Read luo Nehemia 3 Bible Online

Nehemia 3 - luo bible

Nehemia 3

¹Eliashib jadolo maduong’ kod jodolo mamoko ne jochako tich, mogero Rangach miluongo ni Ranga Rombe. Ne gichungo sirni mage, mi girwako thikene. Ne gigero ohinga mochopo kama oger mabor mar ng’icho mar Hamea, kendo nyaka kama oger mabor mar ngicho mar Hananel. Eka ne giguedhe.

²To jo-Jeriko nogedo e dir Eliashib, ka Zakur wuod Imri to ne gedo e dir jo-Jerikogo.

³Ranga Rech to yawuot Hasenaa ema nogero. Ne gichungo sirni mage, kendo ne girwako thikene gi radedi kod lodi mage.

⁴Meremoth wuod Uria ma wuod Hakoz nogero migape e dirgi. Ng’at mane ogedo e dir jo-Meremoth ne en Meshulam wuod Berekia ma wuod Meshezabel. Zadok wuod Baana ema nogedo e dir Meshulam,

⁵to e dir Zadok to Tekoa ema nogedoe. To jodonggi ne ok oyie tiyo tich mane ruoth omiyogi.

⁶Joyada wuod Pasea kod Meshulam wuod Besodeya ne jogero Ranga Dala Machon. Ne gichungo sirni mage, mi girwako thikene gi radedi kod lodi mage.

⁷Melatia ja-Gibeon gi jo-Mizpa nogedo e dir jo-Tekoa mochopo e od jatelo man loka aora Yufrate.

⁸Uziel wuod Marhaya, jatich dhahabu, notiyo e dir jogo. Hanania, ma jalos gik mang’ue ng’ar, nogedo mokiewo gi Uziel ka gigero ohinga mar Jerusalem nyaka kama ohinga lachgo.

⁹Refaya wuod Hur mane jatend dir gweng’ Jerusalem bende nogero migape mokiewo gii migap Hanania.

¹⁰Jedaya wuod Harumaf nogedo kama omanyore gi ode owuon, to Hatush wuod Hashabnia ne tiyo e dire.

¹¹Malkia wuod Harim, gi Hashub wuod Pahath-moab ne jochako ogero migawo machielo, kaachiel gi kama oger mabor mar ng’icho mar kende mach.

¹²Shalum wuod Halohesh, ma jatend dir gweng’ Jerusalem komachielo nogedo e dir jogo, ka nyige konye.

¹³Hanun gi jo-Zanoa nogero Ranga Holo, mi girwako thikene gi radedi kod lodi mage, to bende ne gigero ohinga ma borne oromo mita mia abich nyaka gichopo e Ranga Owuoyo.

¹⁴Ranga Owuoyono to Malkia wuod Rekab, jatend gweng’ Beth-hekerem ema nogero. Norwako thikene gi radedi kod lodi mage.

¹⁵Shalum Kol-hoze, jatend jo-Mizpa, nogero Ranga Soko, moketone tado, kendo orwako thikene gi radedi kod lodi mage. Bende nogero ohinga, chakre Yap Siloam, kama omanyore gi orundu mar ruoth, nyaka raidhi malor koa e Dala Daudi.

¹⁶Nehemia wuod Azbuk, jatend dir gweng’ Bethzur, nogedo e dir Shalum, mochopo nyaka kar liend Daudi, kendo nyaka yawo mokuny, kod od jolweny.

¹⁷Jo-Lawi ema notiyo e dir Nehemia. Hashabia, jatend dir gweng’ Keila, nogedo e dir Rehum wuod Bani, kochung’ ni jogweng’gi.

¹⁸Jowete Hashabia nogedo e dirgi. Ne gin jo-Binui wuod Hanadad, jatend dir gweng’ Keila machielo.

¹⁹Ezer wuod Jeshua jatend Mizpa nochako gero migawo machielo e dir jo-Binui, kama omanyore gi yo maidho kochomo kar keno mar gilweny man kama ohinga ogomogo.

²⁰Barak wuod Zebai bende nochako gero migawo moro, chakre kama ohinga ogomogono, nyaka dhood Eliashib jadolo maduong’.

²¹Meremoth wuod Uria ma wuod Hakoz nochako ogero migawo machielo e dir Barak. Migapeno nochakore e dhood Eliashib mochopo e giko mar od Eliashib.

²²Jodolo mane odak e gweng’ Jerusalem nogedo e dir Meremoth,

²³to Benjamin gi Hashub nogedo kama omanyore gi odgi. E dirgi, Azaria wuod Maaseya ma wuod Anania nogedoe kama omanyore gi ode.

²⁴Binui wuod Hanadad nochako ogero migawo moro e dir Azaria, chakre od Azaria nyaka kama oting’ore ma ohinga ogomogo.

²⁵Palal wuod Uzai nogedo momanyore gi kama oting’oreno, kendo momanyore gi od ruoth.

²⁶Pedaya wuod Parosh nochako gedo e dir Palal nyaka kama omanyore gi Ranga Pi, gi yo ka wuok chieng’ kendo momanyore gi kama oger mabor mar ng’icho mowuok oko.

²⁷E dir Pedaya, jo-Tekoa nochako ogero migawo machielo, chakre kama omanyore gi kama duong’ moger mabor mar ng’icho mowuok okono nyaka ohinga mar Ofel.

²⁸To koa e Ranga Farese, jodolo ema nogedo kama omanyore gi utgi.

²⁹Zadok wuod Imer nogedo e dir jodolo kama omanyore gi ode. E dir Zadok to Shemaya wuod Shekania mane jarit Rangach mochiko yo wuok chieng’, ema nogedoe.

³⁰Hanania wuod Shemelia, kod Hanun wuod Zalaf mar auchiel ne jochako gero migawo moro e dir Shemaya. Meshulam wuod Berekia noloso ohinga e dir jogo, kama omanyore gi ode.

³¹Malkia jatich dhahabu notiyo e dir Meshulam, mogedo nyaka od jotich Hekalu, kod od johala, kama omanyore gi Rangach Miyworoe, kendo nyaka ot man ewi tado mar kama ohinga ogomogo.

³²Jotich dhahabu kod joohala ema noloso ohinga chakre gorofa nyaka Ranga Rombe.