Read luo Wuok 24 Bible Online

Wuok 24 - luo bible

Wuok 24

¹Noyudo ka Ruoth Nyasaye osewacho ni Musa niya, “Bi ira e got, kaachiel gi Harun gi Nadab gi Abihu kod jodong Israel piero abiriyo, to kapok uchopo machiegni, kulreuru mondo ulem.

²In kendi, Musa, ema nichop machiegni koda. Jomokogo ok nosud ira, to bende onge ng’ato ang’ata ma noidh kodi ku.”

³Musa nodhi monyiso ji chike kod buche duto mag Ruoth Nysaye. Ji duto nodwoke niya, “Wayie timo gik moko duto ma Ruoth Nyasaye osewacho.”

⁴Musa nondiko chike duto mag Ruoth Nyasaye. To kinyne gokinyi nogero kendo-mar-misango e tiend got, kendo nochungo kite apar gariyo mag rapar, maromre gi kar romb dhout Israel apar gariyo.

⁵Eka nooro yawuowi moko ma jo-Israel monego rwedhi, mi gitimogo ni Ruoth Nyasaye misengni miwang’o pep, kod misengni mag sawo.

⁶Musa nokawo remo moko, moolo e tewni, to remo modong’ nokiro e kendo mar-misango.

⁷Bang’e nokawo kitabu mondikie weche mag singruokgo, mosomo matek mondo ji duto owinji. Giduto ne giwacho niya, “Wayie winjo Ruoth Nyasaye, kendo wanatim duto mosechiko.”

⁸ Bang’ mano Musa nokawo remo, mokiro kuom ji, kowacho niya, “Ma e remo mar singruok mane Ruoth Nyasaye osemiyo utimo kode, kaluwore gi weche manie kitabuni.”

⁹Musa gi Harun gi Nadab kod Abihu, kaachiel gi jodong Israel piero abiriyo nodhi e got, moneno Nyasach Israel.

¹⁰Nochung’ ewi gima chalo gi laro molos gi kit ombo marieny mana ka polo.

¹¹To Ruoth Nyasaye ne ok ohinyo jodong Israelgo. Ne gineno Ruoth Nyasaye, mi gichiemo kode kendo gimetho.

¹²Ruoth Nyasaye nowacho ni Musa niya, “Bi ira e got ku, mondo ibed ka. Abiro miyi kite mopamore ma asendikoe buche kod chike mondo ipuonj ji.”

¹³Musa kaachiel gi Joshua jatichne nodhi e god Nyasaye.

¹⁴Noyudo Musa osewacho ni jodong Israel niya, “Ritwauru ka, nyaka waduogi. Harun kod Hur eki odong’ kodu. Ng’ato ka ng’ato man gi wach modwaro loso to mondo odhi irgi.”

¹⁵Kamano Musa nodhi ewi got, kendo bor polo noimo got.

¹⁶Duong’ maler mar Ruoth Nyasaye nolor ewi got Sinai, mi bor polo noimo got kuom ndalo auchiel. To chieng’ mar abiriyo Ruoth Nyasaye noluongo Musa gi e bor polo.

¹⁷Duong’ maler mar Ruoth Nyasaye ne chalo ni jo-Israel mana ka mach maduong’ maliel ewi got.

¹⁸ Musa nodonjo e bor polono, modhi ewi got, kendo nobet kuno kuom ndalo piero ang’wen odiechieng gotieno.