Read luo Wuok 15 Bible Online

Wuok 15 - luo bible

Wuok 15

¹ Bang’e Musa gi jo-Israel nowero ni Ruoth Nyasaye wendni: “Abiro wer ni Ruoth Nyasaye nikech oseyudo duong’ mipako ahinya. Osewito farese kod joithgi e nam.

² Ruoth Nyasaye e tekona, kendo e wenda, En ema osewara. En e Nyasacha, kendo abiro pake. En e Nyasach wuora, kendo abiro miye duong’.

³Ruoth Nyasaye en jalweny, kendo Ruoth Nyasaye nyinge.

⁴Osewito geche Farao gi jolweny mage e nam, kendo jatend Farao moyier josenimo e nam Makwar.

⁵Nam matut oimogi. Ne ginyumore piny ka kidi.

⁶“A Ruoth Nyasaye, badi ma korachwich nigi teko maduong! Oturo wasiki matindotindo.

⁷Kuom duong’ mar tekoni niloyo joma nopiem kodi. Mirimbi noliel ka mach, mowang’ogi ka tiang’.

⁸Much umi nomiyo pi ogingore, mi apaka nochung’ tir ka ohinga, kendo nam matut ne opoto nyaka pier pi piny

⁹Jasikwa nowacho niya, ‘Analawgi, mi ajukgi! Anape mwandugi, kendo anayak gimoro amora ma adwaro. Anawuodh ligangla, kendo anatiekgi gi tekona.’

¹⁰To in, a Ruoth Nyasaye, nikudho muya achiel kende, mi nam oimogi, Ne ginimo ka nyinyo e apaka madongo.

¹¹A Ruoth Nyasaye, Ere Nyasaye machal kodi? Ere ng’ama ler ka in? Ere ng’ama chal kodi, manyalo timo honni kod timbe madongo miwuoro?

¹²Nirieyo badi ma korachwich, mi piny nomwonyo wasikwa.

¹³Kuom herani mosiko isetelo ni joma niwaro. Kuom tekoni maduong’ isetelonigi nyaka kar dakni maler.

¹⁴Ogendini moko osewinjo, mi otetni Rem machal gi muoch omako jo-Filistia.

¹⁵Koro luoro omako jodong Edom, kendo ruodhi mag Moab ochako kirni. Ji duto modak Kanaan, bende chirgi olal.

¹⁶Luoro gi kihondko omakogi, mi gichung’ achung’a ka siro, nikech duong’ mar tekoni. A Ruoth Nyasaye, gichung’ kamano, nyaka joma iloko jogi kadhi.

¹⁷A Ruoth Nyasaye, ibiro rwakogi, kendo ibiro chwoyogi ka kodhi e godi iwuon, kama niloso mondo obed kar dakni,

¹⁸Hekalu ma in iwuon nigero. A Ruoth Nyasaye, bed Ruoth nyaka chieng’.”

¹⁹Farese Farao kod gechene gi joithgi nodonjo e nam, mi Ruoth Nyasaye noduogo pi, moimogi. To jo-Israel nong’ado nam, kawuotho e lowo motwo.

²⁰Miriam janabi ma nyamin Harun nokawo bul, kendo mon duto nowuok moluwo bang’e, ka goyo bul kendo miel.

²¹Miriam nowernigi niya: “Weruru ni Ruoth Nyasaye, nikech oseyudo duong’ mipako ahinya! Osewito farese gi joithgi e nam!”

²²Musa nogolo jo-Israel e dho Nam Makwar, kuma ne gibworoe, mi ne giwuotho e thim Shur kuom ndalo adek ma ok giyudo pi.

²³Bang’e ne gichopo Marah, to ne ok ginyal modho, nimar pi mane ni kuno ne kech. Mano emomiyo nochak kanyo ni Marah (tiende ni, makech).

²⁴Ji noywak ni Musa, ka giwacho niya, “Wabiro modho ang’o?”

²⁵Musa nolamo Ruoth Nyasaye gi chunye duto, mi Ruoth Nyasaye nonyise osiki moro. Nokawe, mobole e pi, mi pi nodoko mamit. Kanyo ema Ruoth Nyasaye nomiyogie chik mogurore, kendo kanyo ema notemogie.

²⁶Nowachonigi niya, “An Ruoth Nyasaye ma Nyasachu. Ka uwinjo wechena gi chunyu duto, mi utimo mana kaka adwaro, kendo kumako chikena gi buchena, to ok nasandu gi tuoche ma nakelo kuom jo-Misri, nimar an e Ruoth Nyasaye machangou.”

²⁷Bang’ mano, ne gichopo Elim, kuma ne giyudoe sokni apar gariyo, kod yiend othidhe piero abiriyo, mi ne gibworo but soknigo.