Read luo Wuok 2 Bible Online

Wuok 2 - luo bible

Wuok 2

¹Jalawi moro nokendo nyar dhoodgi,

² mi chiegeno nomako ich, monywolo nyathi ma wuowi. Ka noneno ni en nyathi ma jaber, nopande kuom dueche adek.

³To kane koro ok onyal medo pande, nokawo adita mochwe gi togo, mi omwono gi lop chwech kod odok, mondo kik chwer. Nopielo nyathi ei aditano, eka nokete ei togo e bath aora Nael.

⁴To nyamin nyathino nochung’ gi chien matin mondo one ane gima nyalo timorene.

⁵Eka nyar Farao nobiro mondo olwokre kanyo, ka jotichne manyiri to wuotho e geng aora. Nopo koneno adita ka ni ei togo, mooro misumbane manyako moro mondo odhi oome.

⁶Kane osekelnego, noele, moyudo nyathi ma wuowi eiye ka ywak. Nokeche, mowacho niya, “Nyaka bed ni en achiel kuom nyithind jo-Hibrania.”

⁷Kane nyamin nyathi owinjo kamano, nopenje niya, “Adhi aluongni chi ja-Hibrania moro mondo odhodhni nyathino?”

⁸Nyar farao nodwoke ni, “Tim kamano.” Mi nyano nodhi moluongo mana min nyathino.

⁹Kane dhakono obiro, nyar Farao nowachone niya, “Kaw nyathini, ipidhna, kendo abiro chuli kuom timo kamano.” Mi dhakono nokawe, mopidhe.

¹⁰ Kane oseweyo dhoth, notere ir nyar Farao, ma koro nokawe ka mare. Nowacho niya, “Ne agole e pi.” Emomiyo nochake ni Musa (tiende ni mogol.)

¹¹ Chieng’ moro kane Musa osedoko ng’at maduong’, nodhi mondo one jo-Israel wetene, moneno kaka ichunogi gi tich matek. To bende noneno ka ja-Misri moro goyo achiel kuom jo-Hibrania wetene.

¹²Nong’iyo koni gi koni, to kane ok oneno ng’ato, nonego ja-Misrino, mopando ringre ei kuoyo.

¹³Kinyne nodok, moneno jo-Hibrania ariyo kagore. Nokwero jal mane okwinyo wadgi niya, “Mar ang’o igoyo wadu?”

¹⁴Jalo nodwoke ni, “Ng’ano moketi jatendwa kata jang’adnwa bura? Koso idwaro nega kaka ninego ja-Misri cha?” Kane Musa owinjo kamano, kibaji nogoye, koparo ni, “Adier, kara nyaka bed ni wachni oseng’ere!”

¹⁵ Farao nowinjo gima notimore, motemo mondo oneg Musa, to Musa noringo mondo odhi odag e piny Midian. Kane ochopo e pinyno, nobet e dho soko moro.

¹⁶Noyudo ka jadolo mar Midian nigi nyiri abiriyo. Nyigo nobiro umbo pi, mi giolo e mberni ma jamni modhoe, mondo jamb wuon-gi omodhi.

¹⁷Jokwath moko nobiro mondo oriembgi, to Musa nokonyogi, kendo omodhonigi jambgi.

¹⁸Kane nyigo odok ir Reuel wuon-gi, nopenjogi niya, “Ang’o momiyo uduogo chon kawuono?”

¹⁹Ne gidwoke ni, “Ja-Misri moro noresowa ka jokwath moko thagowa, bende en ema nende omiyo jambwa pi.”

²⁰Reuel nopenjo nyige ni, “En kanye? Mar ang’o uweye kuno? Dhiuru uluonge obi ochiem kodwa.”

²¹Musa noneno ni ber mondo odag gi ng’atno, mi Reuel nomiye nyare ma Zipora, mokendo.

²²Zipora nonywolo ni Musa wuowi, mi Musa nochako ni Gershom, (tiende ni jadak ka). Nochake kamano nikech noneno ni osedoko jadak e piny ma ok margi.

²³Bang’e achien, ruodh Misri notho, to jo-Israel ne pod ng’ur malich kuom bedo wasumbini, kendo ne giywak malit mondo ogolgi e thagruok ma kamano. Ywakgino notundo ni Nyasaye

²⁴ kendo nowinjo ng’urgi, mi noparo singruok mane otimo gi Ibrahim gi Isaka kod Jakobo.

²⁵Noneno kaka jo-Israel thagore, mi wachno nodonjone malit!