Read luo Wuok 12 Bible Online

Wuok 12 - luo bible

Wuok 12

¹ Ruoth Nyasaye nowacho ni Musa gi Harun e piny Misri niya,

²“Dueni ema biro bedonu due mokwongo mar higa.

³Nyis jo-Israel duto kama: Chieng’ due apar mar dueni ng’ato ka ng’ato nyaka yier nyarombo kata nyadiel ni joode, tiende ni chiayo achiel ni ot ka ot.

⁴To kapo ni joot moro nok ahinya ma chiayo ngima ohingo, to wuon odno kod ng’at modak bute nyaka riwre e chiayono. Nyaka upim gima ng’ato ka ng’ato nyalo chamo, mondo ung’ego kar romb joma oromo chiayo achiel.

⁵Chiayono nyaka bed nyarombo kata nyadiel ma dichwo ma jahiga achiel ma onge songa.

⁶Kanuru chiayogo nyaka chop chieng’ mar apar gang’wen mar dueni, eka oganda jo-Israel duto mondo oneggi ka piny dwaro yuso.

⁷Bang’e gikaw remo, giwirgo sisi mag dhoudi kod wi dhoudi mag udi duto ma nochamie jamnigo.

⁸Nyaka gibul ring’o gotienono, kendo gichame gi makati ma ok ketie thowi, kaachiel gi alode makech.

⁹Kik ucham ringe moro manumu, kata motedi, to nyaka bule duto, kaachiel gi wiye gi tiendene kod jamb iye.

¹⁰Kik uwe lemo moro dong’ nyaka okinyi. To kapo ni moro odong’, to nyaka wang’e e mach.

¹¹“Nyaka uchame kutueyo okanda e nungou, kendo kurwako wuoche e tiendu, kendo kumako ludhe e lwetu; to bende nyaka uchame piyopiyo. En sap Pasaka mar Ruoth Nyasaye.

¹²Otienono nawuoth e piny Misri duto kendo naneg nyathi ka nyathi ma dichwo makayo mar dhano kod mar chiayo. An e Ruoth Nyasaye, kendo anakum nyiseche duto mag jo-Misri.

¹³Remb nyirombego nobed kido ma nyiso udi mudakie, kendo kaneno remono to anakadhu, mi masich tho magoyogo piny Misri ok nomaku.

¹⁴ “Odieching’no nobednu chieng’ rapar, omiyo nyaka urite ka sawo mochwere ni Ruoth Nyasaye kuom tiengeu duto.

¹⁵Nyaka ucham makati ma ok ketie thowi kuom ndalo abiriyo. Chieng’ mokwongo, nyaka ugol thowi duto manie uteu, nimar ka ng’ato kuomu ochamo makati moketie thowi chakre chieng’ mokwongo nyaka chieng’ mar abiriyo to nong’ad kare oko kuom oganda jo-Israel.

¹⁶Chieng’ mokwongo kod chieng’ mar abiriyo, nyaka utim chokruok moyiedhi. Kuom ndalo ariyogo kik uti tich moro mak mana tij loso chiemo.

¹⁷Nyaka utim sawo mar makati ma ok ketie thowi, nikech chieng’no ema nogolie ogendu e piny Misri. Tiengeu duto nyaka rit odiechieng’no mondo obed chieng’ sawo mochwere.

¹⁸Chakre odhiambo mar due apar gang’wen mar due mokwongo, nyaka odhiambo mar due piero ariyo gachiel ema unuchamie makati ma ok ketie thowi.

¹⁹Kuom ndalo abiriyogo kik thowi bedie uteu, nikech ng’at mochamo gimoro moketie thowi nong’ad kare oko kuom oganda jo-Israel, bed ni en japiny kata jadak.

²⁰Kik ucham gimoro moketie thowi, to nyaka ucham mana makati ma ok ketie thowi kamoro amora mudakie.”

²¹Musa noluongo jodong Israel duto, mowachonigi niya, “Ng’ato ka ng’ato mondo odhi oyier nyarombo kata nyadiel ni joode, mondo unegi kutimogo Pasaka.

²²Eka ukaw oboke mag owino ulutie remo manie tawo, kendo uwirgi wi dhoudi kod sisi mag dhoudi. Kik ng’ato kuomu wuog oko nyaka okinyi.

²³ Ruoth Nyasaye biro wuotho e piny Misri duto, mondo oneg jo-Misri, to enokadh dhoot ka dhoot moneno remo e wiye, kendo e sisi mage, kendo ok nowe malaika maneko donje uteu mondo onegu.

