Read luo Wuok 4 Bible Online

Wuok 4 - luo bible

Wuok 4

¹Musa nodwoko Ruoth Nyasaye niya, “Ok gibi yie kata winjo gima awacho, to gibiro mana wachona ni, ‘Ruoth Nyasaye ne ok ofwenyoreni.’ To koro abiro timo ang’o?”

²Ruoth Nyasaye nopenje niya, “Mano ang’o miting’o e lwetino?” Nodwoke ni, “En luth.”

³Eka Ruoth Nyasaye nowachone niya, “Bole piny.” To kane Musa obole piny, nolokore thuol, mi Musa oringe.

⁴Bang’e Ruoth Nyasaye nowacho ni Musa niya, “Make gi iwe!” Musa nomake matek, mi olokore luth e lwete.

⁵Ruoth Nyasaye nowachone niya, “Tim kamano mondo onyis jo-Israel ni Ruoth Nyasaye ma Nyasach kweregi, ma Nyasach Ibrahim gi Isaka kod Jakobo osefwenyoreni.”

⁶Ruoth Nyasaye nowacho ni Musa kendo niya, “So lweti e lawi.” Notimo kamano, to kane ogolo lweteno oko, nonwang’o kotimo dhoho, kendo olokore rachar ka pe.

⁷Eka Ruoth Nyasaye nowachone ni, “So lweti e lawi kendo.” Mi notimo kamano, to kane ochako ogole oko nonwang’o kochango modoko mangima mana kaka dende duto.

⁸Ruoth Nyasaye nowachone niya, “Ka gitamore yie gi wecheni, kata ka ranyisi mokwongo ok omiyo giyie, to ranyisi mar ariyoni nomigi yie.

⁹To kapo ni ok giyie gi ranyisi ariyogi, kata winjo gima iwacho, to mondo itwom pi e aora Nael, ipuk piny. Kitimo kamano, to pigno nolokre remo.”

¹⁰Musa nowacho ni Ruoth Nyasaye niya, “Ruoth kiyie; ok an ng’at mong’eyo wuoyo e nyim ji, kata mana sani, ma koro isewuoyo kodani, pod an mana kamano. Lewa pek, kendo aywayo wach.”

¹¹Ruoth Nyasaye nowachone niya, “En ng’a ma chueyo dho dhano, kata en ng’a ma miyo dhano doko momo, kata ma ite odino? En ng’a mamiye wang’ mabith, kata loke muofu? Donge an Ruoth Nyasaye ema atimo gigi duto?

¹²Emomiyo koro dhiyo! Anakonyi wuoyo, kendo ananyisi gima onego iwachi.”

¹³To Musa ne pod odagi, ka kwero Ruoth Nyasaye niya, “Ruoth, kiyie to or ng’at moro nono mihero.”

¹⁴Ruoth Nyasaye nokecho gi Musa, mowachone niya, “Harun owadu ma ja-Lawi donge nitie? En to ang’eyo ni onyalo wuoyo maber. Ero en e yo, obiro iri, kendo obiro bedo mamor ahinya koneni.

¹⁵En aema iwuo kode, kinyise gima onego owachi. Abiro konyou wuoyo, kendo nyisou gima onego utim.

¹⁶Harun biro wuoyo gi ji kari, nimar en ema nobedni ka dhogi, to in ema nibedne ka Nyasaye, kinyise gima onego owachi.

¹⁷Kaw ludhini, nikech en ema ibiro timo kode honni.”

¹⁸Musa nodhi ir Jethro jaduong’ne mowachone niya, “Yie mondo adog Misri ir jowetena, mondo ane ka pod gingima.” Jethro nowachone niya, “Ber, dhi gi kue.”

¹⁹Ruoth Nyasaye nowacho ni Musa e piny Midian niya, “Koro dog Misri, nikech jogo duto ma nyocha dwaro negi osetho.”

²⁰Mi Musa nokawo chiege gi nyithinde, kendo noketogi e kanyna, modok Misri, koting’o luth mane Nyasaye omiye.

²¹Ruoth Nyasaye nowacho ni Musa niya, “Koro ero idok Misri, to nyaka ine ni itimo honni ma asemiyi teko ni mondo itim, e nyim Farao. To abiro miyo chunye doko matek, mi ok nowe jo-Israel thuolo mondo oa.

²²To nyaka inyise ni Ruoth Nyasaye owacho kama: ‘Israel en wuoda makayo.

²³ Nawachoni ni mondo iwe wuoda odhi olama, to nidagi, omiyo koro abiro nego wuodi makayo.’ ”

²⁴Ka ne Musa pod ni e yo, Ruoth Nyasaye nodhi ire kama nobworoe, mondo onege.

²⁵To Zipora nokawo kidi mabith, mong’adogo wuode nyangu eka nomulo Musa gi pien ma nong’adono, kowachone niya, “In chwora mar remo.”

²⁶Eka Ruoth Nyasaye noweyo Musa. Ter nyanguno ema nomiyo Zipora owacho ni, “In chwora mar remo.”

²⁷E ndalogo Ruoth Nyasaye nowacho ni Harun niya, “Dhiyo e thim mondo irom ni Musa.” Nodhi moromo kode e god Nyasaye, kendo nonyodhe.

²⁸Musa nonyiso Harun weche duto mane Ruoth Nyasaye omiye mondo odhi owachi, kod honni mane onego odhi otim.

²⁹Eka Musa kod Harun ne jodhi, mochoko jodong Israel kanyakla.

³⁰Harun nonyisogi weche duto mane Ruoth Nyasaye owacho ni Musa, kendo notimo honnigo duto e nyimgi,

³¹mi ne giyie ni kara Ruoth Nyasaye oseoro Musa adier. Bende kane giwinjo ni Ruoth Nyasaye oselimo jo-Israel, moneno chandruokgi, ne gikulore, mi gilame.