Read luo Nehemia 13 Bible Online

Nehemia 13 - luo bible

Nehemia 13

¹ Chieng’no kane osom kitap Musa e nyim ji, noyud kondik ni ja-Amon kata ja-Moab ok onego donji e chokruok mar jo-Nyasaye nyaka chieng’,

² nikech ne ok giromo ni jo-Israel gi chiemo kata gi pi, to ne ging’iewo Baalam mondo okuong’gi. To Nyasachwa noloko kuong’no obedo gueth.

³Kane ji owinjo chikno, ne gigolo jo-Israel ma anywola mondo oa kuomgi.

⁴To kane mago pok otimore, Eliashib jadolo mane oket jarit ut keno mag Od Nyasachwa, kendo mane wat Tobia, noyudo osemiyo Tobia ot maduong’.

⁵Odno ema yandi ikanoe chiwo mag cham gi ubani gi gik lemo mitiyogo e Hekalu, gi achiel kuom apar mag cham gi divai manyien gi modhi, mane ochiw ni jo-Lawi gi jower gi jorit dhorangeye kaka chik dwaro, kaachiel gi chiwo mane opog ni jodolo.

⁶E kindego duto ne ok an Jerusalem, nikech noyudo ka asedok ir Artaxerxes ruodh Babulon e higa piero adek gariyo mar lochne. To bang’ kinde moko, nakwayo ruoth thuolo,

⁷mondo aduog Jerusalem. To kane ochopo kuno, eka nafwenyo gima rach mane Eliashib otimo kuom miyo Tobia ot laru mar Od Nyasaye.

⁸Wachno nodokona malit ahinya, mi gik Tobia duto mane ni e ot, nawito oko.

⁹Bang’ mano nagolo chik mondo opwodh odno, kendo odwokie gik lemo mag Od Nyasaye gi chiwo mag cham kod mar ubani.

¹⁰ Nafwenyo bende ni jo-Lawi koro ne ok mi pokgi, omiyo gin, kaachiel gi jower, mane tiyo tich lemo mopogore opogore, ne gisedhi e puothegi.

¹¹Kuom mano nadhaw gi jodongo, ka apenjogi niya, “Marang’o Od Nyasaye owe nono?” Bang’e naluongo jo-Lawigo, mi adwokogi e tijgi.

¹² Eka jo-Juda duto nokelo achiel kuom apar mag mo e ut keno.

¹³Naketo Shelemia jadolo gi Zadok jakweno gi Pedaya ja-Lawi mondo obed jotend tijno, Hanan wuod Zakur ma wuod Matania obed jakonygi, nikech giduto ne gin joma kare. Tijgi ne en pogo ni jowetegi gik monego giyudi.

¹⁴A Nyasacha, par gima natimono, kendo iguedha, to kik wiyi wil gi timbe mabeyo mosetimo ni Odi kendo ni tiji.

¹⁵ E ndalo gogo naneno jomoko e piny Juda mabiyo mzabibu chieng’ Sabato, mondo olosgo divai, kod joma choko divai gi mzabibu gi ng’owo gi gik ohala moko ma giyieyo kuom kenje chieng’ Sabato, kendo gikelo Jerusalem. Mi nakwerogi ni kik gihon chiemo chieng’ Sabato.

¹⁶Jo-turo bende mane odak Jerusalem ne kelo rech kod gik ohala moko mopogore opogore chieng’ Sabato, mi gihonogi ni jo-Yahudi, kata mana e Jerusalem.

¹⁷Kuom mano nadhaw gi jodong Juda, ka awachonigi niya, “Utimo gima rach manadi, kuchido chieng’ Sabato marach kama?

¹⁸Donge ma e gima kwereu notimo, momiyo Nyasachwa osekelo masirani kuomwa kendo kuom dalawani? Koro umedo kelo mirimb Nyasaye kuom Israel, kuchido chieng’ Sabato.”

¹⁹Omiyo ka nigolo ji e dhorangeye mag Jerusalem sa mane Sabato dwaro chakore, nagolo chik mondo dhorangeye olor, kendo kik yawgi nyaka chieng’ Sabato rum. Bende naketo jotichna moko mondo orit dhorangeye ni kik misigo moro amora donj e dala Jerusalem chieng’ Sabato.

²⁰To bang’ mano, johala gi joma hono gik mopogore opogore nobiro dichiel kata diriyo, mobworo but Jerusalem.

²¹To nasiemogi ka apenjogi niya, “Ang’o momiyo ubworo but ohinga mar Jerusalem? Kuchako utimo kamano, to ubiro neno!” Bang’ mane ne ok gichako giduogo chieng’ Sabato kendo.

²²Bende nachiko jo-Lawi mane onego opwodhre mondo okaw tich mar rito dhorangeye ni nyaka gine ni chieng’ Sabato orit maler. A Nyasaye, par gima natimono bende, kendo iguedha, mi ikecha kuom herani maduong’ mosiko.

²³ E ndalogo bende naneno jo-Yahudi moko mane osekendo nyi Ashdod gi nyi Amon kod nyi Moab.

²⁴Nyithindgi moko ne wacho dho Ashdod, kata dhok moro nono, to ne ok nyal wacho dho jo-Yahudi.

²⁵Nadhaw kodgi, mi ayanyogi, to jomoko kuomgi nagoyo, mi apudho yie wigi. Kendo namiyo gikuong’ore e nyim Nyasaye ni ok giniyie jogo okend nyigi, kendo ni ok ginikend nyi jogo, kata kendogi ni yawuotgi.

²⁶ Nawachonigi niya, “Donge ruoth Solomon noketho mana nikech wach mon makama? E pinje duto ne onge ruoth moro machal kode. Nyasache nohere mokete ruodh Israel duto, to kata en bende nyi jomoko notere e richo.

²⁷Kamano, koro uparo ni onego waluw timbeugo, kendo waketh ketho maduong’ni, kwaweyo Nyasachwa nikech kendo nyi pinje moko?”

²⁸ To noyudo ka achiel kuom yawuot Joyada ma wuod Eliashib jadolo maduong’ osekendo nyar Sanbalat ja-Horon. Emomiyo ne ariembe buta.

²⁹A Nyasacha, par kaka gisechido tich dolo, kendo ketho kuong’ruok ma jodolo gi jo-Lawi timo.

³⁰Kamano napwodho ji kuom gik moko duto moa e pinje mamoko, kendo nadwoko jo-Lawi gi jodolo e tijegi.

³¹To bende nachano mondo okel chiwo mar yien kaka dwarore, kaachiel gi chamb agwela. A Nyasaye, para kendo iguedha.