Read luo Nehemia 12 Bible Online

Nehemia 12 - luo bible

Nehemia 12

¹Jodolo gi jo-Lawi mane oduogo gi Zerubabel wuod Shealtiel, kendo gi Jeshua, ne gin Seraya gi Jeremia gi Ezra

²gi Amaria gi Maluk gi Hatush

³gi Shekania gi Erhum gi Meremoth

⁴gi Iddo gi Genethon gi Abia

⁵gi Mijamin gi Maadia gi Bilgia

⁶gi Shemaya gi Joyarib gi Jedaya gi Salu gi Amok gi Hilkia kod Jedaya.

⁷Jogo ema nobedo jotend jodolo gi jowetegi e ndalo Jeshua.

⁸Jo-lawi ne gin: Jeshua gi Binui gi Kadmiel gi Sherebia gi Juda kod Matania. Matania nogono Kachiel gi jowetene, ema ne telo ni wer sa lemoo.

⁹Bakbukia gi Uni ma jowetegi to ne chung’ momanyore kodgi ka wer.

¹⁰Jeshua nonywolo Joyakim, to Joyakim nonywolo Eliashib. Eliashib nonywolo Joyada,

¹¹to Joyada nonywolo Jonathan. Jonathan to nonywolo Jadua.

¹²E ndalo Joyakim, jodolo mane jodong dhoudi ne gin: Meraya mane jatend joka Seraya, gi Hanania jatend joka Jeremia,

¹³gi Meshulam jatend joka Ezra, gi Jehohanan jatend joka Amaria,

¹⁴gi Jonathan jatend joka Maluk, gi Josef jatend joka Shebania,

¹⁵gi Adna jatend joka Harim, gi Helkia jatend joka Merayoth,

¹⁶gi Zekaria jatend joka Iddo, gi Meshulam jatend joka Ginethon,

¹⁷gi Zikri jatend joka Abia, kod jatend joka Miniamin, gi Piltai jatend joka Moadia,

¹⁸gi Shamua jatend joka Bilgia, gi Jehonathan jatend joka Shemaya,

¹⁹gi Matenai jatend joka Joayarib, gi Uzi jatend joka Jedaya,

²⁰gi Kalai jatend joka salu, gi Eber jatend joka Amok,

²¹gi Hashabia jatend joka Hilkia, kod Nethaneel jatend joka Jedaya.

²²Nying jodong dhout jodolo noyudi kosendiki, chakre ndalo mag Eliashib gii mag Joyada gi mag Johanan kod mag Jadua, nyaka chop ndalo loch Darius ruodh Persia.

²³Nying jodong dhout jo-Lawi bende nondik e kitap Weche mag Ndalo, to mana nyaka chop ndalo Johanan nyakwar Eliashib.

²⁴Jotend jo-Lawi ne gin Hashabia gi Sherebia gi Jeshua gi Binui kod Kadmiel, kaachiel gi jowetegi mane giwarorego e tich pako Nyasaye kendo goyone erokamano, ka giluwo chik Daudi ng’at Nyasaye.

²⁵Matania gi Bakbukia gi Obadia gi Meshulam gi Talmon kod Akub ne jorit dhorangeye kendo ne rito ut keno man e dhorangeye.

²⁶Mano e kaka nochan tich e ndalo Joyakim wuod Jeshua, ma wuod Jozadak, kendo e ndalo Nehemia ma ruoth, kendo e ndalo Ezra ma jadolo kendo japuonj chik.

²⁷E kinde mane orwakie ohinga mar Jerusalem, noluong jo-Lawi duto, kamoro amora mane gidakie, mi gibiro Jerusalem mondo giwer kendo gigo erokamano e nyasino, ka gigoyo ongeng’o gi nyigwerni kod thumbe mamoko.

²⁸Jo-Lawi ma jower nochokore koa e gwenge mokiewo gi Jerusalem, kendo koa e miech jo-Netofa

²⁹kendo Beth-gilgal kod gwenge mag Geba gi Beth-azmoth, nikech jower nosegedo machiegni gi Jerusalem.

