Read luo Wuok 10 Bible Online

Wuok 10 - luo bible

Wuok 10

¹Ruoth Nyasaye nowacho ni Musa niya, “Dhi ir Farao, asemiyo chunye, kaachiel gi chuny jodonge obedo matek mondo anyisgi hondenagi,

²kendo mondo unyis nyithindu gi nyikwau e ndalo mabiro kaka nene afuwo jo-Misri gi honnigo. Kamano unung’e ni an e Ruoth Nyasaye.”

³Kuom mano Musa gi Harun nodhi ir Farao, mowachone niya, “Ruoth Nyasaye ma Nyasach jo-Hibrania owacho niya, ‘Pod ibiro dagi bolori e nyima nyaka kar ang’o? We joga oa mondo odhi olama.

⁴Ka pod itamori miyo joga thuolo mondo oa, to kiny nakel bonyo e pinyi,

⁵kendo gibiro nur e piny ma kata mana lowo ok nonen. Ginicham gik moko duto modong’, mane pe ok oketho, kaachiel gi yien duto.

⁶Ginipong’ uteni gi ute jodongi kod ute jogi. Ginibed marach moloyo gimoro amora ma wuoneu kata kwereu oseneno nyaka ne gibi e pinyni.’ ” Kane Musa osewuoyo kamano, noa moweyo Farao.

⁷Jodong Farao nowachone niya, “Ng’atni pod biro thagowa nyaka kar ang’o? We jo-Israel machwo odhi mondo olam Ruoth Nyasaye ma Nyasachgi. Donge koro ing’eyo ni Misri osekethore.”

⁸Kuom mano, noom Musa gi Harun, moduogo ir Farao, mi nowachonigi niya, “Unyalo dhi mondo ulam Ruoth Nyasaye ma Nyasachu. To ng’a gini ma biro dhi?”

⁹Musa nodwoke niya, “Wabiro dhi waduto, joma tindo kod joma dongo, nyiri gi yawuowi, kaachiel gi jamni duto, nimar waduto nyaka watim ni Ruoth Nyasaye sawo.”

¹⁰Farao nowachonigi niya, “Nyasaye mondo okonyu ka po ni ayienu udhi kaachiel gi mondu kod nyithindu! Nyaka bed ni uchano timo gimoro marach.

¹¹Ooyo, ok ayienu timo kamano! Un joma chwo kende ema unyalo dhi mondo ulam Ruoth Nyasaye, nikech mano ema nudwaro.” Mi noriembogi gia e nyime.

¹²Ruoth Nyasaye nowacho ni Musa niya, “Rie badi e piny Misri mondo bonyo obi ocham gik moko duto mane pe oweyo ma ok ochamo.”

¹³Omiyo Musa norieyo ludhe e piny Misri, mi Ruoth Nyasaye notugo yamb ugue mokudho e pinyno odiechieng’no duto gotienono duto. To kane piny oru, noyudo ka yamb ugue osekelo bonyo.

¹⁴ Bonyogo nopie e piny Misri mang’eny ma nyaka nene pok one bende ok none nyaka chieng’.

¹⁵Ne gipoto piny mi piny nolokore bonyo lilo kendo ne gichamo gik moko duto mane dongo e piny kaachiel gi olembe duto mane pe oweyo. Onge kata lith oboke mane odong’ e piny Misri duto.

¹⁶Farao noluongo Musa gi Harun, mowachonigi niya, “Aseketho ni Ruoth Nyasaye ma Nyasachu, kendo ni un bende.

¹⁷Koro yie ung’wonnae dichiel, kendo ulam Ruoth Nyasaye ma Nyasachu mondo oyie ogol masira malichni kuoma.”

¹⁸Kuom mano Musa noa ir Farao modhi olamo Ruoth Nyasaye.

¹⁹Ruoth Nyasaye noloko yamono mi okudho matek kaa imbo, motero bonyo e Nam Makwar, ma kata achiel ne ok odong’ Misri.

²⁰To Ruoth Nyasaye nomiyo chuny Farao odoko matek, mi ne ok oweyo jo-Israel odhi.

²¹Bang’ mano Ruoth Nyasaye nowacho ni Musa niya, “Rie badi kochomo polo mondo mudho mandiwa, ma ji muloe mana gi lwetgi, oim piny Misri.”

²² Musa norieyo bade kochomo polo, mi mudho mandiwa noimo piny Misri duto kuom ndalo adek.

²³Onge ja-Misri mane nyalo neno wadgi, kendo onge ng’at mane owuok e ode kuom ndalo adekgo. To kamoro amora mane jo-Israel odakie ema ler ne nitie.

²⁴Farao noluongo Musa, mowachone niya, “Dhiuru ulam Ruoth Nyasaye. Mondu gi nyithindu bende nyalo dhi kodu, mak mana jambu ema nyaka dong’ ka.”

²⁵Musa nodwoke niya, “To ing’eyo ni in ema nyaka imiwa jamni mwatimogo ni Ruoth Nyasaye ma Nyasachwa misengni miwang’o pep kod misengni mamoko.

²⁶To jambwa bende nyaka wadhigo, kendo onge kata achiel ma biro dong’ chien, nimar dipo ka wadwaro jamni moko mwadhi lamogo Ruoth Nyasaye ma Nyasachwa kuom jambwago, nikech kapok wachopo kuno to ok wang’eyo ni wadhi lame gang’o.”

²⁷To Ruoth Nyasaye nomiyo chuny Farao odoko matek, mi nodagi ni kik gidhi.

²⁸Nowacho ni Musa niya, “Aye e wang’a! To bende kik ichak inena, nikech chieng’ minenae kendo to nitho!”

²⁹Musa nodwoke ni, “Adier, ok nachak aneni kendo.”