Read luo Wuok 1 Bible Online

Wuok 1 - luo bible

Wuok 1

¹ Jo-Israel ma nodhi Misri gi Jakobo, moro ka moro gi joode, e magi:

²Reuben gi Simeon gi Lawi gi Juda

³gi Isakar gi Zebulun gi Benjamin

⁴gi Dan gi Naftali gi Gad kod Asher.

⁵Kar romb joka Jakobogo duto noromo piero abiriyo. (Josef to noyudo ka ni Misri.)

⁶Bang’e achien, Josef gi owetene kod tieng’no duto notho.

⁷ To jo-Israel nonywolo nyithindo mang’eny, mi ginya ahinya, kendo ne gipong’o piny, nyaka ne gibedo oganda maratego.

⁸ Koro ruoth manyien mane ok ong’eyo wach Josef nochako tich e Misri.

⁹Nowacho ni joge niya, “Neuru! Jo-Israel osedoko oganda maduong’ kendo maratego, ma koro nyalo loyowa.

¹⁰ Nyaka watang’, mondo watamgi kik ginya, nimar kapo ni lweny owuok, to kamoro ginyalo dok ni wasikwa, mondo giked kodwa, mi giring gia e pinywa.”

¹¹Kuom mano, jo-Misri noketo jo-Israel e tij athwon, ka nyipeche ritogi mondo giti matek, eka gibed moboch. Mano e kaka ne gigero ni Farao miech keno miluongo ni Pithom gi Rameses.

¹²To kaka nomed sandogi e kaka ne gimedo bedo mang’eny kendo gilandore, nyaka jo-Misri nodoko mosin kodgi, kendo oluorogi.

¹³Kuom mano ne gibembo wasumbgi ma jo-Israel gi tich mapek,

¹⁴ka gimiyo ngimagi doko matek gi tije achune mag nyono lowo, gi loso matafari, kod tije duto mag pur.

¹⁵Bang’e ruodh Misri nowacho ni mond Hibrania ariyo ma jocholo, miluongo ni Shifra gi Pua, niya,

¹⁶“Ka ucholo mond jo-Hibrania, mi uneno ka dhako moro onywolo nyathi ma wuowi, to neguru nyathino. To ka en nyathi ma nyako, to kik unege.”

¹⁷To jocholo noluoro Nyasaye, omiyo ne gichayo chik ruoth, mi ne ok ginego nyithindo machwo.

¹⁸Ruodh Misri noluongo jochologo, mopenjogi gimomiyo giweyo nyithindo machwo, mak ginego.

¹⁹Ne gidwoke niya, “Mond jo-Hibrania ok chal gi mond jo-Misri. Gin muchgi thoth, omiyon ginywolo nyithindo piyopiyo, kapok jacholo ochopo irgi.”

²⁰Kuom mano Nyasaye noguedho jochologo, kendo jo-Israel nomedo nya, modoko oganda maratego ahinya.

²¹Nyasaye nomiyo jocholo obedo gi nyithindo kod nyikwayo nikech ne giluore.

²² Bang’e Farao nochiko joge duto niya, “Nyithindo ma chwo duto ma jo-Hibrania onywolo, mondo uwit e aora Nael, to nyiri uwe odongi.”