Read luo Wuok 22 Bible Online

Wuok 22 - luo bible

Wuok 22

¹“Ka ng’ato okwalo rwath kata rombo, mi oyang’o kata ong’iewo, to nyaka ochul rwedhi abich kar rwadhno, kata rombe angwen kar rombono.

²Nyaka ochule te. To ka jakuogno jachan, to nyaka ong’iewe ka misumba, mondo pesa mong’ieweggo obed chudo kar gima osekwalo. To ka oyude gi chiayono ka pod ngima, kata bed ni en rwath kata kanyna kata mana rombo, to nyaka ochul nyadiriyo. “Ka ojuk jakuo katuro ot, mi onege, to ok noyal ng’at monegeno e buch nek. To ka gima kamano otimore ka chieng’ osewuok, to nyaka yal ng’at monegeno e buch nek.

⁵“Ka ng’ato kwayo jamni e puoth cham, kata e puoth mzabibu, moweyo jambe ochamo puoth ng’at machielo, to nyaka ochul chamgo gi cham mabeyo, kata ochul olembego gi olembe mabeyo mag puothe owuon.

⁶“Ka mach omuoch, kendo olandore, momako yugi, kendo owang’o tuche mag cham mobeti, kata cham ma pok oka, kata mana puodho ngima, ng’at momoko majno nyaka chul kar gik mokethogo.

⁷“Ka ng’ato omiyo wadgi pesa kata gimoro ni mondo okanne, mi okwal gigo e od wadgino, koyud jakuogno to nyaka ochul gik mokwalgo nyadiriyo.

⁸To ka ok oyude, to nyaka wuon odno dhi e nyim Nyasaye mondo okuong’re ni ok okawo gino.

⁹“Gimoro amora mochachni, kata rwath kata kanyna, kata rombo, kata law, kata gimoro amora mokwany ma ji ariyo laro, nyaka ter wachne e nyim Nyasaye. Jal ma Nyasaye onyiso ni e jaketho, nyaka chul wadgi mokehoneno nyadiriyo.

¹⁰“Ka ng’ato oriembo ni wadgi kanyna, kata dhiang’, kata rombo, kata chiayo moro amora, mi chiayono otho, kata ohinyore, kata ope e kwath, ka ng’ama neno onge,

¹¹to ng’at mane oriembnegono nyaka kuong’re e nyim Nyasaye, konyiso ni en ok okawe. To ka oyud ni ok okwale adier, to wuon-go nyaka we wachno kamano, kendo ng’atno ok nochule.

¹²To ka okwal chiayono kuome, to nyaka ochul wuon-go.

¹³To ka ondiek ema onege nyaka okel ringe modong’ mondo ji one, nikech ok onego ochul gima ondiek ema onego.

¹⁴“Ka ng’ato oholo chiach wadgi, to bang’e chiayono ohinyore kata otho ka wuon-go onge, to jal moholono nyaka chule.

¹⁵To ka chiayono ohinyore kata otho ka wuon-go nitie, to jaholono ok chule. To ka en gima ichuloe gimoro, to euon chiayono noyud mana chudono kende.

¹⁶ “Ka ng’ato osero nyako ngili ma pok okendi mi oriworego, to nyaka okende.

¹⁷To ka wuon nyako odagi ni ng’atno ok kend nyare, to nyaka ng’atno chul pesa moromo nywomo nyako ngili.

¹⁸ “Kik uwe dhako ma jajwok bed ngima, to nyaka unege.

¹⁹ “Ng’ato moterore gi chiayo nyaka negi.

²⁰ “Ng’ato motimo liswa ni nyasaye moro, ma ok Ruoth Nyasaye, nyaka negi.

²¹ “Kik uthag jadak, kata kik uthire, nikech un bende ne un jodak e piny Misri,

²²bende kik uthag chi liel kata nyathi ma kich.

²³Ka uthagogi, mi giywakna mondo akonygi, to anawinjgi,

²⁴kendo anakech kodu, mi anakel lweny ma unuthoe. Kamano mondu nodong’ mond liete, kendo nyithindu nobed kiye.

²⁵ “Ka iholo ng’ata moro ma jachan pesa, to kik ikaw kuome ohala, ka jahol pesa.

²⁶ Kata ka ng’ato osingoni lawe, to nyaka idwokne lawno kapok chieng’ opodho,

²⁷nikech mano e lawe kende moumorego. Ka ok itimo kamano, to ere gima donindie? Ka oywakna ni mondo akonye, to anawinje, nikech ang’won.

²⁸ “Kik uyany Nyasaye, kendo kik ukuong’ jotendu.

²⁹“Kik utamru miya chiwo moa kuom chambu, kata kuom divai, kata kuom mo. Yawuotu makayo bende nyaka umiya,

³⁰kendo utim kamano gi jambu, bende. Nyaka gibed gi min-gi kuom ndalo abiriyo, to chieng’ mar aboro unumiyagi.

³¹ “Unubed ji mowalna, omiyo kik ucham ring’o ma ondiek onego oko e thim, to nyaka uwite mana ni guogi.