Read luo Ezra 9 Bible Online

Ezra 9 - luo bible

Ezra 9

¹Kane osetim gigo duto, jodongo moko nobiro ira, mowachona niya, “Jo-Israel koda ka jodolo gi jo-Lawi ok osepogore moa kuom joma ok jo-Yahudi, to gitimo mana timbe makuero mane mag jo-Kanaan gi jo-Hiti gi jo-Perizi gi jo-Jebus gi jo-Amon gi jo-Moab gi jo-Misri kod jo-Amor.

²Gisekendo nyi joma ok jo-Yahudi, ma koro odak e pinyni, kendo yawuotgi bende gisekendonigi nyi jogo. Kamano oganda maler mar Nyasaye osenywandore gi joma ok jo-Yahudi. To jotelo gi jodongo ema josebedo joketho moloyoe jomoko.”

³Kane awinjo wachno, nayiecho lawa kod abolana, mapudho yie wiya gi yie tika, kendo nabet piny ka dhoga omoko.

⁴Jogo duto mane oluoro wach Nyasach Israel nobiro ira, nikech gima rach mane joma oduogo koa e tuech Babulon otimo. Nabet kanyo ka dhoga omoko nyaka sa mitimoe misango mar odhiambo.

⁵To kane sa mitimoe misango mar odhiambo ochopo, nachung’ aa kama ne aywagorae ka lawa oyiech, kendo nagoyo chonga piny, matang’o lweta ni Ruoth Nyasaye ma Nyasachwa, ka awacho niya,

⁶“A Nyasachwa, wiya okuot ma ok anyal hedhora ting’o wiya malo, nimar wasenyumore e richo, kendo kethowa osebedo maduong’, motundo e polo malo.

⁷Chakre ndalo kwerewa nyaka chil kawuono, wasebedo joketho ahinya. Mano emomiyo ruodhi mag pinje mamoko osenegowa, kendo tueyowa kendo yako giwa, mi wasebedo gi wichkuot maduong’. Pod wasiko kamano kaachiel gi ruodhiwa kod jodolowa nyaka chil kawuono.

⁸A Ruoth Nyasaye ma Nyasachwa, koro sani, kuom kinde matin, isebedonwa mang’won, kiweyo jowa moko tony, kendo isemiyowa kama wanyalo dakie e dalani maler. Iseduogo chunywa, kendo iweyonwa thuolo mondo dendwa oduogi e tuech ma wantieni.

⁹Adier, wan joma otue, to kata kamano in Nyasachwa, ok isejwang’owa chutho miweyowa e tuechwa, to isemiyo chuny ruodhi mag Persia obedo maber kodwa, mi gimiyowa thuolo mondo walos Hekalu mari kendo wager kuonde mokethore, kibedonwa kaka ohinga molworo Juda gi Jerusalem.

¹⁰A Nyasachwa, koro dwawach ang’o kwasejwang’o chikeni, bang’ ng’wono machal kama?

¹¹Nichikowa gi dho jotichni ma jonabi, kiwacho niya, ‘Piny ma koro udonjoe mondo ukawni en piny modwanyore nikech joma odakie osedwanye gi timbegi mag kiragi, mi giloke mochido chakre tung’ piny nyaka tung’ piny.

¹² Emomiyo kik uyie mondo yawuotgi okend nyiu, kata yawuotu okend nyigi. Bende kik utim gimoro ma dikelnigi kue, kata ma dikelnigi mwandu nyaka chieng’. Kamano unubed motegno, mi unucham gik mabeyo mag pinyno, kendo unuwe pinyno ni nyithindu ka mwandugi nyaka chieng’.’

¹³“A Nyasachwa, nikumowa kuom richowa kendo kuom kethowa maduong’. Kata kamano ne ok ikumowa maromre gi richowago, to niweyo jowa moko otony, mi wabedo thuolo kaka koroni.

¹⁴Bang’ mago duto ere kaka dwachak waketh chikeni, mi wakendre gi joma timbegi monogi? Donge ditiekwa gi mirimbi, mi onge ng’ama ditony kata achiel?

¹⁵A Ruoth Nyasaye ma Nyasach Israel, in jaadiera, nimar jowa manokgi koro osetony, kaka notimore e kinde mokwongo. Eri, wan joricho ma bura oloyo, to nikech richowago, onge ng’ato kuomwa manyalo chung’ e nyimi.”