³⁰Jodolo gi jo-Lawi nopwodhore giwegi, eka ne gipwodho ji, kendo ne gipwodho dhorangeye kod ohinga.

³¹Bang’ mano, naidho ewi ohinga gi jodong Juda, mi achano jower e migepe ariyo madongo ogo erokamano. Migawo achiel noluwo wi ohinga bat korachwich, kochiko Ranga Owuoyo.

³²Hoshaya noluwo bang’ migawono, kaachiel gi nus jodong Juda,

³³kod Azaria gi Ezra gi Meshulam

³⁴gi Juda gi Benjamin gi Shemaya kod Jeremia.

³⁵Jodolo moko bende nodhi kodgi, ka goyo tung’. Ne gin Zekaria wuod Jonathan ma wuod Shemaya ma wuod Matanaya ma wuod Mikaya ma wuod Zakur ma wuod Asaf,

³⁶kaachiel gi jowetene ma Shemaya gi Azarel gi Milalai gi Gilalai gi Maai gi Nethaneel gi Juda kod Hanani, ka giting’o thumbe mane Daudi ng’at Nyasaye oloso. Ezra japuonj chik ema notelonigi.

³⁷Ne gikadho Ranga Soko, eka ne gichomo nyimgi tir, ka giidho raidhi nyaka dala Daudi, kama ohinga oting’orego. Bang’e ne gikadho Od Daudi, mi giwuotho nyaka Ranga Pi, man yo wuok chieng’.

³⁸To migap jower machielo nochomo bat koracham, kendo naluwogi gi nus jodongo komachielo. Ne waluwo ohinga kwakadho kama oger mabor mar ng’icho mar Kende Mach, nyaka kama ohinga lachgo.

³⁹Ne wakadho Ranga Efraim gi Ranga Dala Machon gi Ranga Rech gi kama oger mabor mar ng’icho mar Hananel kod mar Hamea nyaka wachopo e Ranga Rombe. Mi ne gichung’ e Ranga Od Jorito.

⁴⁰Kamano migep jower ariyogo nodhi mochung’ e Od Nyasaye, kaachiel gi an kod nus jotelo

⁴¹gi jodolo ma Eliakim gi Maaseya gi Miniamin gi Mikaya gi Elioenai gi Zekaria kod Hanania, ka jogoyo tung’,

⁴²kaachiel gi Maaseya gi Shemaya gi Eleazar gi Uzi gi Jehohanan gi Malkia gi Elam kod Ezer. Jower nower matek, ka Izrahia otelonigi.

⁴³Misango maduong notim chieng’no, kendo ji nobedo mamor nikech Nyasaye nosetimonigi gima omiyo gimor ahinya. Kata mana mon gi nyithindo bende nodoko mamor, kendo mahu mar mor mane otimore Jerusalem ne winjore gi kuma bor.

⁴⁴Chieng’no noyier ji mondo orit udi mibiro kanoe chiwo gi chamb gwel gi chiwo mar achiel kuom apar, kendo mondo ochok chiwo moa e gwenge mokiewo gi mier madongo mondo opog ni jodolo gi jo-Lawi kaka chik dwaro. Jo-Yahudi duto ne mor sidang’ kuom tich jodolo gi jo-Lawi.

⁴⁵ Jodolo gi jo-Lawi notiyo tich Nyasachgi, kaachiel gi tich pwodhruok, kaluwore gi chike mag Daudi kod mag Solomon wuode. Jower gi jorit dhorangeye bende notimo kamano.

⁴⁶Ndalo Daudi ema ne Asaf okawoe tich bedo jatend jower, kochano wende mag pak kod mag goyo erokamano ni Nyasaye.

⁴⁷Kendo e ndalo Zerubabel gi ndalo Nehemia, jo-Israel duto nochiwo pok ni jower kendo ni jorit dhorangeye kaka ne dwarore pile. Bende ne gipogo ni jo-Lawi gik moketnigi, mi jo-Lawi bende nopogo ni joka Harun pokgi.