Read luo Nehemia 6 Bible Online

Nehemia 6 - luo bible

Nehemia 6

¹Sanbalat gi Tobia gi Geshem ja-Arabi kod wasikwa mamoko nowinjo ni wasetieko gero ohinga, ma onge kamoro momukore modong’, kata obedo ni ne pok aketo thike mag dhorangeye.

²Mano omiyo Sanbalat gi Geshem noluonga mondo adhi gi Hakefirim e paw Ono, alos kodgi. To mano ne mana riekogi mar timona marach.

³Omiyo naoronigi joote gi wach niya, “An gi tich maduong’, omiyo ok anyal biro. Ere kaka dawe tich mondo ochung’, ka abiro iru mwalo kuno?”

⁴Ne giluonga kamano nyading’wen, to e kinde ka kinde nadwokogi mana machalre.

⁵To e luong mar abich, Sanbalat noorona wach kod joote moting’o barua ma ok odin.

⁶Baruano nondikie niya, “Wach oselandore e kind ogendini ni in kod jo-Yahudi uchano ng’anyo, kendo Geshem bende osewinjo kamano. Mano emomiyo igero ohinga. Wawinjo bende ni in iwuon idwaro bedo ruoth.

⁷Kendo wawinjo ni iseketo jonabi mondo oland wach e Jerusalem, ni nigi ruoth, ma enie in. Bed gi ratiro ni ruoth biro winjo wachni, omiyo bi piyo mondo walos kodi.”

⁸To nadwokogi niya, “Onge gimoro mosetimore kaka uwachono. Mago mana weche mag miriambo, muhango un uwegi!”

⁹Giduto ne gidwaro bwogowa, ka giparo ni wabiro nyosore, kendo tichwa ok bi rumo. To namedo keto tekra duto e tich.

¹⁰Chieng’ moro nadhi e od Shemaya wuod Delaya ma wuod Mehetabel, mane chik otueyo e ode. Nowachona niya, “Wadhi e Od Nyasaye, mondo warom ei Kama Ler, kendo waloruru dhoudi, nimar gibiro biro negi gotieno.”

¹¹To nadwoke niya, “Bende ng’ato kaka an diring adier? Koso ng’ato kaka an nyalo donjo e Hekalu mondo oresre?

¹²Ooyo, ok abi donjo!” Eka nafwenyo ni Nyasaye ne ok oore, to nokoro wechego mana ni mondo ohinya, kendo ni Tobia gi Sanbalat ema nomiye asoya mondo okor wechego.

¹³Ne gimiye asoya mondo obwoga, adonj e Hekalu kamano, mi atim gima chik okwero mondo giketh nyinga.

¹⁴A Nyasacha, par gima Tobia gi Sanbalat josetimo, kendo par kaka Noadia janabi madhako kod jonabi mamoko josetemo bwoga.

¹⁵Chieng’ due piero ariyo gabich mar due Elul, ohinga norumo. Tich notieko ndalo piero abich gariyo.

¹⁶Kane wasikwa owinjo kamano, kendo ogendini mokiewo kodwa oneno tijno, ne giwuoro kaka en tich maduong’, kendo ne ging’eyo ni Nyasachwa ema nokonyowa.

¹⁷To e kindego duto jodong Juda ne oro barupe mang’eny ni Tobia, kendo ne giyudo dwoko moa kuome.

¹⁸Jo-Juda mang’eny ne ni kode e winjruok, nimar ne en or Shekania wuod Ara, kendo wuode ma Jehohanan nokendo nyar Meshulam wuod Berekia.

¹⁹Jogo ne pako Tobia e wang’a pile, kendo ne ginyise weche mane awacho. To bende Tobia nondikona barupe kobwogago.