Read luo Wuok 28 Bible Online

Wuok 28 - luo bible

Wuok 28

¹“In iwuon nyaka iluong Harun owadu gi yawuote, ma Nadab gi Abihu gi Eleazar kod Ithamar, kuom jo-Isarael mondo iket obed jodolona.

²Twang’ni Harun owadu lep dolo, mondo omedu duong’ gi chia.

³Nyis jotich molony ma asemiyo rieko olos ni Harun lewni morwako kokete jadolona.

⁴Lewni monego gilos e magi: Law agoko gi law dolo miluongo ni efod, gi aroya, gi law akor mogorie maridadi, kaachiel gi kilemba kod okanda. Ginibed lewni maler ma Harun owadu gi yawuote rwako ka tiyona tich dolo.

⁵Nyaka losgi gi dhahabu kod usi mambulu gi maralik kod makwar, kod law katana maber.

⁶“Bende gilos law dolo miluongo ni efod gi dhahabu kod usi mambulu gi maralik kod makwar, kod law katana maber ma jatueng’o molony oloso.

⁷To obed gi misibe ariyo mitueyego gok, gi yo ka nyime kod yoka chien.

⁸Okanda man kuome nyaka chue machal kode, kendo en bende nyaka lose gi dhahabu kod usi mambulu gi maralik kod makwar, kod law katana maber.

⁹Kaw kite ariyo mag berul mondo indikie nying yawuot Israel.

¹⁰E kidi mokwongo ndikie nying’ auchiel, to nying’ auchiel modong’ ndik e kidi mar ariyo, kaluwore gi nywolgi.

¹¹Ng’at molony e goro kidi ema nyaka ndik nying’ yawuot Israel e kite ariyogo, eka ichomgi e otunge mag dhahabu.

¹²Tuegi e misib efod, obed rapar mar yawuot Israel. Harun noting’ nyinggi e goke ka rapar e nyim Ruoth Nyasaye.

¹³“Los otunge mag dhahabu

¹⁴kod thiwni ariyo mag dhahabu maler, molos ka tol mokadi, kendo ituegi kuom otungego.

¹⁵Jatueng’o molony ema nyaka los law agoko mar ng’ado bura gi dhahabu kod usi mambulu gi maralik kod makwar, kod law katana maber, mana kaka olos efod.

¹⁶Borne obed lwedo achiel, to lachne bende lwedo achiel, kendo mondo obane diriyo.

¹⁷Nyaka ichan laini ang’wen mag kite ma nengogi tek. Laini mokwongo nobedie sardius gi topaz kod karbunkel,

¹⁸to laini mar ariyo ketie emerald gi safir kod diamond.

¹⁹Laini mar adek to ketie jasinth gi agat kod amethust,

²⁰kendo laini mar ang’wen ketie berul gi oniks kod jasper. Kidi ka kidi mondo orwak e otunge achiel achiel molos gi dhahabu.

²¹Kitego nyaka ndikie nying mag dhoudi apar gariyo, kaka igoro tere migoyogo sei. Kidi ka kidi mondo ondikie nying’ mag dhoudi apar gariyogo.

²²“Los ni law agoko thiwni mag dhahabu maler, mokadi ka tol.

²³Bende los ratege ariyo mag dhahabu, kendo iketgi e riak law agoko gi malo koni gi koni.

²⁴Tue tonde ariyo mag dhahabugo e ratege manie riak law agoko koni gi koni,

²⁵to dho tondego komachielo tue e otunge ariyo kande. Kamano e kaka itud law agoko gi misibe miriwogo ka nyim efod gi katoke.

²⁶Los ratege ariyo mag dhahabu, kendo iketgi e riak law agoko gi yo ka malo gi ka iye koni gi koni. Nyaka gibed momanyore gi efod.

²⁷Bende ilos ratege ariyo moko mag dhahabu, mi iketgi yo ka mwalo e dho misibe ariyo mag gok efod kama otwang’gigo e okanda.

²⁸Eka iriw ratege mag law agoko gi ratege mag efod gi tol mambulu, mondo law agoko obed ewi okanda gi malo, mondo kik ogonyre.

²⁹Kamano ka Harun donjo Kama Ler, nobed koting’o nying yawuot Israel e law agoko mar ng’ado bura e kore ka rapar e nyim Ruoth Nyasaye kinde duto.

³⁰ “To koro mogik, nyaka iket ombulu miluongo ni Urim gi Thumim ei law agoko mar ng’ado bura, mondo gibed e kor Harun kodonjo e nyim Ruoth Nyasaye, ka Harun donjo e nyim Ruoth Nyasye, nobed koting’o gik ng’ado bura ni jo-Israel e kore.

³¹“Los aroya mar umo efod gi law mambulu.

³²Nyaka obed gi otuch e diere ma wich wuokie. Aluora mar otuchno duto nyaka twang’ gi pien, mondo kik yiech.

³³Twang’ gik mong’inore ka machunga molos gi usi mambulu gi maralik kod makwar e riak lawno alwora, kendo iketie gara mag dhahabu e kindgi e kindgi.

³⁴Kamano gik mong’inorego nobed mokikore gi garago e laini achiel alwora mar riake mogik piny.

³⁵Harun nyaka rwak aronyano kotiyo tich dolo, mondo garago owinj ka odonjo Kama Ler e nyim Ruoth Nyasaye, kendo kowuok. Kamano ok notho.

³⁶“Los gima opamore ka san gi dhahabu maler, kendo indikie ni, ‘MOWAL NI RUOTH NYASAYE’. Wechego nyaka gor kaka igoro tere migoyogo sei.

³⁷Itueye gi tol mambulu, kendo ikete ka nyim kilemba.

³⁸Gima opamoreno nyaka bed e wi Harun, kendo kamano e kaka enopwodh ketho moro ma dipo kobetie kuom mich maler ma jo-Israel ochiwo ni Ruoth Nyasaye. Omiyo gino nyaka bed e wiye kinde duto, mondo Ruoth Nyasaye oyie chiwogo.

³⁹“Itwang’ law akor mar katana maber, kendo ilos kilemba bende gi law katana maber, kod okanda mogoye maradadi.

⁴⁰Los ni yawuot Harun kendhe gi okendni kod kilembni, mondo omedgi duong’ gi chia.

⁴¹Gigi imi Harun owadu gi yawuote, eka iwirgi gi mo, kendo iwalgi mondo gibed jodolona.

⁴²Ilosnigi sirweche mag law katana machopo e thochgi, mondo oim duggi.

⁴³Harun gi yawuote nyaka rwakgi ka gidonjo e Hemb Romo, kata ka gidhi e kendo-mar-misango mondo giti tich dolo. Kamano ok ginikethi, kendo ok ginitho. Chikni omako Harun gi nyikwaye nyaka chieng’.