero abiriyo, kod dhahabu moromo kilo alufu adek.

²⁷Gi lewni piero ariyo mag dhahabu ma nengogi ne darik alufu achiel, kod tewni ariyo mag mula mang’ang’ni, ma nengogi tek ka nengo dhahabu.

²⁸Eka nawacho ni jogo niya, “Un joma owal ni Ruoth Nyasaye mana kaka gik lemogi. Fedha gi dhahabu to gin mich ma ji osechiwo kuom herogi ni Ruoth Nyasaye ma Nyasach kwereu.

²⁹Kawgiuru kendo uritgi nyaka chop chieng’ muketogi e ut Od Ruoth Nyasaye, ka jotend jodolo gi jo-Lawi kod jodong dhout Israel man Jerusalem neno.”

³⁰Kamano jodolo gi jo-Lawigo nokawo fedha gi dhahabu kod gik lemo mondo giter Jerusalem e Od Nyasachwa.

³¹Mi tarik apar gariyo mar due mokwongo ne wawuok but aora Ahava kuma ne wasebworoe, kwachiko Jerusalem. Nyasaye ne ni kodwa, omiyo noritowa kuom wasigu kendo kuom jomahundu mane nyalo butonwa e yo.

³²Kane wachopo Jerusalem, ne wayueyo kuom ndalo adek,

³³to chieng’ mar ang’wen ne wadhi e Od Nyasachwa, mi fedha gi dhahabu kod gik lemo nopim, moket e lwet Meremoth wuod Uria jadolo gi Eleazar wuod Finehas kod Jozabad wuod Jeshua gi Noadia wuod Binui ma jo-Lawi.

³⁴Gik moko duto ne okwan sa michiwogie, kendo pekgi kod kwan-gi nondik piny.

³⁵Bang’e joma noduogo koa e tuech Babulon, notimo ni Nyasach Israel misengni miwang’o pep. Ne gichiwo ruedhi apar gariyo mochung’ ni jo-Israel duto, gi imbe piero ochiko gauchiel kod nyirombe piero abiriyo gariyo, kaachiel gi nyuogi apar gariyo ka misango mar golo richo. Mago duto nochiw ni Ruoth Nyasaye ka misango miwang’o te.

³⁶To bende ne gimiyo jotelo gi ruodhi mane rito piny man loka aora Yufrateno chike mag ruodh Babulon. Jogo nokonyo tich Od Nyasaye bende.