Read luo Wuok 38 Bible Online

Wuok 38 - luo bible

Wuok 38

¹Bezalel noloso kendo-mar-misango miwang’o te gi yiend shita. Borne gi lachne ne mita ariyo gi nus maromre, to borne modhi malo ne mita achiel gi nus.

²Noloso tungene e kondene ang’wen mobedo gimoro achiel kode, kende nobawe duto gi mula.

³Noloso gik moko duto mitiyogo e kendo-mar-misango, kaka agulini, gi rajope, gi tewni, gi rachwow, kod tegni mag mach. Gigo duto noloso gi mula.

⁴Bende nolosone kendono gimoro mar mula machalo gi sing’enge moketo e bwo ndiri molwore. Gino nochopo mana e kore gi yo ka malo.

⁵Nothedho ratege ang’wen mag mula, moketo e konde ang’wen mag gima chalo gi sing’engeno, mondo orwakie ludhene.

⁶Noloso ludhego gi yiend shita, mobawo gi mula.

⁷Norwakogi e ratege manie bath kendo-mar-misango koni gi koni, mondoo gibed mag ting’e. Nolose gi bepe moweyo iye thuolo ka i sanduk.

⁸ Nolenyo mula mag rangi mane okawo kuom mon mane tiyo e dho Hemb Romo, mi olosogo karaya mar lwok kod rachungine.

⁹Bende noloso laru. Kuma odok yo milambo noketoe pasia molos gi law katana maber ma borne romo mita piero abich.

¹⁰Nong’awogi e sirni piero ariyo, morwak e rachungi piero ariyo mag mula. To rang’aw kod ratege miriwogo sirnigo nolos gi fedha.

¹¹Koma odok yo nyandwat noketoe pasia ma borne romo mita piero abich. Nong’awogi e sirni piero ariyo, morwak e rachungi piero ariyo mag mula.

¹²To koma odok yoo podho chieng’ noketoe pasia ma borne romo mita piero ariyo gabich mong’aw e sirni apar kod ratege apar. Rang’aw kod ratege miriwogo sirni nolos gi fedha.

¹³Bor mar koma odok yo wuok chieng’ ne romo mita piero ariyo gabich.

¹⁴E dir rangach koni gi koni nolieroe pasia ma borne oromo mita abiriyo gi nus.

¹⁵Pasia ka pasia nong’aw e sirni adek, morwak e rachungi adek.

¹⁶Pasia mag laru duto notwang’ gi law katana maber.

¹⁷Rachungi norwakie sirni molos gi mula, to rang’aw kod ratege mag sirni nolos gi fedha, kendo nobaw wi sirnigo gi fedha. Ratege mag sirni duto mag laru bende nolos gi fedha.

¹⁸Pasia mar dhoranga laru nolos gi law katana maber, mogoe kido gi usi mambulu gi maralik kod makwar. Borne ne romo mita apar, to borne modhi malo mita ariyo gi nus maromre gi pasia mar laru.

¹⁹Ne ong’awe e sirni ang’wen morwak e ang’wen mag mula, to rang’awgi nolos gi fedha, kendo wigi kod rategegi nobaw gi fedha.

²⁰Loye duto mag Hema Maler kod mag laru nolos gi mula.

²¹Magi e kar romb gik mane Musa oketo e lwet jo-Lawi mane tiyo e bwo Ithamar wuod Harun jadolo, mondo olosgo Hema Maler, ma nyinge moro en Hemb Rapar.

²²Bezalel wuod Uri ma wuod Hur ja-Juda noloso gik moko duto mane Ruoth Nyasaye ochiko Musa.

²³Oholiab wuod Ahisamak ma ja Dan ema ne konye. Oholiab nolony e tich goro kite, gi tweng’o, kod tich goyo maradadi e law katana gi usi mambulu gi maralik kod makwar.

²⁴Kar romb dhahabu duto mane otigo kuom loso Kama Ler ne romo kilo alufu achiel gi mia ariyo kod piero adek, kipimo gi rapim mitiyogo e tich Nyasaye. Dhahabugo duto nochiw ka mich mowal ni Ruoth Nyasaye.

²⁵ Kar romb fedha mane ji ogolo e kinde mane ikwanogie, ne romo kilo alufu ang’wen gi mia abich kod piero aboro, kipimo gi rapim mitiyogo e tich Nyasaye.

²⁶ Fedhago ema ne ochok ka ne ng’ato ka ng’ato mokwan ogolo nus-shekel, nimar kar romb joma ne okwan ma hikgi oromo piero ariyo kata mokadho kanyo ne alufu mia auchiel gadek, kod mia abich gi piero abich. (603,550) Nus shekelno nopim gi rapim mitiyogo tich Nyasaye.

²⁷Kilo alufu ang’wen gi mia abich kod piero abich mag fedhago nolosgo rachungi mag Kama Ler kod mag pasia. Kilo alufu ang’wen gi mia abich kod piero abichgo ema nolosgo rachungi mia achiel, ka rachung ka rachung kawo kilo piero ang’wen gabich gi nus.

²⁸To kilo piero adek mag fedha mane odong’ nolosgo rang’aw kod ratege mag sirni, kendo nobawgoo wi sirni.

²⁹Mula mane ji ochiwo ka mich mowal ni Ruoth Nyasaye noromo kilo alufu adek gi mia abich.

³⁰Mago Bezalel nolosogo rachungi mag dhoranga Hemb Romo, kendo nolosogo kendo-mar-misango mar mula kod gima chalo gi sing’enge, kaachiel gi gik moko duto mitiyogo e kendono.

³¹Bende nolosogo rachungi duto mag laru gi mag sirni mane ni e dhoranga laru, kaachiel gi loye duto mag Hema Maler kod mag laru.