Read luo Wuok 13 Bible Online

Wuok 13 - luo bible

Wuok 13

¹Ruoth Nyasaye nowacho ni Musa niya,

² “Nyathi ka nyathi makayo nyaka walna, nikech dhano kata chiayo mokwong nywol e Israel en mara.”

³Musa nowacho ni jo-Israel niya, “Nyaka upar odiechieng’ ma uwuokie Misrini, nikech Ruoth Nyasaye ogolou gi tekone maduong’ e piny mane ubedoe wasumbini. Makati moketie thowi ok onego cham kawuono,

⁴nikech odiechieng’ni, due mar Abib, e chieng’ wuoku Misri.

⁵Ruoth Nyasaye nosingore ni kwereu ni nomiu piny momew kendo machiek ahinya ma jo-Kanaan gi jo-Hiti gi jo-Amor gi jo-Hivi gi jo-Jebus odakie. Ka Ruoth Nyasaye oseterou kuno, to nyaka utim sawoni e due nogoni.

⁶Nyaka ucham makati ma ok ketie thowi kuom ndalo abiriyo, to chieng’ mar abiriyo utim sawo ni Ruoth Nyasaye.

⁷Makati ma ok ketie thowi, ema nucham kuom ndalo abiriyogo, to makati miketoe thowi, kata gimoro amora moket gi thowi, kik yud e pinyu duto.

⁸Odiechieng’no nyaka unyis yawuotu niya, ‘Ma ema waparogo gima Ruoth Nyasaye notimonwa kwawuok Misri.’

⁹Raparni nyaka bed ka kido e lwetu, kendo ka ranyisi e lela wang’u mondo usik kuwacho chik Ruoth Nyasaye e dhou, nimar Ruoth Nyasaye nogolou Misri gi tekone maduong’.

¹⁰Rituru chikni e higa ka higa e ndalo moketi.”

¹¹“Ruoth Nyasaye nokelu e piny Kanaan mane osingore ni nomiu kaachiel gi kwereu. Kosemiyougo,

¹² to nyaka uchiwne nyithindu machwo makayo duto. Nyithind jambu makayo machwo duto bende gin mag Ruoth Nyasaye.

¹³Nyaka uwal nyithind kenjeu machwo makayo duto, kuketo nyirombe kargi. To ka ok udwar warogi, to nyaka utur ng’utgi. Bende nyaka uwar yawuowi makayo duto munywolo.

¹⁴Ka chieng’ moro yawuotu penjou ni, ‘Ere tiend gima utimoni?’ To nyaka uduokgi niya, ‘Ruoth Nyasaye nogolowa gi tekone maduong’ e piny Misri, kuma ne wabedoe wasumbini.

¹⁵Kane Farao otamore weyowa mondo waa, Ruoth Nyasaye nonego nyithindo makayo duto, mag dhano gi mag jamni, e piny Misri. Mano emomiyo watimo ni Nyasaye misango gi nyithind jamni machwo makayo duto, to wawaro nyithindwa makayo kwachiwo gik moko kargi.

¹⁶Timni nyaka bednu rapar, mana ka kido manie lwetu kata ka ranyisi manie lend wang’u, nikech Ruoth Nyasaye nogolowa Misri gi tekone maduong’.’ ”

¹⁷Kane Farao oweyo jo-Israel mondo odhi, Nyasaye ne ok otelonigi e yo madhi e piny Filistia, kata obedo ni yorno ema ng’ado machiegni. Nyasaye noparo niya, “Ka jo-Israel oneno ni gibiro kedo, to chunygi nyalo lokore mi gidog Misri.”

¹⁸Omiyo kar luwo yorno to Nyasaye notelonigi e yo maluoro maluwo thim kochomo Nam Makwar. Jo-Israel noa Misri koikore ni lweny.

¹⁹ Musa nokawo chok Josef, modhigo, nikech Josef nosemiyo jo-Israel osingore, kowachonigi niya, “Chieng’ moro Nyasaye nokonyu, omiyo ka udhi, to mondo ukaw chokena udhigo.”

²⁰Ne gia Sukoth, mi giwuotho nyaka Etham man e lak thim.

²¹Godiechieng’ Ruoth Nyasaye notelo nyimgi kobet e siro mar bor polo, mondo onyisgi yo, to gotieno notelo nyimgi ei siro mar mach, mondo omenynigi ler. Kamano ne ginyalo wuotho odiechieng’ gotieno.

²²Siro mar bor polo nosiko kotelo nyimgi godiechieng’ to siro mar mach ne telonigi gotieno.