Read luo Nehemia 1 Bible Online

Nehemia 1 - luo bible

Nehemia 1

¹Magi e weche mag Nehemia wuod Hakalia: E due mar Kislev, e higa mar piero ariyo mar loch Artaxerxes, kane en Susa, dala ruoth,

²Hanani ma owadwa nobiro gi jomoko koa Juda. Napenjogi wach Jerusalem, kod wach jo-Yahudi mane odong’ kuom joma nodok kuno, koa e tuech Babulon, kuma nosetergie.

³Ne gidwoka niya, “Joma nodong’ e pinyno, koa e tuech koro oneno thagruok gi wich kuot maduong’. Ohinga mar Jerusalem osemuki, kendo dhorangeyene duto osewang’ gi mach.”

⁴Kane awinjo wachno, nabet piny maywak kuom ndalo mogwarore, ka atueyo chiemo, kendo alemo e nyim Nyasach polo.

⁵Ne alemo kama: “A Ruoth Nyasaye ma Nyasach polo, Nyasaye maduong’ kendo malich. Irito singruok mitimo gi joma oheri kendo marito chikeni, kiherogi gi hera mosiko.

⁶Yie ichik iti kendo inen, mondo iwinj kwayona ma aketo e nyimi odiechieng’ gotieno, kakwayo ni jo-Israel. Ahulo richo ma wan jo-Israel wasetimo e nyimi. Ee, an kaachiel gi dhoodwa wasetimo richo.

⁷Wasekethoni adier, kendo ok waserito chike duto mane imiyo Musa jatichni.

⁸ To yie ipar gima ninyise, kiwacho niya, ‘Kuketho chikna, to anakeu e kind ogendini.

⁹ To kuduogo ira, mi urito chikna, to anachoku, kendo anadwoku e dala miseyiero mondo nyinga obedie, kata obedo ni uke muchopo e tung’ piny gi tung’ piny.’

¹⁰A Ruoth Nyasaye, jo-Israel gin jotichni kendo jogo misewaro gi tekoni kod badi motegno.

¹¹Yie ichik iti mondo iwinj kwayona kod kwayo jotichni mohero luoro nyingi, kendo yie iguedha kawuononi, mondo imi jal matiyone ogena.” E kindeno ne an jagam divai mar ruoth Artaxerxes.