²⁴“Rituru chikegi mochwere kaachiel gi nyithindu.

²⁵Ka udonjo e piny ma Ruoth Nyasaye nomiu kaka osesingore, to nyaka urit sawoni.

²⁶To ka nyithindu nopenju tiende,

²⁷to unudwokgi ni, ‘En misango mar Pasaka mitimo ni Ruoth Nyasaye nikech nokadho ut jo-Israel e piny Misri konego jo-Misri, to oweyo miechwa.’ ” Kane Musa otieko wuoyo, jo-Israel nogoyo chonggi piny molemo.

²⁸Ne gidhi, mi girito wechego, kendo gitimo gima Ruoth Nyasaye nochiko Musa gi Harun.

²⁹ E dier otienono tir, Ruoth Nyasaye nonego nyithindo ma yawuowi makayo duto, chakre kach ruoth Farao nyaka kach ng’at motue e jela, kaachiel gi nyithindo makayo duto mag jamni.

³⁰Farao gi jodonge kod jo-Misri duto nochiew gotienono, kendo ne nitie ywak malich ahinya e Misri nimar ne onge kata dala achiel ma ok nyathi ma wuowi othoe.

³¹Otieno nogo Farao noluongo Musa gi Harun mowachonigi niya, “Wuoguru gi jo-Israel piyopiyo mondo uwe joga. Dhiuru ulam Ruoth Nyasaye kaka usekwayo.

³²Jambu bende kawuru uago. An bende lamnauru mondo ayud gueth.”

³³Jo-Misri norungo jo-Israel mondo oa e pinygi piyopiyo, ka giwacho niya, “Waduto wabiro tho ka ok ua.”

³⁴Omiyo jo-Israel nokawo sufriache mag makati moting’o mogo modwal mapok oketie thowi. Ne giboyogi gi nenggi, mi giting’ogi e gokgi.

³⁵ Noyudo ka jo-Isreal osekwayo jo-Misri lewni kod gik moko molos gi fedha kod dhahabu, kaka Musa nosechiko.

³⁶Ruoth Nyasaye nomiyo jo-Misri ogeno jo-Israel, mi ne gimiyogi gik moko duto mane gikwayo. Kamano e kaka ne giyako jo-Misri.

³⁷Jo-Israel nochako wuoth Rameses kochomo Sukoth. Ne gin ji alufu mia auchiel ka ok okwan mon gi nyithindo.

³⁸Oganda maduong’ mar ji mamoko kaachiel gi jamni bende nodhi kodgi.

³⁹Ne gikawo mogo modwal mane giago Misri, mi gitedogo makati ma ok oketie thowi. Ne ok oketie thowi nikech ne oriembgi gia Misri apoya. Bende ne ok giyudo thuolo kata mana mar tedo chiemo ma gidhi chamo e wuoth.

⁴⁰ Jo-Israel nosedak e piny Misri kuom higni mia ang’wen gi piero adek.

⁴¹To chieng’ mane higni mia ang’wen gi piero adekgo orumoe ema ne ogend Ruoth Nyasaye duto owuokie Misri.

⁴²Ne en otieno mane Ruoth Nyasaye oritogie mondo ogolgi e piny Misri. Otieno nogono en otieno moket mondo jo-Israel duto oparie Ruoth Nyasaye nyaka chieng’ ka ginindo bedo.

⁴³Ruoth Nyasaye nowacho ni Musa gi Harun niya, “Magi e chike monego urit kitimo Pasaka: Jodak kik chame,

⁴⁴to wasumbini duto mong’iew nyalo chame mana kuseterogi nyangu.

⁴⁵To japiny moro kata ng’ato ang’ata mondiki kik chame.

⁴⁶ Nyarombo ka nyarombo nyaka cham mana e ot achiel; kik gol lemo kata achiel oko, bende kik utur choke kata achiel.

⁴⁷Oganda jo-Israel duto nyaka tim sawoni.

⁴⁸Kapo ni nitie jadak moro kuomu ma dwaro timo Pasaka ni Ruoth Nyasaye, to nyaka ukuong uter joge machwo duto nyangu, eka onyalo riwore kodu e timo sawono, mi koro nokwane ka ja-Israel hie. To ng’at ma ok oter nyangu kik chame.

⁴⁹Chikni otweyo ja-Israel gi jadak machalre.”

⁵⁰Jo-Isreal notimo gik moko duto mane Nyasaye ochiko Musa gi Harun,

⁵¹mi chieng’onogo, ema nogoloe jo-Israel e piny Misri, kochan gi e ogendgi.