Read luo Wuok 30 Bible Online

Wuok 30 - luo bible

Wuok 30

¹“Los kendo-mar-misango mar wang’o ubani, gi yiend shita.

²Borne gi lachne obed nus mita maromre, to borne modhi malo obed mita achiel. Tungene nyaka bed gimoro achiel kode.

³Bawe duto gi dhahabu maler, kendo ichuene ndiga mar dhahabu molworo bethene duto.

⁴Losne ratege ariyo ariyo mag dhahabu, kendo iketgi e bwo ndigano e konde ariyo man koni gi koni, mondo irwakie ludhe miting’ego.

⁵Nyaka ilos ludhego gi yiend shita, kendo ibawgi gi dhahabu.

⁶Ket kendono e nyim pasia mogeng’o Sandug Rapar, kama nobed karomoe kodu.

⁷Harun nyaka wang’ ubani mang’ue ng’ar e kendono okinyi kokinyi koiko teyni,

⁸kendo odhiambo kodhiambo komokogi. Kamano ubani nobed kiwang’o e nyim Ruoth Nyasaye nyaka chieng’.

⁹Kendono kik wang’ie ubani ma ok owinjore, kata misango miwang’o pep, kata mar cham, kata mana mano miolo piny.

¹⁰Harun nyaka mien tunge kendono gi remb chiayo mitimogo misango mar golo richo higa ka higa, kopwodhego. Nyaka tim kamano dichiel e higa kuom tienge duto mondo opuodhego. Kendono nobed maler moloyo, mowal ni Ruoth Nyasaye.”

¹¹Ruoth Nyasaye nowacho ni Musa niya,

¹²“Kikwano jo-Israel, to ng’ato ka ng’ato nyaka chul Ruoth Nyasaye chiwo mowarogo ngimane, mondo kik giyud masira e ndalo mikwanogie.

¹³ Ng’ato ka ng’ato mokwan nyaka chul nus shekel mondo obed chiwo ni Ruoth Nyasaye, (shekel achiel oromo gera piero ariyo, kopim gi rapim mitiyogo e tich Nyasaye.)

¹⁴Nga’to ka ng’ato mokwan ma hike oromo piero ariyo kata mokadho kanyo nyaka chul Ruoth Nyasaye chiwono.

¹⁵Kuchulo Ruoth Nyasaye chiwo muwarogo ngimau, ng’at ma jamoko ok nochul mang’eny moloyo, to bende ng’at ma jachan ok nochul morem.

¹⁶Pesa ma jo-Israel chiwo kar ngimagi nyaka itigo e Hemb Romo. Pesa muchiwo kar ngimaugo nomi Ruoth Nyasaye paro jo-Israel.”

¹⁷Ruoth Nyasaye nowacho ni Musa niya,

¹⁸ “Los karaya mar lwok gi mula, ma rachungine bende mar mula. Kete e kind Hemb Romo gi kendo-mar-misango, mi iolie pi

¹⁹mondo harun gi yawuote olwokgo luetegi gi tiendegi.

²⁰Pile ka gidonjo e Hemb Romo to nyaka gilwokre gi pigno kamano mondo kik githo. Bende ka gidhi e kendo-mar-misango mondo gitiye, kendo giwang’ie misango ni Ruoth Nyasaye,

²¹to nyaka gilwok luetegi gi tiendegi mondo kik githo. Mano nobed chik mochwere momako harun gi nyikwaye kod tiengegi duto.”

²² Ruoth Nyasaye nochako owacho ni Musa niya,

²³“In to ikaw gik mang’ue ng’ar, mabeyo machal kama: Manemane manumu moromo kilo apar gi dalasini moromo kilo abich, gi ondago bende kilo abich,

²⁴gi kasia kilo apar, (duto nyaka pim gi rapim mitiyogo e tich Nyasaye,) kod mor zeituni moromo lita abiriyo.

²⁵Gigo ema mondo ilosgo mor wir maler mang’ue ng’ar, mana kaka jalos gik mang’ue ng’ar loso. Mano nobed mor wir maler.

²⁶Morno iwirgo Hemb Romo gi Sandug Rapar,

²⁷kod mesa gi gige, kod rachung taya gi gige, kod kendo-mar-misango miwang’oe ubani,

²⁸gi mar misango miwang’o pep, kaachiel gi gige, kod karaya mar lwok gi rachungine.

²⁹Kamano nyaka ipwodh gigo mondo obed maler ahinya. To gimoro amora mogere kuomgi nobed mowal ni Ruoth Nyasaye.

³⁰To bende iwir Harun gi yawuote, kiwalogi mondo gibed jodolona.

³¹Wach ni jo-Israel kama: ‘Morni nobed mor wir maler kuom tiengeu duto.

³²Kik konyruok kode kuom wiro joma ok jodolo, bende kik ulos mo moro machal kode. Em mo mowal maler, kendo nyaka obednu kamano.

³³Ng’ato ang’ata ma nolos mo machal kamano, kata manowir kode ng’at ma ok jadolo nyaka ng’ad kare oko kuom jowetene.’ ”

³⁴Ruoth Nyasaye nowacho ni Musa niya, “Kaw gik ma kiwang’o to ng’ue ng’ar, machalo duogo gi sare gi mieny kod ubani maler. Pimgi maromre, kendo iketie chumbi

³⁵mondo ilosgo ubani mang’ue ng’ar, kaka jalos gik mang’ue ng’ar loso. Nobed gima ler, kendo mowal ni tich Nyasaye.

³⁶Kaw moko, iswag mayom mondo iket e nyim Sandug Rapar ei Hemb Romo kama naromie kodu. Enobednu gima ler ahinya.

³⁷Ubani molos e yo makama kik ukonyrugo e yoru uwegi. Nyaka obednu gima ler ahinya, mowal ni Ruoth Nyasaye.

³⁸Ng’ato ang’ata ma nolos ubani machal kode kamano, mondo otigo e yore owuon, nyaka ng’ad kare oko kuom jowetene.”