Read luo Wuok 25 Bible Online

Wuok 25 - luo bible

Wuok 25

¹Ruoth Nyasaye nowacho ni Musa niya,

²“Nyis jo-Israel mondo okelna chiwo, kendo ichokna chiwo moro amora kuom ji duto moyie golo kuom herogi.

³Gik ma onego ichok e magi: Dhahabu gi fedha kod mula,

⁴kaachiel gi law mambulu kod marathuol kod makwar, kod law katana maber, gi yie diek,

⁵gi piende rombe molok gi range makwar gi piende monyong’ gi yiend shita,

⁶gi mor taya kod gik mang’ue ng’ar,

⁷gi kite mibiro keto e law dolo miluongo ni efod kod law agoko.

⁸Bang’ mano gigerna Kama Ler mondo adag kodgi.

⁹To nyaka gere kaachiel gi gige duto, kiluwo mana kido ma abiro nyisi.

¹⁰“Los sanduk ma borne oromo mita achiel, to lachne nus mita, kendo borne modhi malo bende nus mita.

¹¹Bawe gi dhahabu maler, oko gi iye, kendo ilosne laini mar dhahabu molwuoro bethene duto.

¹²Thedhne ratege ang’wen mag dhahabu, kendo ketgi e tiendene ang’wen. Ratege ariyo nobed e bathe konchiel, to ariyo e bathe komachielo.

¹³Los ludhe ariyo gi yiend sida, mi ibawgi gi dhahabu,

¹⁴kendo irwakgi e ratege manie bath sanduk koni gi koni mondo oting’go sanduk.

¹⁵Ludhego nyaka sik ei ratege, ma ok ogolgi oko.

¹⁶To ketie kite ariyo mag rapar ma abiro miyi.

¹⁷ “Losne raum mar dhahabu ma borne oromo mita achiel, to lachne nus mita, obed kar-ng’wono.

¹⁸Kaw dhahabu, ithedhgo kido ariyo machalo gi malaika miluongo ni kerubi, mondo gibed gimoro achiel gi raum, mondo obed kar ng’wono.

¹⁹Kerubi achiel nobed e dho raum konchiel, kendo achiel e dhoge komachielo.

²⁰Ginibed ka giyaro buombegi malo mondo gigeng’ raum, kendo ginimanyre, ka ging’iyo wi raum.

²¹Ket raumno e dho sanduk, to iye ketie kite ariyo mag rapar ma abiro miyi.

²²Kanyo ema naromie kodi, kendo ka an ewi raum e kind kerubi ariyo manie wi Sandug Rapar, anamiyi chikena duto, iter ni jo-Israel.

²³“Los mesa gi yiend sida, ma borne romo mita achiel, to lachne nus mita, kendo borne modhi malo bende nus mita.

²⁴Bawe gi dhahabu maler, kendo ilosne laini mar dhahabu molworo bethene duto.

²⁵Chue mithe alwora ma lachne romo tat lwedo achiel, kendo ichue dir mitheno gi dhahabu.

²⁶Ilos ratege ang’wen mag dhahabu, kendo ichomgi e tunge ang’wen mag mesa kama tiendene nitie, mondo oting’ego.

²⁷Ratege ma norwakie ludhe miting’ego nobed e mithe.

²⁸Ilos ludhego gi yiend sida, kendo ibawgi gi dhahabu. Gin ema noting’ kodgi mesano.

²⁹Los tewni gi kikombe gi agulni kod agwetni mitiyogo kitimo misengni miolo piny. Gigo duto nyaka los gi dhahabu maler.

³⁰ To makati miketo e nyima pile nyaka bed e mesano ndalo duto.

³¹“Ilos rachung taya gi dhahabu maler. Tiende kod kore to mondo ilos gi dhahabu mothedhi, kendo maupe mogorie, kaachiel, gi thiepegi kod obokegi, nyaka los obed gimoro achiel kode.

³²Nobed gi bede auchiel moa e bathe koni gi koni, adek e bathe konchiel, kendo adek e bathe komachielo.

³³Moro ka moro nyaka bed gi maupe adek mogor kaachiel gi thiepegi kod obokegi, machal gi thiep oyungu.

³⁴E kor taya hie nyaka bedie maupe ang’wen man gi thiepe kod oboke machalo gi thiep oyungu.

³⁵Bede ariyo ariyo mag rachungino nyaka bed gi maua achiel e bwogi.

³⁶Maupego gi bedego kod rachungino nobed gimoro achiel mothedh gi dhahabu maler.

³⁷To bende ilos teyni abiriyo ni rachungi, kendo iketgi malo mondo giliel ka gimenyo yo ka nyime.

³⁸Rangis teyni kod tepe nyaka los gi dhahabu maler.

³⁹To nyaka ikonyri gi kilo piero abich mag dhahabu maler kuom loso rachungino, kaachiel gi gige duto.

⁴⁰ To nyaka ine ni ilosogi machal gi kido mane onyisi ewi got.