Read luo Nehemia 5 Bible Online

Nehemia 5 - luo bible

Nehemia 5

¹Bang’ kinde moko ji duto machwo gi mamon, nochako ywagore malit nikech gima ne jo Yahudi wetegi otimo.

²Jomoko ne ng’ur ni gisesingo yawuotgi gi nyigi mondo giyud chiemo ma digiresgo ngimagi.

³Jomoko to ne singo puothegi mag cham gi mag mzabibu kod utegi mondo giyud cham nikech kech.

⁴To jomoko bende ne singo puothegi mag cham gi mag mzabibu mondo giyud pesa ma digigolgo osuru ni ruoth.

⁵Ne giwacho niya, “Donge gik ma wakonyorego chalo mana gi gik ma ji duto konyorego? Nyithindwa bende chalo mana gi nyithind ji mamoko. To kata kamano pod wachuno yawuotwa gi nyiwa mondo obed wasumbni. Kata sani nyiwa moko osedoko wasumbni, to onge gima wanyalo timo, nikech puothewa mag cham gi mag mzabibu nie lwet jomoko.”

⁶Kane awinjo ywagruokgino kod weche mane giwacho, mirima maduong’ nomaka.

⁷ To nahoyo chunya, mi aparo gima onego atim. Bang’e nadhi maloso gi joka ruoth kod jotelo moko, ka akwerogi ni gisetimo marach kuom kawo jo-Yahudi wetegi ka gik mosing ni gope.

⁸Eka namedo wachonigi niya, “Jo-Yahudi weteu mane jopinje mamoko ong’iewo, wasewaro mwadwoko, kaka wanyalo, to un koro uso mana joweteu uwegi, to mano biro chunowa mana ni nyaka wawargi kendo!” Ne giling’ ka dhogi omoko.

⁹Eka nadhi nyime kawachonigi niya, “Gima utimo rach! Owinjore ubed joma oluoro Nyasaye ahinya, mondo ogendini ma wasikwa kik yud thuolo mar charowa.

¹⁰An awuon gi jowetena kod joga, waholo ji pesa kod cham, to ok wakaw ohala. Waweuru wach mar kawo ji ka joma osing kuom gope.

¹¹Dwoknigiuru utgi, kod puothegi mag cham gi mag mzabibu kod mag zeituni, kaachiel gi ohala museyudo kuom pesa gi cham gi mag mzabibu kod mag zeituni, kaachiel gi ohala museyudo kuom pesa gi cham gi divai manyien kod mo musehologi.”

¹²Eka ne gisingore niya, “Wabiro dwokonigi gigo duto, kendo ok wanadwar ohala moro kuomgi.” Koro eka naluongo jodolo, mi amiyo joma noseketho okuong’ore ni ginitim gima gisewacho.

¹³Bang’e nateng’o nangana, ka awachonigi niya, “Ng’ato ka ng’ato ma ok ochopo singruokni, to Nyasaye mondo oteng’ oko kuom joge kendo kuom mwandune, mana kaka aseteng’o nangana, modong’ nono.” Eka ji duto ma nochokore nowacho ni, “Obed kamano.” Mi ne gipako Ruoth Nyasaye. Bange ne gitimo kaka ne gisingore.

¹⁴To bende kuom higni apar gariyo duto mane abedoe jatend piny Juda, chakre higa mar piero ariyo mar loch ruoth Artaxerxes nyaka higa mar piero adek mar lochne, an gi jowetena ne ok wakawo chiemo mane oyie ni jatelo kawo kuom jopinyno.

¹⁵Jotelo ma nokwongona noketo ni ji ting’ mapek, ka gikawo kuomgi chiemoo kod divai ma nengogi ne romo nus kilo mar fedha odiechieng’ kodiechieng’. To bende jotichgi ne thago ji, to an ne ok atimo kamano, nikech naluoro Nyasaye.

¹⁶Bende naketo tekra duto e tich ohinga, kendo ne ok ang’iewo lowo

¹⁷To bende napidho jo-Yahudi mia achiel gi piero abich, koriwore gi jong’ad bura. Ji mamoko ma noa e pinje mokiewo kodwa bende narwako.

¹⁸Chiemo mane gichamo odiechieng’ kodiechieng’ ne romo dhiang’ achiel gi rombe auchiel machwe. Gwen bende nilosona, kendo bang’ ndalo apar apar nikelona divai mang’eny mopogore opogore. Mago duto nagolo kuom mwanduna awuon, to kata kamano, ne ok akawo chiemo mane oyie ni jatelo kawo kuom jopiny, nikech ji ne nigi ting’ mapek mohingogi.

¹⁹A Nyasacha, par gik moko duto masetimo ni jogi, kendo iguedha.