Read luo Wuok 36 Bible Online

Wuok 36 - luo bible

Wuok 36

¹“Bezalel gi Oholiab kod jotich molony duto mane Ruoth Nyasaye osemiyo rieko kod ng’eyo mar loso gik moko duto midwaro mondo olosgo Kama Ler nyaka los gigo duto mana kaka Ruoth Nyasaye osechiko.”

²Musa noluongo Bezalel gi Oholiab kod joma olony e tijegi, mane Ruoth Nyasaye osemiyo rieko, kendo mane oyie konyo tich, mi nonyisogi mondo gichak tich.

³Nomiyogi chiwo mane jo-Israel okelo mondo olosgo Kama Ler. To jo-Israel nomedo mana kelo chiwo ni Musa okinyi kokinyi,

⁴nyaka joma ne olony e tije mopogore opogore mane loso Kama Ler noweyo tijegigo,

⁵mobiro ir Musa ka giwachone niya, “Ji kelo gik mang’eny moloyo kar midwaro kuom tich mane Ruoth Nyasaye ochiko ni mondo otim.”

⁶Omiyo Musa nogoyo milome e kambi kokwero ji duto niya, “Ng’at ma dichwo kata ma dhako kik med loso gimoro mitiyogo e Kama Ler.” Kamano ji noweyo kelo gik moko.

⁷Gik mane osekel ne ng’eny mohewoo tieko tich.

⁸Jotich molony ema noloso Hema Maler. Ne gilosone pasia apar mag law katana maber, mogoe kido mag kerubi gi usi mambulu gi maralik kod makwar mana kaka jatueng’o molony goro.

⁹Bor pasia ka pasia ne romo mita apar gang’wen, to lachne mita ariyo, kendo giduto ne giromre.

¹⁰Abich kuomgi noriw kaachiel,, kendo abich modong’ bende noriw kamano.

¹¹Ne giloso tonde piero abich mambulu e riak pasia matung’, kuom pasia abich mokwongo, kendo tonde piero abich moko e riak pasia matung’ kuom pasia abich modong’.

¹²Tondego nobedo momanyore.

¹³Bende ne giloso ramekni piero abich mag dhahabu, mi giriwogo pasia ariyo momanyorego, mondo Hema Maler obed gimoro achiel.

¹⁴Ne giloso pasia apar gachiel mag yie diek, mondo obed hema maoko maumo Hema Maler.

¹⁵Bor pasia ka pasia, ne romo mita apar gabich, to lachne mita abich, to lachne mita ariyo. Giduto ne giromre.

¹⁶Ne giriwo mita abich kaachiel, kendo auchiel modong’ bende ne giriwo kamano.

¹⁷Ne giloso tonde piero abich, e riak pasia matung’ kuom pasia abich, kendo tonde piero abich moko e riak pasia matung’ kuom pasia auchiel.

¹⁸Bende ne giloso ramekni piero abich mag mula, mane giriwogo hema mondo obed gimoro achiel.

¹⁹Ne giloso raum mar piende imbe molok gi range makwar mondo giumgo hema maoko, kendo raum machielo molos gi piende monyong’ mondo obed ewi mokwongono.

²⁰Ne giloso ni Hema Maler sirni gi yiend shita.

²¹Bor siro ka siro ne romo mita abich, to lachne nus mita.

²²Siro ka siro ne nigi tiende ariyo moriw kaachiel. Sirni duto mag Hema Maler nolos machal kamano.

²³Ne gipayo sirni piero ariyo mondo gilosgo sisi mar Hema maler mochomo yo milambo,

²⁴kod rachungi piero ang’wen mag fedha mane girwako e sirnigo. Ne girwako siro mokwongo e rachungi ariyo, kendo ne gitimo kamano e sirni duto.

²⁵Sisi mar Hema Maler mochomo yo nyandwat bende ne gilosone sirni piero ariyo,

²⁶kaachiel gi rachungi piero ang’wen mag fedha. Ne girwako siro ka siro ei rachungi ariyo ariyo.

²⁷Bende ne giloso sirni auchiel ni tok Hema Maler koma odok yo podho chieng’,

²⁸kaachiel gi ariyo mamoko mane giketo e konde ariyo man yo ka tok Hema Maler.

²⁹Ne giriwo sirni mag kondego gi ratego achiel, chakre ka tiendgi nyaka malo, kendo sirni ariyogo nolos machalre.

³⁰Kamano ne gin sirni aboro kod rachungi apar gauchiel mag fedha. Siro ka siro norwak ei rachungi ariyo ariyo.

³¹Ne giloso rariw apar gabich gi yiend shita. Rariw abich nomako sirni mag bath Hema Maler konchiel,

³²kendo abich mamoko nomako sirni e bathe komachielo, to abich modong’ nomako sirni mane olosgo ka toke, mochomo yo podho chieng’.

³³Ne giloso rariw ka rariw madiere mondo okadh e kor sirni, koa tung’ konchiel nyaka tung’ komachielo.

³⁴Ne gibawo sirnigo gi dhahabu, kendo ne giketonigi ratege mag dhahabu mondo omak rariw. Rariwgo bende ne gibawo gi dhahabu.

³⁵Ne gitwang’o pasia mar law katana maber, mi gigoyoe kuome kido mag kerubi gi usi mambulu gi maralik kod makwar, mana kaka jatueng’o molony goro.

³⁶Ne giloso ni pasiano sirni ang’wen mag yiend shita, mi gibawo gi dhahabu, kendo ne gilosone rachungi ang’wen mag fedha.

³⁷Ne gitwang’o ni dho hema pasia mar law katana maber, mi gigoyoe maradadi gi usi mambulu gi maralik kod makwar.

³⁸Ne gibawo wi sirnigo kod ratege molworogi gi dhahabu, to rachungi abich mirwako e sirnigo nolos gi mula.