Read luo Wuok 31 Bible Online

Wuok 31 - luo bible

Wuok 31

¹Ruoth Nyasaye nowacho ni Musa niya,

²“Ng’eni aseyiero Bezalel wuod Hur, ja Juda.

³Asepong’e gi Roho mara mondo obed gi lony kod nyalo, kaachiel gi rieko mar ng’eyo tije duto mag lwedo, kaka:

⁴goro kido mabeyo mag dhahabu gi fedha kod mula,

⁵kendo ng’ado kite michomo, kaachiel gi payo bao, kata tich moro amora mar lwedo.

⁶To bende aseyiero Oholiab wuod Ahisamak, ja Dan, mondo okonye, kendo asemiyo jotich duto molony rieko mondo olos gigo duto masechiki.

⁷Ginilos Hemb Romo, kod Sandug Rapar gi raumne kod gik moko duto mag hema,

⁸kaka mesa gi gige, kod rachung taya mag dhahabu maler gi gige,

⁹kod kendo-mar-misango miwang’oe ubani, gi mar misango miwang’o pep, gi gige, kod karaya mar lwok gi rachungine,

¹⁰kod lep dolo malich mag Harun jadolo gi mag yawuote, ma girwako ka gitiyo tich dolo,

¹¹kod mor wir gi ubani mang’ue ng’ar mar Kama Ler. Ka giloso gigo duto, to nyaka giti mana kaka asenyisi.”

¹²Ruoth Nyasaye nowacho ni Musa niya,

¹³“Nyis jo-Israel kama, ‘Nyaka urit chieng’ Sabatona, nikech chieng’ yueyono en ranyisi manie kinda kodu kaachiel gi nyikwau nyaka chieng’, mondo ung’e ni an e Ruoth Nyasaye mopuodhou.

¹⁴Kuom mano nyaka urit Sabato nikech en chieng’ moket mondo obednu maler. Ka ng’ato ok orite, to nyaka nege. Ng’ato ang’ata motiyo chieng’no nyaka ng’ad kare oko kuom jowetene.

¹⁵ Unyalo tiyo tijeu kuom ndalo auchiel, to chieng’ mar abiriyo en chieng’ yueyo maler, mowal ni Ruoth Nyasaye. Ng’ato ang’ata manoti chieng’ Sabato nyaka negi.

¹⁶Jo-Israel nyaka rit chieng’ Sabato kuom tiengegi duto kaka chieng’ ma gisesingore rito nyaka chieng.

¹⁷ En ranyisi mochwere manie kinda kod jo-Israel, nimar an Ruoth Nyasaye, nachueyo polo gi piny kuom ndalo auchiel, to chieng’ mar abiriyo naweyo tich, mayueyo.’ ”

¹⁸Kane Ruoth Nyasaye osetieko wuoyo gi Musa e got Sinai, nomiye kite mopamore ariyo mag rapar. Gin e kite ariyo mane Nyasaye ondikoe gi lith lwete.